Habacuc 1 - Toba del Oeste

¹ Nach'ena jenjo' 'naqataĝanaĝac jo'ne qoyaloĝona ca'li ñe'me Habacuc, jo'ne 'laqatanaĝanaĝanec joñe'me Dios.

Habacuc dojapegue' ca'li ñe'me Jaliaĝanec

² Am Jaliaĝanec: ¿jach'e joga'me ua'a da'me je'emaĝañe da'me am ñachoĝodetapecot, qalaĝaja ena'am ta'le ja jetaque ta'le jayem anaquiaĝana? ¿Jach'e joga'me ua'a da'me maqachaĝa jayem machiñe? Qa'a 'uo jena'me jenjo' ja no'en jo'ne qo'mi qo'yeteque, qama'te ja auanac qaedi qo'mi anec'alaĝatedegue.

³ ¿Toqoch'e auen jauana jena'me jalcote yachoĝodec? ¿Toqoch'e a'uamaqaten jena'me jenjo' ja no'en? Jayem coletapelegue jena'me naqaleuaĝa, yema qonolaĝachiñe; yema naa'me 'nachaqa'te gaa'me jiyaĝa'u dalemata'y nataq'aen deloiquitapega't gaa'me.

⁴ Qama'le ja qodique'teguelo naa'me namajoĝonaĝaco jo'ne onaĝayaqa, uotaĝa ta'le qoya'uo da'me chimadichiñe. Gaa'me qaleuaĝayaqa yecaa'tape gaa'me yataqatelo'te, qama'le ga'me 'noota ladic ja di'yoq.

'Lataĝac joñe'me Dios

⁵ «Auec'achiñe' nayi naa'me noyaqa laqaya' jo'ne ami dajota'ualo. Yataqata auec'achiñe nataq'aen uotaĝa male auoqoch'iyem, qa'a naa'me naajo' noloqo'ote jo'ne ovitauelo, male ja'uo qomle ga'me ja auepíchitapega, mate mane'e joote ami qot'aqataĝanema ca'li.

⁶ Male jañidijeguem gaa'me lataĝanaĝayaqa jo'ne caldeopi qaedi ami quiiñguilo: nach'egaua jiyaĝadipi jo'ne yataqata qaleuaĝayaqa, jo'ne nach'e eta't da'me deloiqui'tape. Ja nelidiñi da'me quedelegue jena'me aleua, qaedi uotaĝa e'n loqo'te gaa'me 'nachaqa'te jo'ne te'me ja naq'aeta.

⁷ Yataqata qaleuaĝayaqa jogaa'me, qama'le diviloĝo'l ga'me laute'upi. Yataqata 'yoĝodenaĝayaqa jogaa'me, qama'le qaya'te 'yamaqate'n ga'me namajoĝonaĝac laqaya, nach'edata da'me mach'e 'lonataĝanaĝa'j jogaa'me.

⁸ Gaa'me lalodi jo'ne pe'gadi yataqata vidiaqayaqa, napacalo'te gaa'me jauaĝayaqa, yataqata ouaqayaqa, ja ena'ama gaa'me yaliaĝadi jo'ne 'nonaĝa laje'. Gaa'me netalo'te naa'me pe'gadi yataqata jalcote jogaa'me, yataqata qaya'alo nale yauote da'me leloiquiaĝa'j, ena'am joga'me uole ch'e nagui'ña nale joga'me loĝonec.

⁹ Ga'me tade'ga, yema yapalaĝa't nale; yema yavic, ena'am ga'me layat nale nepiyañe, nataq'aen jena'me nelatac yataqata jalcote, napacalegue ga'me pogaĝanaĝa.

¹⁰ Naajo' lataĝanaĝayaqa ch'e ye'ue'tape naa'me jaliaĝanaqa jena'me jenjo' aleua nataq'aen 'yota'n gaa'me lajoĝola'te ga'me jiyaĝadipi. Lajaĝa'tape nale yovideta ga'me noic lequepaĝanaĝat, qa'a yajaĝatot jena'me aleua, chayovida'a nalo'taguet da'me tadoue ga'me noic qaedi noma't.

¹¹ Nale 'uo ga'me tade'ga, ena'am ga'me layat let'adaic; ja yateto'n joñe'me Dios, nach'edata da'me p'iida'a da'me mach'e 'lañaĝa'j jogaa'me.»

Habacuc yitaĝa enapega joñe'me Jaliaĝanec

¹² Am Jaliaĝanec, ¿qo'li ja eja da'me nach'e eta't ja am 'te pal? Am Ñedios jo'ne ja am 'te 'nalegue: ¡nach'e eta't da'me ja adeleu! Am Jaliaĝanec jo'ne nach'e eta't jayem adetela, ¡naqa'am jo'ne aua'uo 'lañaĝa'j gaa'me caldeopi qaedi naqaegaua ye't nale ga'me adoequenataĝanaĝac, qaedi ye't nayi da'me adec'atenaĝanaĝac!

¹³ Da'me am yataqata ja am 'te 'nalegue, qama'le ja aviyamaĝaden joga'me ja no'en, nataq'aen ja a'uamaqaten jena'me loe'j jena'me jiyaĝadipi. Chane'eja, ¿teua'atoqo' da'me at'emaqata nale deloiqui'tape naa'me ja 'noe'n? ¿Toqoch'e at'emaqata nayi, da'me auec'ate'tape naa'me naajo' loeco lo'ol jo'ne yapalaĝa't gaa'me yataqatelo'te?

¹⁴ ¿Toqoch'e auaje'tema jena'me jiyaĝadipi da'me ena'ama gaa'me niyaqapi jo'ne uetedañgui jena'me ñache let'a, uotaĝa gaa'me yejidi jo'ne qaya'te de'uolo'te?

¹⁵ Naa'me caldeopi nejaliaĝatelo'te naa'me ja 'lachaqa'te, ena'ama jogaa'me 'yacoĝoyaqa nale nejaliaĝatelo'te gaa'me loĝonaqa: dapogoqotaĝa'n nataq'aen ye'uaĝadiñe gaa'me jelaĝael, chayovida'a qom jalcote gaa'me loĝonaqa, qama'le yataqata made'tape jogaa'me.

¹⁶ Chane'eja ena'am ta'le e'n qop'iya'alo nale gaa'me le'uaĝanaĝanaqa'te nataq'aen gaa'me lenal: chayovida'a da'me yauote nale ga'me lajaqaje'j, yajouaĝat da'me 'uo joga'me yali'j jo'ne jalcote nataq'aen jalcote joga'me liqui'yaĝa'j.

¹⁷ Qama'le ¿jach'e ga'me eeta jogaa'me caldeopi? ¿Qo'li nach'e eta't da'me ena'ama gaa'me 'yacoĝoyaqa, qama'le jenaqa'ama gaa'me niya' jo'ne uetauelo gaa'me le'uaĝanaĝanaqa'te? ¿Qo'li maliaĝa qaya'te lichoĝodenataĝanaĝa'j jogaa'me, da'me ja yaĝadiñe da'me yala't naa'me noyaqa?