Ester 3 - Toba del Oeste

Amam jetaque yala't gaa'me judiopi

¹ Yenoĝodegue jaa'me noloqo'ote ñe'me jaliaĝanec Asuero en najoĝola' joñe'me Amam, qaedi yelolo'te jogaa'me jaliaĝanaqa laqaya'. Jenjo' mach'e c'oĝot jodi'me Hamedata jo'ne chiyoĝoguet di'me Agag.

² Qama'le nale qoyauana joñe'me Amam, yemeda jogaa'me namaĝa's yejoidiñe naa'me leliquetel nataq'aen naĝadiñi, en yelo'teguet da'me yataqata qouate'ca, qa'a naq'aeta da'me damaĝajoĝolegue ñe'me Asuero. Qalaĝaja joñe'me Mardoqueo yataqata ja yejoidiñe naa'me leliquetel, chayovida'a ja ch'e ta'le naĝañi.

³ Chane'eja gaa'me lamaĝa's ñe'me Asuero qoyenat da'me toqoch'e ja ya'uo joga'me lamajoĝonaĝac ñe'me jaliaĝanec.

⁴ Jalcote da'me qo'viyelaqatalegue joda'me qoyenatetac toqoch'e naq'aeta, qalaĝaja yataqata qaya'te 'lataĝac. Male yenoĝodegue jaa'me noloqo'ote, qot'aqataĝanem joñe'me Amam, qa'a jetaque qoyayaten ñe'me Mardoqueo da'me qo'li yaqanatet ta'le nenaĝategue ena'am da'me 'yaĝatema gaa'me namaĝa's nale, jo'ne joote ya'uo ga'me lechoqotaĝanaĝac da'me judío.

⁵ Ca'li ñe'me Amam noma'a joñe'me Mardoqueo da'me ja yejoidiñe naa'me leliquetel nataq'aen ja naĝañi nale, qama'le joñe'me yataqata dalemata.

⁶ Qalaĝaja ca'li joñe'me Amam noma'a da'me Mardoqueo mach'e judío, qama'le da'me lelnataĝac ja nach'edata da'me jetaque yapalaĝat joñe'me Mardoqueo, dite da'me nataq'aen yemeda jogaa'me judiopi jo'ne neteda'ña di'me lejaliaqa' ñe'me Asuero.

⁷ Asuero qa'a joote once naa'me 'uoidi joda'me lejaliaĝa. Ca'li yovita joga'me uo'e jo'ne duodécimo, ga'me auoĝoic jo'ne 'uaeñe, lenaĝat Nisán, qama'le Amam ya'uo lapinec qaedi yayaten joga'me nolo' da'me ye'et ga'me lelnataĝac, qama'le tachigui ga'me auoĝoic decimosegundo jo'ne lenaĝat Adar, ga'me nolo' jo'ne trece.

⁸ Chane'eja male dojapegue' ñe'me jaliaĝanec Asuero, enaac: «Am jaliaĝanec, jenjo' adejaliaĝaiqui 'uo ga'me jiyaĝadipi jo'ne ja 'lachaqa'tena, yataqata qoyelagaĝatetapiyelo chayovida'a da'me neta'ñalo yemeda gaa'me aleua lael. Jenjo' jiyaĝadipi 'uo na'me lajoĝoc joga'me nejiyaĝauayaĝac chayovida'a da'me ja yoqocha'alo naa'me adamajoĝonaĝaco. Qo'oche' qaya'te chiyaqayi da'me maliaĝa auaje'tema ta'le uo'oe gaa'me.

⁹ Am jaliaĝanec, qom naq'aeta da'me adelnataĝac, qama'le yataqata auamaĝalegue qaedi yataqata qoyapalaĝa't jenjo' jiyaĝadipi, qama'le da'me jayem, ja'uo qomle ga'me yajaqajec jo'ne trescientos treinta mil kilos jaga'me plata, da'me janema jogaa'me yelodelegue jaga'me laicaua lae't jena'me jenjo' adejaliaĝaiqui.»

¹⁰ Joñe'me jaliaĝanec Asuero male naqat jaga'me nechijaĝa jo'ne netaye jaga'me liaĝata, jo'ne uaye jaga'me netouojoĝonaqate ga'me nejaliaĝaiqui, qama'le yanem ñe'me Amam jo'ne yataqata lauteua' gaa'me judiopi.

¹¹ Dojapegue' joñe'me, enaac: «Ena'te auanegue jaga'me laicaua dite da'me auaconeguet, qama'le 'noota qom aua'uo joga'me jetaque a'ueteque jena'me jenjo' jiyaĝadipi.»

¹² Chane'eja joga'me nolo' jo'ne trece, auoĝoic jo'ne 'uaechiñe, male qoyiyaĝanalo gaa'me ledaĝanaĝanaqa ñe'me jaliaĝanec, qaedi qoyedidiñe gaa'me lamajoĝonaĝaco joñe'me Amam, qaedi male yamaĝalo yemeda jogaa'me lecochaĝa'u jo'ne yelolo'te gaa'me ale'u lael, nataq'aen yemeda jogaa'me najoĝola'te jena'me aleua. Naajo' namajoĝonaĝaco qoyedidiñe yema 'naqatac jo'ne qoyayaten, qama'le yataqata qoya'uo jaga'me netouojoĝonaqate nataq'aen nedelegue joñe'me jaliaĝanec Asuero.

¹³ Qama'le naa'me nede lael yataqata yema qoyamaĝalo naa'me 'nachaqa'te jo'ne uaue jenjo' nejaliaĝa: qoyamaĝalegue qaedi joga'me nolo' jo'ne trece, auoĝoic 'me Adar, yataqata qoyapalaĝa't yemeda gaa'me judiopi, yemeda jogaa'me 'yaĝayaqa choqogaa'me nejoqolqa, gaa'me yauo' nataq'aen gaa'me ñoqolqapi, qaedi yataqata qonouo't qomle.

¹⁴ Naajo' namajoĝonaĝaco yataqata qoyayatenaĝanaĝaneque yema ga'me aleua laje'pi, qaedi yataqata niyamaĝateta'ajalo qom yovita ga'me nolo'.

¹⁵ Yataqata paja'a da'me eque' gaa'me namaĝa's, qa'a naq'aeta da'me yamaĝalo'te ñe'me jaliaĝanec, qama'le nach'e ena'am da'me qoyaloĝon jodi'me noic let'adaic jo'ne Susa. Chane'eja yataqata yoqochetem yema ga'me jiyaĝadipi; joñe'me jaliaĝanec qamqa'me yataqata matac, male niyometac, naequetapegue' ñe'me Amam.