Hageo 2 - Toba del Oeste

'Laqataĝanaĝac laqaya joñe'me Hageo

¹ Joga'me nolo' jo'ne veintiuno, auoĝoic séptimo jo'ne Etanim, joñe'me Jaliaĝanec yitaĝa dojapegue' ñe'me Hageo,

² yamaĝalegue qaedi dojapegue' joñe'me Zorobabel choqoñe'me Josué, chayovida'a joga'me jiyaĝadipi lae:

³ «Jogaa'me yauata ca'li joga'me tamenaĝaiqui 'uaeñe jo'ne degueja da'me li'yoĝodic, male anenaĝachiyegue jenjo': ¿jach'e ga'me eeta nayi jenjo' tamenaĝaiqui dalaĝaic jo'ne nayi male auañiya? ¿Qo'li ja aueñetapega da'me qaya'te lajo'viyaĝac, ja ena'am ca'li jo'me 'uaeñe?

⁴ Qalaĝaja ¡a'nañaĝat, am Zorobabel! ¡Nataq'aen am Josué jo'ne lejaliaĝane'j jogaa'me tamenaĝaiqui lo'ol! Nataq'aen ¡a'nañaĝachi, ami jiyaĝadipi jo'ne oñita'ña jenjo' aleua! ¡A'uonataĝañi, qa'a yataqata ami jouetauelo!» Naq'aeta da'me 'laqatac joñe'me Jaliaĝanec jo'ne napacalegue ena'uac.

⁵ «Joote ja'aĝatema ca'li jogaa'me auachiyoĝoyegueta ca'li je'n queda'e joga'me Egipto laje'pi, da'me uetauelo da'me yañoqotaĝanaĝac. Qama'le nayi nach'e ena'am: ¡ena'te at'oiyi qa'a ami uetauelo da'me yañoqotaĝanaĝac!

⁶ »Ja cop'a jo' qomle male jen t'oqo jodi'me piyem, jen deda jena'me aleua: joga'me ñache let'a choqona'me aleua yataqata jen deda'y qomle.

⁷ Male yema jen deda naa'me 'nachaqa'te jena'me jenjo' aleua, qama'le yema qonedo'quena joga'me leuoyaĝac, qama'le joñe'me tamenaĝaiqui yataqata najaĝaye da'me 'lonaĝac.» Naq'aeta joda'me 'laqatac joñe'me Jaliaĝanec jo'ne napacalegue ena'uac.

⁸ «Qa'a mach'e yoqo'te jaga'me oro nataq'aen jaga'me plata.

⁹ Jenjo' tamenaĝaiqui dalaĝaic male degueja da'me li'yoĝodic jo' qomle, ja ena'am jo'me 'uaeñe. Qama'le yemta 'uo jo' qomle da'me 'nemaĝac jena'me jenjo' at'achaqadi'.» Naq'aeta joda'me 'laqatac joñe'me Jaliaĝanec jo'ne napacalegue ena'uac.

Namajoĝonaĝac jo'ne qoyanema gaa'me tamenaĝaiqui lo'ol

¹⁰ Ga'me nolo' jo'ne veinticuatro, auoĝoic noveno jo'ne Quisleu, ca'li maliaĝa jaliaĝanec joñe'me Darío, joñe'me Jaliaĝanec ja 'nalegue yitaĝa dojapegue' ñe'me Hageo,

¹¹ qama'le yamaĝalegue qaedi nenaĝategue jenjo': «Ami tamenaĝaiqui lo'ol, joñe'me Jaliaĝanec jo'ne napacalegue ena'uac, male ami yenateque jenjo' jo'ne qoyachiyoĝotalegue naa'me namajoĝonaĝaco:

¹² “Qom 'uo joga'me jiyaĝaua yachi joga'me lapat jo'ne joote qonetamelegue, yachaue ga'me lapoto lae uotaĝa loĝoiqui, qama'le uotaĝa male toĝoyet joga'me pan lae, uotaĝa ga'me nojec, uotaĝa lataĝa uotaĝa aceite, uotaĝa gamachaqaega niqui'yaĝat laqaya, ¿qo'li aueñetapega male ja 'nalo'te jogaa'me niqui'yaqa'te laqaya'?”» Jogaa'me tamenaĝaiqui lo'ol 'yadeteguet ca'li: «Aja'y, ja naq'aeta.»

¹³ Qama'le yitaĝa eetac ca'li ñe'me Hageo: «Qom 'uo joga'me toĝoyet ga'me napa'l, qama'le 'uo jaĝa'te da'me qoyen loec, qama'le uotaĝa toĝoyeta gamachaqaegaua naajo' niqui'yaqa'te, qama'le ¿qo'li ja nayelo ga'me loec naa'me naajo'?» Gaa'me tamenaĝaiqui lo'ol 'yadeteguet joca'li: «Eja, male naq'aeta ja no'en.»

¹⁴ Chane'eja Hageo male 'yaĝatema jenjo' 'laqataĝanaĝac joñe'me Jaliaĝanec jo'ne eetac: «Nach'ena jenjo' yajouaĝat jena'me jiyaĝadipi, yema joga'me yauote nataq'aen joga'me te'me lajaqaje'j yataqata nayelo ga'me loe'j.

¹⁵ Chane'eja nayi naa'me naajo' noloqo'ote, 'noota qom yataqata auenache'ta jenjo': da'me maliaĝa ja qo'noĝojeguem joga'me tamenaĝaiqui,

¹⁶ ¿jach'e ga'me auañiya ca'li? Qa'a ca'li 'uo joga'me jetaque naqat ga'me lanec nalo'taguet veinte joga'me nejalayaĝac, qama'te nale naloqoten ma'te ja ena'am, ch'e diez nalo'taguet; nataq'aen ca'li tayi joga'me yachiyoĝotalegue ga'me lataĝa, jetaque naqat ga'me cincuenta joga'me lae't joga'me ena'am ta'le naco'nadi, qama'te yejomalo'te jogaa'me veinte lete' joga'me.

¹⁷ ¡Naqayem jo'ne japalaĝa't! Ja'uo lapite'na ga'me adaniqui nataq'aen ja'uo jaga'me lache qaedi japalaĝat yema joga'me te'me auaqanachichi, qalaĝaja da'me ami ja jayem 'te a'niyelaqaiyot. Nach'ena jenjo' ñenaĝategue, jayem jo'ne Jaliaĝanec.

¹⁸ Nayi jo'ne nolo' veinticuatro, auoĝoic jo'ne Quisleu, male qoyejoidiñe naa'me lejogaqa'te jena'me p'añe qaedi t'añañi joga'me tamenaĝaiqui.

¹⁹ Qama'le nayi, yataqata auec'achiñe da'me male ja qaya joga'me trigo jala jo'ne uetañgui na'me lae't. Temaq'aen da'me qaga'te jala jana'me uva lichidic nataq'aen jana'me higuera, jaga'me granada nataq'aen jana'me olivo, qa'a chiyoqodayi naa'me naajo' noloqo'ote male ami janema da'me yeyalaqataĝanaĝac yema qaedi yataqata 'noote' jogaa'me.»

Joga'me ya'uo qomle ñe'me Jaliaĝanec

²⁰ Nach'ejo jo'me nolo' joñe'me Jaliaĝanec yitaĝa dojapegue' ñe'me Hageo,

²¹ yamaĝalegue qaedi yitaĝa dojapegue' joñe'me Zorobabel, jaliaĝanec di'me aleua jo'ne Judá, qama'le enaac: «Male yataqata jen deda jodi'me piyem nataq'aen jena'me aleua.

²² Japalaĝat qomle da'me lejaliaĝa'j jogaa'me jaliaĝanaqa laqaya' jenjo' aleua, qama'le je'n 'naqadañe jogaa'me neje'onaĝaiqui' jogaa'me. Yataqata je'n nejouoĝodijeguem gaa'me cadeetal nale nalada't lo'o, je'n qaya'ñelo jogaa'me netañguilo gaa'me, male yele'u gaa'me pe'ga nataq'aen jogaa'me netalo'te, onolqa'tape da'me yeleu gaa'me ledaĝanaqa'te ga'me te'me lequiaĝa'u mach'e laqaya'.

²³ Qama'le qom yovita ga'me nolo', am Zorobabel mach'e am yamaĝajec, yataqata am jetela, je'tem ena'am ta'le ñichijaĝa jo'ne yejaliaĝaiqui, qa'a am yiquiyac.» Naq'aeta da'me nenaĝategue joñe'me Jaliaĝanec jo'ne napacalegue ena'uac.