Hageo 1 - Toba del Oeste

Male laloqo' ta'le yitaĝa qo'noĝojeguem joñe'me tamenaĝaiqui

¹ Ca'li male 'uo ga'me lejaliaĝa joñe'me Darío, joga'me uo'e laqaya ca'li, joga'me 'uaeñe nolo' joga'me auoĝoic sexto jo'ne Elul, qama'le jenjo' 'laqataĝanaĝac joñe'me Jaliaĝanec qoyaloĝona ñe'me 'laqatanaĝanaĝanec jo'ne Hageo, qaedi qoyanem joñe'me jo'ne yelolegue jodi'me aleua Judá, mach'e Zorobabel, c'oĝot di'me Salatiel, choqoñe'me tamenaĝaiqui lo'ol lejaliaĝanec, mach'e Josué, c'oĝot di'me Josadac. Enaac:

² «Naq'aeta jenjo' 'yaqatac, mach'e jayem Jaliaĝanec jo'ne napacalegue ena'uac: jenjo' jiyaĝadipi enaac da'me maliaĝa ja laloqo' ta'le qo'noĝojeguem ga'me tamenaĝaiqui jo'ne mach'e 'yemec.»

³ Qama'le joñe'me Jaliaĝanec yitaĝa yojaĝanaĝan ca'li ñe'me Hageo, enaac:

⁴ «Jega da'me ami: ¿qo'li aueñi 'noota da'me yataqata onaĝayaqa'tape jonaa'me at'emaqadi', mate mane'e joga'me mach'e 'yemec jo'ne anetamenaĝaiquii maliaĝa ueteda'añdi naa'me lael?

⁵ »Chane'eja mach'e jayem Jaliaĝanec jo'ne napacalegue ena'uac, male ami ja'aĝatema da'me yataqata auenache'ta joga'me jetaque auauoyi.

⁶ Qa'a jalcote da'me adanaĝanaĝaqui nale, qalaĝaja ja jalcote joda'me adaqataĝanaĝaqui; nach'e ena'am da'me auequiyetac, qalaĝaja ja auanomiyeguet ta'le adanodiye; chayovida'a da'me aniyomi nale, qalaĝaja ja qaya da'me noĝop lamaic; yataqata auaediñe jogaa'me adeuoi lael jo'ne jo'om lo'o, qalaĝaja maliaĝa adetiyi; nataq'aen joga'me onataĝanaĝaic te'me qoyejeten nale qalaĝaja qaya'te chiyaqayi.

⁷ »Mach'e jayem Jaliaĝanec jo'ne napacalegue ena'uac, male ami ja'aĝatema da'me yataqata auenache'ta joga'me jetaque auauoyi.

⁸ Chane'eja male auajoyiyilo jogaa'me qajoĝona'a, qama'le adi'yaqui qomle joga'me epaq qaedi yitaĝa a'vichi joñe'me tamenaĝaiqui. Qom yem qama'le jayem yataqata matac, nataq'aen male ami jaloĝonalo da'me 'yonaĝac let'adaic.

⁹ Da'me ami, jalcote da'me anemichiyaque, qalaĝaja jaleca da'me auañiya nale; nataq'aen da'me ch'e auachiitauelo naa'me at'achaqadi', qom onolec da'me jepetet joga'me auañiya, qama'le jeuodaĝanec yema. ¿Toqoch'e naq'aeta jenjo'? Qa'a yajouaĝat da'me ja a'vichi joga'me tamenaĝaiqui jo'ne mach'e 'yemec; nach'edata da'me aniyamaĝachiila't da'me a'vichi'tape naa'me at'achaqadi'.» Naq'aeta da'me 'laqatac joñe'me Jaliaĝanec jo'ne napacalegue ena'uac.

¹⁰ «Nach'ena jenjo' ami yajouaĝa't nayi da'me ja uotep, nataq'aen jena'me aleua ja ya'uo da'me jalayaĝac.

¹¹ Naqayem jo'ne ja jen 'te uotep nayi, qaedi naa'me nanaĝanaqa'te yataqata qaqate', nataq'aen jogaa'me qajoĝona'a, chayovida'a joga'me trigo nataq'aen joga'me uva lichidijat, uotaĝa ua'ña joga'me olivo, yema joga'me te'me uetalo'te jogaa'me nanaĝanaqa'te, chayovida'a ga'me te'me yaqanatet jena'me jiyaĝadipi choqoga'me lalopi, uotaĝa yema joga'me te'me 'nonataĝanaĝac.»

Ga'me jiyaĝadipi yoqochideta ca'li joñe'me Dios

¹² Chane'eja ñe'me Zorobabel nataq'aen Josué chayovida'alo jogaa'me jiyaĝa'u laqaya' male yataqata t'oita joga'me domachita ca'li jenjo' nenaĝategue joñe'me Dios, yataqata naquiaĝata ca'li ñe'me Hageo, qa'a nach'eñe joñe'me Jaliaĝanec jo'ne yamaĝalegue ca'li qaedi nenaĝategue jenjo'.

¹³ Qama'le ñe'me Hageo, lamaĝajec joñe'me Dios, male dojetac, nenaĝatetapegue ca'li da'me Dios 'laqatac, enaac: «Mach'e jayem Jaliaĝanec jo'ne ja 'nalegue, male ami ja'aĝatema da'me yataqata ami jouetauelo nayi.»

¹⁴ Chane'eja ñe'me Jaliaĝanec jo'ne ja 'nalegue ya'uo 'lañaĝac ca'li joñe'me jaliaĝanec jo'ne yelolegue di'me aleua Judá, mach'e Zorobabel, c'oĝot di'me Salatiel, nataq'aen joñe'me lejaliaĝane'j jogaa'me tamenaĝaiqui lo'ol, mach'e Josué, c'oĝot di'me Josadac, nataq'aen jogaa'me jiyaĝa'u laqaya' jo'ne maliaĝa uo'oe ca'li, qaedi male qoye'et qomle joga'me tamenaĝaiqui jo'ne 'lemec joñe'me Jaliaĝanec mach'e Nedios jo'ne napacalegue ena'uac.

¹⁵ Naq'aeta ga'me 'uo ca'li, ga'me nolo' jo'ne veinticuatro, auoĝoic jo'ne Elul, joga'me uo'e laqaya ca'li maliaĝa 'uo ga'me lejaliaĝa joñe'me Darío.