Ester 9 - Toba del Oeste

Lomataĝanaĝac jogaa'me judiopi

¹ Yovita ga'me nolo' jo'ne trece, auoĝoic jo'ne Adar, jo'ne te'me ua'a da'me qoya'uo joga'me lamajoĝonaĝac joñe'me Asuero, qaedi gaa'me judiopi male qoyala't, qalaĝaja joga'me 'uo ma'te ja naq'aeta, qa'a jo'me jojo' nolo' gaa'me judiopi yataqata domataĝa'n, noma't gaa'me laute'upi.

² Yemeda jogaa'me 'nachaqa'te jo'ne ua'ñalo ga'me lejaliaĝa ñe'me Asuero, gaa'me judiopi yauote lojaĝa'j qama'le yataqata nejauaĝa't joca'li qaedi gamachaqaega jo'ne 'uo ga'me jetaque ya'uo joga'me 'yeteque ja yaqanatet. Qalaĝaja yataqata qayaua jo'ne dajoya'agueta gaa'me, qa'a male yataqata qot'oiyalo jogaa'me.

³ Yataqata qot'oiya joñe'me Mardoqueo, qama'le yemeda jogaa'me jaliaĝanaqa nataq'aen gaa'me najoĝola'te jo'ne yelolo'te gaa'me ale'u yataqata qolecochiyalo jogaa'me judiopi.

⁴ Qa'a yemeda naa'me 'nachaqa'te dijo' aleua, yataqata qoyayaten da'me male 'uo da'me lejaliaĝa ñe'me Mardoqueo, nataq'aen da'me nach'e eta't nichiquetaye da'me lejaliaĝa.

⁵ Chane'eja jogaa'me judiopi yaconalo jogaa'me ledaĝanaqa'te qama'le paja'a e'n qayaua gaa'me laute'upi, qa'a yataqata yauote da'me mach'e lelnataĝa'j ca'li.

⁶ Chayovida'a joga'me noic jo'ne Susa, qoyala't jogaa'me quinientos jiyaĝadipi;

⁷ uetauelo jena'me jenjo' jogaa'me diez lec'oqo'te di'me Amam jo'ne lenaqa'te Parsandata, Dalfón, Aspata,

⁸ Porata, Adalías, Aridata,

⁹ Parmasta, Arisai, Aridai nataq'aen p'ategue jo'me Vaizata.

¹⁰ Qoyala't naajo' diez lec'oqo'te di'me Amam jo'ne lauteua' gaa'me judiopi, qalaĝaja yataqata ja qoyacota joga'me loĝo't jogaa'me.

¹¹ Jojo' nolo' paja'a qot'aqataĝanem joñe'me jaliaĝanec Asuero jach'e eeta jogaa'me ueteda'ña di'me Susa jo'ne qoyala't ca'li,

¹² qama'le joñe'me Asuero t'aqataĝanem jañe'me Ester, enaac: «Jena'me jenjo' Susa, naa'me judiopi joote yala't jogaa'me quinientos jiyaĝadipi, chayovida'alo gaa'me diez jo'ne lec'oqo'te di'me Amam. Qampaja'a yema jena'me jenjo' yejaliaĝa, ¿qo'li ja 'uo qomle joga'me ena'am? Qama'le jega: ¿jach'e ga'me yitaĝa auepaquetapega? Jayem a'uaĝatem joga'me aviyaĝanaque nayi, qama'le am janem jaĝa'te.»

¹³ Qama'le Ester yitaĝa 'yateguet: «Qom auetapega 'noota, am jaliaĝanec, qom 'yoĝoñi yitaĝa auaje'tema gaa'me judiopi jo'ne ueteda'ña jenjo' Susa da'me yitaĝa yala't gaa'me laute'u. Nataq'aen gaa'me lapa'che gaa'me yele'u jo'ne lec'oqo'te di'me Amam, yataqata jetaque qoye'n jauanaqatalo'te qomle.»

¹⁴ Qama'le ñe'me jaliaĝanec Asuero damaĝajoĝolegue qaedi naq'aeta joga'me qoya'uo: yataqata qoyecoñededajeguem gaa'me diez lec'oqo'te di'me Amam, qama'le naq'aeta qoyauatalo'te ca'li di'me noic jo'ne Susa.

¹⁵ Chane'eja jogaa'me judiopi jo'ne ueteda'a di'me Susa male yema'a't ca'li joga'me nolo' jo'ne catorce, auoĝoic jo'ne Adar, qama'le qoyala't jogaa'me trescientos jiyaĝadipi, qalaĝaja ja qoyacota joga'me loĝo't.

Neualayaĝac jo'ne lenaĝat da'me Purim

¹⁶ Nataq'aen gaa'me judiopi laqaya' jo'ne ue'talo gaa'me 'nachaqa'te laqaya' nach'e ena'am da'me yema'a't qaedi de'uolo'te jogaa'me laqaya'olqa, chayovida'a netela'aque gaa'me laute'upi, qama'le yala't gaa'me setenta y cinco mil jiyaĝadipi. Qalaĝaja ja qoyacota ga'me loĝo't jogaa'me.

¹⁷ Jenjo' 'uo ca'li nolo' jo'ne trece, auoĝoic jo'ne Adar. Joga'me nolo' jo'ne catorce, yataqata 'nomatedegue, chayovida'a yauote leualayaĝa'j qa'a made'tape.

¹⁸ Qalaĝaja jogaa'me judiopi jo'ne ueteda'a di'me Susa yauote lojaĝa'j jo'me nolo' trece nataq'aen catorce qaedi necochiya't, qama'le jo'me nolo' quince yataqata 'nomatedegue nataq'aen yauote leualayaĝa'j ca'li.

¹⁹ Qama'le naq'aeta da'me yauote ca'li jogaa'me judiopi: jogaa'me jo'ne qaya'alo, ue'talo gaa'me 'nachaqa'te laqaya', yauote neualayaĝac ga'me nolo' catorce, auoĝoic jo'ne Adar, qama'le onolqa'tape yache't gaa'me laqaya'.

²⁰ Chane'eja ñe'me Mardoqueo yediñe yema da'me dojo' jo'ne 'uo ca'li, qama'le ya'uo lediije qaedi yamaĝalo yemeda gaa'me judiopi jo'ne uetedaue da'me lejaliaĝa ñe'me Asuero, yovitalo jogaa'me ueteda'a ga'me qaya'ague.

²¹ Yataqata damaĝajoĝolegue da'me yemeda naa'me 'uoidi naa'me noloqo'ote catorce nataq'aen quince, auoĝoic jo'ne Adar, yataqata qoya'uo neualayaĝac let'adaic.

²² Qa'a qouenatalo gaa'me noloqo'ote ca'li gaa'me judiopi male qaya da'me lachoĝode'j uotaĝa ta'le totelo'te, dite da'me 'uo ga'me namaic chayovida'a 'nemaĝac. Naajo' noloqo'ote jo'ne yauote neualayaĝac, onolqa'tape yache't gaa'me laqaya' nataq'aen lecochiyalo jogaa'me qaya'te yauata.

²³ Chane'eja jogaa'me judiopi yataqata yacoteguet da'me dojo' laqataĝac ñe'me Mardoqueo, ena'am da'me joote jetaque yauote joca'li.

²⁴ Mate mane'e ñe'me Amam, c'oĝot jodi'me Hamedata jo'ne chiyoĝoguet di'me Agag, nach'eñe jo'ne lauteua' yemeda gaa'me judiopi ca'li, jetaque najoĝola' qaedi yataqata qoyala't jogaa'me judiopi, qama'le ya'uo ca'li da'me qonalichigui qaedi yayaten da'me ua'a da'me e'n qoyala't jogaa'me.

²⁵ Qalaĝaja ca'li noma'a joñe'me jaliaĝanec Asuero da'me eeta da'me lelnataĝac ñe'me Amam, qama'le ya'uo joga'me lamajoĝonaĝac 'me yataqata qoyediñe, qaedi qoyen nedo'oguet joñe'me Amam da'me yataqata ja no'en jo'ne te'me 'lonataĝanaĝac ca'li, qama'le Amam nataq'aen gaa'me lec'oqo'te yataqata qoyecoñededajeguem ca'li.

²⁶ Chane'eja naa'me naajo' noloqo'ote yataqata qoyayate'n da'me Purim jo'ne yelo'tegueta qonalichigui. Gaa'me judiopi 'yamaqate'n joga'me qoyediñe jo'ne lediije ca'li ñe'me Mardoqueo, nataq'aen joote qoyayaten ga'me 'uo joca'li,

²⁷ qama'le yataqata 'yamaqate'n da'me qoya'uo neualayaĝac yemeda naa'me 'uoidi naa'me naajo' noloqo'ote, qaedi yataqata qouenata da'me 'uo namaic ca'li, chayovida'a da'me nach'e eta't da'me qoyapaĝagueneque jena'me jenjo' gaa'me ñoqolqapi jo'ne 'niyidiñe qomle, nataq'aen jogaa'me jetaque tauelo gaa'me judiopi.

²⁸ Qaya'te onolec joga'me judío ta'le yapalaĝate'talo naa'me naajo' noloqo'ote jo'ne Purim, uotaĝa ta'le ja ya'uo lamaic. Chane'eja yemeda naa'me ale'u lael nataq'aen naa'me 'nachaqa'te nach'e eta't da'me qoya'uo namaic nataq'aen neualayaĝac naajo' noloqo'ote jo'ne qouenatalo.

²⁹ Qama'le jañe'me jaliaĝana Ester, c'oqote di'me Abihail, nataq'aen Mardoqueo yitaĝa yauote jaga'me lediije laqaya, qaedi male yataqata qoyayate'n naa'me naajo' noloqo'ote jo'ne Purim.

³⁰ Nach'e ena'am uaye da'me 'lamaqatenataĝanaĝac jañe'me Ester chayovida'a da'me lepagaĝac, qama'le qoyamaĝalo yemeda jogaa'me judiopi jo'ne uo'oe, naa'me ciento veintisiete ale'u jo'ne uedaue ga'me lejaliaĝa ñe'me Asuero.

³¹ Jana'me janjo' nediije, jañe'me Ester nataq'aen Mardoqueo damaĝajoĝo'n qaedi yemeda jogaa'me judiopi nataq'aen jogaa'me c'oqo'tepi yataqata qoya'uo neualayaĝac naajo' noloqo'ote jo'ne qoyedidiñe, jo'ne joote 'yetetedac jaa'me noloqo'ote, nataq'aen yedidiñe da'me 'noota ta'le qoya'uo nale cha'li ja deque'y qaedi uenateteda'a ga'me lachoĝode'j ca'li.

³² Jañe'me jaliaĝana Ester yataqata dapaĝaguenataĝanec jenjo', qaedi qoya'uo neualayaĝac gaa'me noloqo'ote jo'ne Purim, qama'le naajo' namajoĝonaĝaco yataqata qoyedidiñe, qaedi uedaye jaga'me nede.