Habacuc 3 - Toba del Oeste

Netamenaĝac joñe'me Habacuc

¹ Jenjo' mach'e ñetamenaĝac, jayem Habacuc jo'ne jayem 'laqatanaĝanaĝanec joñe'me Dios:

² Am Jaliaĝanec, joote jayem qo'yaĝatem gaa'me at'onataqa let'adayaqa joca'li aue'uolo'te joga'me ac'oqo'tepi, qama'le yataqata en jayem najaqachigui da'me yauategaĝa. Chane'eja male yitaĝa aua'uo nayi naa'me naajo' noloqo'ote da'me qo'mi nec'alaĝatedegue, qaedi male jauanaĝa qama'le yataqata am jayatenaq. Uotaĝa eja te'me 'uo da'me adalemataic, qalaĝaja qo'mi aualoĝonalo qomle da'me adichoĝodenataĝanaĝac.

³ Ñe'me Dios jo'ne ja 'nalegue yitaĝa naequena qomle: chiyoĝogue di'me aleua lae jo'ne Temán, chiyaqaje'ma jodi'me qajoĝonaĝa jo'ne lenaĝat da'me Parán. Da'me 'lonaĝac laguelegue yema di'me piyem, qama'le yema jena'me aleua yataqata qo'nonaĝachigui joñe'me.

⁴ Da'me laqajelgaĝac joñe'me yataqata coletapejop, nataq'aen naa'me loua' na'yalo jena'me edañgui: qa'a male ja qoyoĝochiñe da'me lañoqotaĝanaĝac.

⁵ Najota'yelo jogaa'me napite'nadi jo'ne ja 'noe'n, naqaegaua jo'ne nolaĝachidiñe jena'me jiyaĝadipi.

⁶ Jena'me aleua deda nale cada'ac nechachiñi joñe'me Jaliaĝanec, qama'le gaa'me noyaqa yataqata diviloĝo'l jouaĝat da'me lec'atenaĝanaĝac joñe'me. Male pa'l jo' qomle jogaa'me toye's comada'a, nataq'aen male iyidiñe naa'me toye's qajoĝona'a, qalaĝaja gaa'me ladico joñe'me Dios nach'e eta't ja pa'l.

⁷ Male jauanalo ga'me jiyaĝadipi jo'ne Cusán laje'pi yataqata t'oi'y qa'a uetaue jena'me ja no'en, nataq'aen jogaa'me 'lachaqa't di'me Madián uetauelo da'me loqolanaqa't.

⁸ Am Jaliaĝanec, ¿qo'li eja da'me aualemata? ¿Qo'li aualemataya na'me ñache? Uotaĝa ¿qo'li nach'edi jodi'me noĝop let'a jo'ne am yalemataĝanaĝa'n? ¿Qo'li yajouaĝat da'me dojo' da'me male onetalo'te naa'me pe'gadi, da'me onañgui jaga'me cadeeta nalada't lo'o jo'ne adomataĝanaĝaiqui?

⁹ Joote auaqataĝata't na'me adechiquenec nataq'aen jalcote naa'me adechiquenal. Qama'le aue't naa'me ñache qaedi mach'e yauote ladic jena'me aleua.

¹⁰ Naa'me qajoĝona'a male deda'y qa'a am yauata, qama'le vichaĝaguet ga'me uotep jo'ne chiyaqaje'ma di'me piyem; nataq'aen na'me ñache let'a male 'uo da'me lalimaĝa, da'me male di'yo't naa'me lepa'a let'adayaqa.

¹¹ Jañe'me ajeua choqoñe'me auoĝoic cha'li ja nenoĝodijeguem, qa'a jalcote da'me laqajelgaĝa'j gaa'me adechiquenal, chayovida'a yataqata edañgui da'me 'lañaĝac jaga'me anemiyoĝo.

¹² Yajouaĝat da'me adalemataic let'adaic, oquetalegue yema jena'me aleua, qama'le auapeta'ñguilo naa'me noyaqa.

¹³ Male auanac qaedi anec'alaĝatedegue jena'me ac'oqo'tepi, qaedi auen uojotañi ñe'me adiquiyac ca'li. Joote auapalaĝat ga'me 'lemec ga'me ja no'en, chayovida'a da'me anavidijeguem jaa'me qadi jo'ne te'me p'adiñe nale ga'me emec.

¹⁴ Joote aualat joga'me lajoĝola't, aualateque gaa'me mach'e lechiquenal, ca'li jogaa'me leloiquiaĝanaĝanaqa yataqata ni'yoĝodela'ajalo, da'me lajamaĝa ena'am ga'me layat let'adaic, qama'le na'j qaedi qo'mi nacha'alo, da'me qo'mi jo'ne jenaqa'ama gaa'me qaya'te leuoyaĝa'j, qama'le qo'mi yelagaĝa't qaedi qaya'te ta'le qo'mi yauachiguilo da'me qo'mi yapalaĝa't.

¹⁵ Chane'eja onetalo'te nayi gaa'me alodi' pe'ga qaedi male auapetalegue jena'me ñache let'a, qama'le yataqata 'uo ga'me lalimaĝa.

¹⁶ Ca'li jomachiya jenjo', qama'le jalcote da'me yoqolanaĝa. Naa'me ñedegaĝat lael male deda'y, naa'me yichel yataqata ja t'añiguelo, qama'le jena'me 'yoyaĝac qaya'te 'lañaĝac. Qalaĝaja naq'aeta jayem machiñe, da'me jajo'ta ga'me nolo' qom ñe'me Dios ya'uo lec'atenaĝanaĝac jogaa'me qadaute'u.

¹⁷ Temaq'aen qaya'te jalayaĝac jaga'me higuera, uotaĝa ja ya'uo lejalayaĝac ga'me uva lichidijat; uotaĝa ena'am ga'me olivo lichidijat, uotaĝa gaa'me nanaĝanaqa'te qaya'te ta'le naqataĝanaĝac; nach'e ena'am uotaĝa male qayaua gaa'me 'nanaĝatel, uotaĝa male ochichiyelo naa'me uaca liqui'yaĝaiqui';

¹⁸ qalaĝaja da'me jayem yataqata jayem matac jo' qomle, qa'a yajouaĝat joñe'me Jaliaĝanec. ¡Yataqata 'ñonaĝachigui jo' qomle joñe'me Dios mach'e yec'alaĝaiqui!

¹⁹ Qa'a joñe'me Jaliaĝanec Dios nach'eñe ya'uo da'me 'yañaĝac; ya'uo 'lañaĝa'j naa'me yichel qaedi jayem vidiaqaic, jena'am jaga'me ta'naĝanaĝa, qama'le jayem yedaĝataje'ma di'me qayaje'mec, qama'le ñec'alegue jaĝa'te.