Esdras 5 - Toba del Oeste

Yitaĝa qo'noĝojeguem ga'me tamenaĝaiqui

¹ Jogaa'me Dios 'laqatanaĝanaĝanaqa Hageo nataq'aen Zacarías, c'oĝot di'me Idó, male 'yaĝate'tape daa'me 'naqataĝanaĝaco jo'ne chiyoqo'oto joñe'me Dios jogaa'me judiopi jo'ne ueteda'a di'me Judá nataq'aen di'me Jerusalén.

² Qama'le ñe'me Zorobabel, c'oĝot di'me Salatiel, nataq'aen ñe'me Josué, c'oĝot di'me Josadac, male yitaĝa ye't da'me 'noĝodijeguem joga'me tamenaĝaiqui jo'ne Dios loĝot, qama'le naa'me Dios 'laqatanaĝanaĝanaqa lecochiyalo ca'li.

³ Qalaĝaja yovideta ca'li di'me Jerusalén ñe'me Tatenai, jo'ne yelolegue joga'me aleua lae jo'ne ua'ague ga'me chauo'o di'me ñache Éufrates, nataq'aen ñe'me Setar-boznai choqogaa'me lecochaĝa'u laqaya', qama'le paja'a yena't jogaa'me judiopi: «¿Jach'e joga'me ami yamaĝalo'te qaedi a'noĝoñijeguem jena'me jenjo' tamenaĝaiqui, nataq'aen qaedi gaa'me qadi qoye'n couelo naa'me e'epa?

⁴ Nataq'aen, ¿jach'e gaa'me lenaqa'te jogaa'me onataĝanaĝayaqa?»

⁵ Qalaĝaja joda'me Dios ue'tajopa jogaa'me lajoĝola'te naa'me naajo' judiopi, qama'le qoyaje'tema da'me e'n 'noĝodijeguem jogaa'me, chayovida'a qom ga'me ua'a da'me qoya'uo nediije jo'ne qoyamaĝa joñe'me jaliaĝanec Darío da'me qot'aqataĝanem, nataq'aen da'me yovita joga'me 'lataĝac joñe'me.

⁶ Ca'li ñe'me jaliaĝanec Tatenai nataq'aen joñe'me Setar-boznai choqogaa'me lecochaĝa'u paja'a yauote ledaĝanaĝa'j qama'le yamaĝa joñe'me jaliaĝanec Darío,

⁷ jo'ne enaac joga'me: «Am jaliaĝanec Darío, auaconeguet jenjo' jo'ne mach'e qadep'iyenataĝanaĝac jo'ne am qauamaĝa. Am ue'tajop 'nemaĝac nataq'aen onaĝaic ladic.

⁸ Am jaliaĝanec, mach'e qat'aqataĝanaĝac da'me am qa'uaĝatem queda'me quelqaya jajoĝogue di'me aleua lae jo'ne Judá, qama'le jauanaĝa joñe'me tamenaĝaiqui let'adaic jo'ne loĝot joñe'me Dios jo'ne p'ajaye, da'me yitaĝa qo'noĝotapijeguem. Qama'le naa'me lael jo'ne qadi let'adayaqa joote qoye'n couelo naa'me e'epa. Jena'me jenjo' 'nonataĝanaĝac yataqata qoyiyamaĝatetac nataq'aen enegue joga'me 'nonatac.

⁹ Joote jenata' jogaa'me 'yaĝaicachidi: “¿Jach'e ga'me ami yamaĝalo'te qaedi a'noĝoñijeguem jenjo' tamenaĝaiqui, nataq'aen qaedi gaa'me qadi qoye'n couelo naa'me e'epa?”

¹⁰ Nach'e ena'am jenataĝaque jach'e gaa'me lenaqa'te jogaa'me lajoĝola'te jo'ne yelodelegue jena'me jenjo' 'nonatac, qaedi male am jayatenaĝanaĝac.

¹¹ Qama'le jogaa'me male qo'mi 'yategueta: “Da'me qo'mi jep'iyaq'a joñe'me Dios jo'ne 'netoqo't jodi'me piyem choqona'me aleua, qama'le nayi 'ñoĝonaĝajeguem jenjo' tamenaĝaiqui jo'ne joote 'nonatac ca'li jalcote jaa'me 'uoidi, ca'li cha'li 'uo jodi'me jaliaĝanec let'adaic jena'me jenjo' Israel.

¹² Qalaĝaja dia'me qadamol ca'li e'n dalemata'y ñe'me Dios, qama'le yaje'tema da'me e'n qonoma't, domataĝan di'me jaliaĝanec Nabucodonosor jo'ne Babilonia le'ec. Dijo' jaliaĝanec ca'li yataqata yapalaĝat jena'me jenjo' tamenaĝaiqui, chayovida'a e'n lelataqa yema jogaa'me neteda'ña jenjo' Jerusalén, qama'le qoyaueguelo ca'li di'me Babilonia.

¹³ Qalaĝaja 'uo ca'li jo'me ua'a da'me male 'uo ñe'me jaliaĝanec laqaya jo'ne Ciro. Jo'me 'uaeñe uo'e ga'me lejaliaĝa ñe'me Ciro, male yamaĝalegue da'me yitaĝa qo'noĝojeguem jena'me jenjo' tamenaĝaiqui.

¹⁴ Nataq'aen damaĝajoĝolegue da'me yema qo'yiyelaĝatec jogaa'me qoyaconalo ca'li jo'ne oro nataq'aen plata, jo'ne Nabucodonosor yaconalo ca'li yachiyoĝotauelo jena'me tamenaĝaiqui jo'ne Dios loĝot, na'ña jenjo' Jerusalén, qama'le yeda'alo di'me Babilonia. Qama'le naa'me naajo' 'nonataĝanaqa'te, ñe'me Ciro damaĝajoĝolegue da'me male qoyanema ca'li joñe'me Sesbasar, jo'ne joote qoyen jaliaĝanec jena'me jenjo' aleua jo'ne Judá.

¹⁵ Ciro dojapegue' ca'li ñe'me Sesbasar qaedi 'noota ta'le yitaĝa yedodi't yema jogaa'me ueteda'ajop jo'ne 'nonataĝanaqa'te, da'me yeda'alo joga'me tamenaĝaiqui jo'ne Dios loĝot, nataq'aen 'noota qom yitaĝa qo'noĝojeguem joga'me tamenaĝaiqui.

¹⁶ Chane'eja male novi' joñe'me Sesbasar, nec'ata jena'me Jerusalén, qama'le ye'et jaga'me p'añe jena'me tamenaĝaiqui. Qama'le nach'ena chiyoqotelegue da'me qo'noĝotapijeguem, qalaĝaja maliaĝa ja yem.”

¹⁷ »Chane'eja, am jaliaĝanec, qom auen 'noota, qama'le yataqata auen qoyelaque gaa'me nede lael jo'ne uetedaue jona'me nojo' nejaliaĝaiqui, qo'li naq'aeta da'me damajoĝolegue ca'li jodi'me jaliaĝanec Ciro qaedi qoye'et jenjo' tamenaĝaiqui. Qom paja'a 'uo joga'me auayaten, qama'le qo'mi a'uaqataĝanema.»