Ester 4 - Toba del Oeste

Mardoqueo nachoĝodenot jañe'me Ester qaedi lecochiya

¹ Ca'li noma'a joñe'me Mardoqueo joga'me 'uo, qama'le yataqata yecolaĝata'aguelo gaa'me leuo lael, en yelo'teguet da'me yataqata lichigui q'aen. Male yaediñe gaa'me leuo lael laqaya' jo'ne yataqata ja no'en joga'me layoĝot, qama'le quetaye jodi'me noic da'me noyetac, yataqata neten joca'li.

² Yovita joga'me ladiiuo joga'me dajoya'ya ga'me nejaliaĝaiqui, qalaĝaja ja yenoĝoneuo, qa'a ja qoyajen ta'le taue joga'me jiyaĝaua jo'ne ja 'noe'n jogaa'me leuo lael.

³ Nach'e ena'am yemeda naa'me ale'u lael, ca'li yataqata qonoma'a joga'me lamajoĝonaĝac ñe'me Asuero, qama'le naa'me judiopi yataqata totelo'te, yataqata ja deque'y, jalcote da'me noenaĝa'j, chayovida'a e'n ja 'noe'n naa'me leuo lael nataq'aen da'me uedalegue ga'me jalo.

⁴ 'Uo joga'me ua'a ca'li gaa'me namaĝajel jañe'me jaliaĝana Ester nataq'aen gaa'me neteloqo't 'yaĝadetem joga'me yauotac ca'li ñe'me Mardoqueo. Chane'eja jañe'me yataqata totelegue, qama'le yamaĝalo gaa'me leuo lael joñe'me Mardoqueo qaedi naqa't jogaa'me leuo lael jo'ne ja 'noe'n, qalaĝaja joñe'me ja yaediñe gaa'me.

⁵ Chane'eja jañe'me Ester yiyaĝana joñe'me Hatac, neteloqo't jo'ne ya'uo ca'li ñe'me jaliaĝanec Asuero qaedi netela jañe'me, qama'le yamaĝalegue qaedi yenatec joñe'me Mardoqueo jach'e joga'me lajouaĝac.

⁶ Hatac male dajoyi jodi'me nemaqa' jo'ne yataqata p'aiyet joga'me qotayapego'uet joga'me nejaliaĝaiqui, qama'le dojapegue' joñe'me Mardoqueo.

⁷ Qama'le 'yaĝatetac joñe'me Mardoqueo da'me Amam jalcote jaga'me laicaua jo'ne jetaque yanem joñe'me jaliaĝanec Asuero qaedi en tayi da'me yataqata qoyapalaĝa't jogaa'me judiopi.

⁸ Ñe'me Mardoqueo nataq'aen yanem ga'me nede lae jo'ne qoyaloĝon ca'li di'me Susa, jo'ne uaye da'me jetaque yataqata qoyapalaĝa't gaa'me judiopi, qaedi qoyanem jañe'me Ester. Qa'a paquetapega da'me jetaque en yauana jañe'me, qaedi janjo' male dojapegue' joñe'me jaliaĝanec Asuero, qama'le yataqata en nachoĝodenot ñe'me, qaedi ja yalat ga'me mach'e layi jo'ne judiopi.

⁹ Chane'eja male ec joñe'me Hatac, qama'le 'yaĝatem jañe'me Ester yema joga'me eetac ca'li ñe'me Mardoqueo.

¹⁰ Chane'eja jañe'me ya'uo 'laqatac qama'le yitaĝa yamaq joñe'me Hatac qaedi qo'yaĝatem joñe'me Mardoqueo:

¹¹ «Yemeda naa'me lamaĝa's joñe'me jaliaĝanec nataq'aen joga'me jiyaĝadipi jo'ne netalo'te naa'me ale'u lael, qoyayaten da'me ja ch'e qoyec'ata nale ñe'me jaliaĝanec qom ja qoniyaĝana. Qa'a gamachaqaega joga'me ya'uo da'me dojo', yataqata qoyalat: nach'edata da'me qoyichoĝoden qom ñe'me jaliaĝanec male talaĝanec da'me nodegue ga'me laje'l jo'ne oro. Qalaĝaja da'me jayem, nayi qa'a nalo'taguet da'me treinta naa'me noloqo'ote ñe'me jaliaĝanec ja jayem 'te niyaĝana.»

¹² Ca'li Mardoqueo domachiya joga'me 'laqatac jañe'me Ester,

¹³ qama'le yitaĝa ya'uo jena'me jenjo' 'laqatac: «Ena'te auenate'ta da'me am onole jo'ne anec'alegue jo' qomle, yajouaĝat da'me onetaue jena'me nejaliaĝaiqui.

¹⁴ Qom ja auojapegue' ñe'me Asuero nayi qaedi qo'mi yichoĝode'n, qama'le 'uo jo' qomle ga'me qat'emaĝac ga'me na'ya, qalaĝaja da'me am nataq'aen joga'me adayi yema yele'u qomle. Yelnataĝac da'me auaqauaye nayi da'me am jaliaĝana qaedi auaqanatet ta'le qo'mi alecochiyalo, da'me qo'mi judiopi.»

¹⁵ Yitaĝa ya'uo 'laqatac jañe'me Ester, jo'ne yamaĝa ñe'me Mardoqueo, enaac:

¹⁶ «Auemata'a't qomle yemeda gaa'me judiopi jo'ne neteda'ña na'me Susa, qama'le yataqata jayem auajelaĝañilegue; cha'li ena'te auequiye nataq'aen ena'te aniyomi, aueñi nalo'taguet tres gaa'me noloqo'ote. Nach'e ena'ama naa'me yamaĝajel, chayovida'a jayem, cha'li ja jeque'yaq. Qom yem da'me dojo', male jec'ata ñe'me jaliaĝanec, mate mane'e ja qoyajen. Qama'le qom jetaque jayem qoyalat, 'noota qom naq'aeta da'me jayem qo'yetec qomle.»

¹⁷ Mardoqueo male ec, yataqata ya'uo yema joga'me Ester yamaĝalegue joca'li.