Ester 7 - Toba del Oeste

Qoyecoñedajeguem jo'me Amam

¹ Chane'eja joñe'me jaliaĝanec Asuero nataq'aen ñe'me Amam male dajotegue joga'me neualayaĝac jo'ne yitaĝa ya'uo jañe'me Ester.

² Ca'li maliaĝa niyometedapiye ga'me lataĝa, ñe'me jaliaĝanec yitaĝa yenat jañe'me Ester: «Am jaliaĝana Ester, ¿jach'e joga'me auouetaque? Uotaĝa tachi'ña laeñi da'me yejaliaĝa, am janem qomle, qom naq'aeta da'me jayem auajela.»

³ Ester male 'yateguet: «Am jaliaĝanec, qom eja yataqata jayem a'uamaqaten, qom naq'aeta da'me adelnataĝac, male am ñachoĝodenot qaedi qo'mi anec'alaĝatedegue, da'me jayem nataq'aen jogaa'me yaqaya'olqa.

⁴ Qa'a joote qoya'uo lajo'vi jena'me qanejiyaĝauayaĝac, chayovida'a da'me yataqata jetaque qo'mi qoyapalaĝa't qaedi male qo'mi qayaua. Ta'le nach'edata da'me jetaque qo'mi qoyeme'n, uotaĝa jetaque qo'mi ne'uaqa, qama'le je'emaqata nataq'aen ja am 'te jeloiquiaĝan, am jaliaĝanec, ta'le am ja'aĝatem joga'me qaya'te chiyaqayi.»

⁵ Ñe'me jaliaĝanec Asuero yenat ca'li: «¿Jach'e joga'me jetaque ya'uo jena'me jenjo'? ¿Jego ueta'ña?»

⁶ Qama'le Ester 'yateguet: «¡Ñe'me qadauteua nach'ena jenjo' Amam!» Ca'li domachiya da'me dojo', ñe'me Amam yataqata 'yemaqatam da'me do'e.

⁷ Joñe'me Asuero male ñejeguem, ca'e joga'me niqui'yaĝala' da'me yataqata dalemata, qama'le yec'ata jodi'me dajoya'ya ga'me nejaliaĝaiqui jo'ne uapega jana'me la'uo jaga'me nana, qaedi 'nemaqapiñe da'me lalemataic. Qalaĝaja ñe'me Amam yataqata yayaten ca'li da'me jaliaĝanec jetaque yalat, qama'le ch'e netaue joga'me emec qaedi nachoĝodenot jañe'me jaliaĝana Ester qaedi nec'alaĝategue.

⁸ Ca'li ñe'me jaliaĝanec male ca'e joga'me ua'a jana'me la'uo, yitaĝa taue joga'me emec, qama'le yauana ñe'me Amam jo'ne yataqata davi'te jañe'me Ester. Chane'eja ñe'me jaliaĝanec yataqata naqatoĝoden qama'le enaac: «¡Nach'e ena'am ja auate'ca jañe'me jaliaĝana, da'me one'ta jena'me jenjo' mach'e 'yachaqa' nataq'aen jayem auajo'tot!» Qama'le ca'li gaa'me coico laje' domachita ga'me 'lalaĝac joñe'me Asuero, paja'a yenoĝodeuo qama'le qoyapadelegue ga'me latajoĝoc ñe'me Amam.

⁹ 'Uo joñe'me coico le'ec lenaĝat Harboná enaac: «Ga'me 'lachaqa' na'me Amam 'uo jaga'me nejoquetañe, yauana janjo' veintidós metros da'me qayaje'mec, jo'ne 'lonata qaedi yecoñedajeguem joñe'me Mardoqueo, naqaeñe jo'ne am 'yaĝatem ca'li, am jaliaĝanec, da'me uo'oe ca'li gaa'me jetaque am yala't.» Chane'eja ñe'me Asuero enaac: «¡Nach'aga da'me auecoñiidaje'mec qomle!»

¹⁰ Chane'eja naq'aeta da'me yauote: qoyecoñedajeguem jo'me Amam, qoyecoñedaje'mec jaga'me nejoquetañe jo'ne qoye'et ca'li qaedi te'me qoyecoñedajeguem joñe'me Mardoqueo. Yem da'me dojo' qama'le joñe'me jaliaĝanec Asuero male machiñe.