Habacuc 2 - Toba del Oeste

'Lataĝac ñe'me Dios

¹ Jeviteta't jaĝa'te nataq'aen 'uo da'me yetelaĝac; jadenaĝat joga'me vitaĝaic nale netela joga'me 'lonataĝanaĝac, qaedi male jayaten jach'e ga'me 'laqatac joñe'me Jaliaĝanec nataq'aen jach'e joga ga'me 'lataĝac da'me jalcote ñecotaĝac.

² Ñe'me Jaliaĝanec jayem 'yateguet, enaac: «Auedelo'te gaa'me e'epa jo'ne adedaĝanaĝalatel, qama'le auediñe qomle joga'me am jaloĝona, qaedi qoyaqanatet da'me qodojelegue joga'me.

³ Maliaĝa ja laloqo' ta'le novitequena da'me dojo', qaedi male yepaquichigui da'me yec'atenaĝanaĝac; qalaĝaja novitequena jaĝa'te jenjo' qo'yaĝatetac. Chane'eja am 'noota ta'le auatetaque: te'me ja paja'a novitequena, qalaĝaja novitequena jaĝa'te ga'me nolo' jo'ne mach'e laloqo'.

⁴ Auediñe jenjo': Gaa'me ja 'noe'n ni'yoĝodetapela'ajalo, qalaĝaja jogaa'me yataqatelo'te qamqa'me yauata qomle da'me lec'alaĝa'j, yajouaĝat da'me jayem p'iida'a.»

⁵ Gaa'me jiyaĝa'u 'yoĝodenaĝayaqa jetaque 'uo nale ga'me lejaliaĝa'j: yelotedaque jenjo', ja ch'e 'nomatedegue, qaya'te loiquiaqa' joda'me louenaĝanaĝa'j, mate mane'e ja no'en nale da'me nejaliaĝa. Na'me nedegaqa'te ena'ama ga'me napa'l lae't: qa'a yataqata ja yachaqa'y, ena'am ga'me neleuaĝa. Chane'eja jetaque yema nauela'ajalo naa'me 'nachaqa'te.

Qoye'uaĝa'n qomle gaa'me qaleuaĝayaqa

⁶ Qalaĝaja yema gaa'me noyaqa jo'ne joote qonouo't male jalcote da'me ye'ue'tape qomle gaa'me caldeopi, male t'onaĝa'n, enaa'j: «¡Yataqata am choĝodac, da'me am jo'ne auetapega ca'li am neuoyaq, yajouaĝat da'me am ue'tajop jena'me ja adoĝot! ¿Jach'e joga ga'me auen laloqo' da'me aĝañi da'me alapotapega't jena'me adeuoyaĝac jo'ne te'me at'alec ca'li?»

⁷ Qom male ja auepetapega, male novi't gaa'me yataqata loĝo't joga'me auana, qama'le nelodegue qomle gaa'me ja am 'te yalemaĝa't, qama'le uotaĝa e'n am jale'tague.

⁸ Yemeda naa'me noyaqa jena'me jenjo' aleua am qoyemalegue qomle, qama'le yataqata qodeuodaĝanec yema ga'me auana, ena'am ca'li auacona jenjo' ja adoĝot. Male am qo'yiyelaĝatec joga'me ja no'en jo'ne aua'uo ca'li, da'me aueloiquitapegue'to naa'me naajo' 'nachaqa'te nataq'aen joga'me jiyaĝadipi.

⁹ ¡Yataqata am choĝodac, da'me am jo'ne auen ca'li najaĝaye na'me at'emec! Auecachetac ca'li, chayovida'a jalcote jena'me adecachaĝat, qa'a 'uo da'me adelnataĝac da'me auen adec'alaĝa uotaĝa male ja am 'te uo'ot joga'me ja no'en!

¹⁰ Qama'le nach'ena jenjo' laguelegue na'me at'achaqa' da'me 'uo da'me lepocoĝoc, qama'le mach'e anejouaĝatela't da'me am pal jo' qomle, qa'a joote jalcote joga'me auapalaĝa't ca'li.

¹¹ Nach'e ena'ama gaa'me qadi choqogaa'me e'epa jo'ne netedaye gaa'me nequepaĝanaqa'te yataqata am nauteta jo' qomle.

¹² ¡Yataqata am choĝodaicolec, da'me am jo'ne ouaue da'me neloiquiaĝac, chayovida'a ouetaue da'me nalataĝanaĝac qaedi a'noĝotapijeguem na'me noic jo'ne mach'e at'achaqa'!

¹³ Ñe'me Jaliaĝanec jo'ne napacalegue ena'uac ya'uo da'me at'onataĝanaĝac qomle qaya'te chiyaqayi, yejamaĝaye da'me adeliñiyaĝac, qa'a yema jena'me jenjo' at'onatac yataqata qoyapalaĝat jo' qomle, male 'uo ga'me dole' jo'ne en yavic q'aen.

¹⁴ Qama'le ena'am ga'me noĝop jo'ne en najaĝaye na'me ñache let'a, da'me 'lonaĝac joñe'me Jaliaĝanec laguelegue qomle jena'me aleua, qama'le yema ga'me aleua laje'pi yataqata 'nonaĝachedigui joñe'me.

¹⁵ ¡Yataqata am choĝodaicolec, da'me am jo'ne aniyomaĝa'n nale jogaa'me adeje'gue! Auanema nale joga'me lataĝa qaedi jalcote da'me lachoĝode'j, da'me male nejoyidiñe jogaa'me.

¹⁶ Uotaĝa auetapega am ue'tajop ga'me adamaic, qalaĝaja ja naq'aeta, maq da'me am ue'tajop qomle da'me adepocoĝoc, qa'a joñe'me Jaliaĝanec 'uo joga'me am niyomaĝañgui jo'ne yataqachiñe chem: male ja am 'te qo'nonaĝachigui, dite da'me am qoye'uetac qomle.

¹⁷ Ga'me neloiquiaĝac ca'li auacha'ague di'me qajoĝonaĝa jo'ne Líbano, nach'e ena'am am nautena qomle, yajouaĝat joga'me yejidipi ca'li auala't. Nach'ena jenjo' qoya'uo lovi', qa'a jalcote jaga'me netauo' jo'ne 'uo ca'li, nataq'aen da'me ja avichoĝoden jenjo' aleua, ja no'en da'me at'onataĝanaĝac, chayovida'a da'me aualataĝañilo gaa'me jiyaĝa'u.

¹⁸ ¿Jach'e ga'me chiyaqayi joga'me nequi'i jo'ne ch'e 'nonatac? Uotaĝa, ¿jach'e ga'me yelo'teguet ga'me natajoĝoc lequi'i, jo'ne chiyaqayi da'me noqovinaĝanaĝac? Naa'me qonetametapecoto ja doje'y: qama'le joga'me jiyaĝaua jo'ne ye'e'tape nale, ¿toqoch'e jetaque p'iya'alo naa'me?

¹⁹ ¡Yataqata am choĝodaicolec, da'me am jo'ne anetametapecot nale joga'me epaĝa lae, qama'le auenaac: «Aneloye», uotaĝa auojapegue' nale ga'me qa' lae jo'ne ja doje, qama'le auenaac: «Oñejeguem»! Naa'me naajo' ch'e 'nonataqa, ¿qo'li 'uo ga'me yaqanatet ta'le ya'uo 'laqatac? ¡Ja naq'aeta! Qa'a ja nec'aletedaye, mate mane'e te'me 'uo da'me li'yoĝodi'j, da'me qoyiyoĝolo'te nale ga'me oro uotaĝa plata lae jo'ne onaĝaic.

²⁰ Qalaĝaja joñe'me Jaliaĝanec netaue ga'me ja 'nalegue netamenaĝaiqui: chane'eja yema da'me ami aleua laje'pi, ¡'noota qom auauoyi at'emaĝaqui da'me auajoyiyot joñe'me!