Esdras 4 - Toba del Oeste

Jogaa'me naute'u e'n qoyaĝañi ga'me qo'noĝotapijeguem

¹ Jogaa'me laute'u gaa'me Judá laje' nataq'aen gaa'me Benjamín laje', da'me noma'alo jogaa'me yitaĝa 'viyela', chiyoĝotegue di'me Babilonia, da'me 'noĝodijeguem ga'me tamenaĝaiqui jo'ne loĝot joñe'me Jaliaĝanec, mach'e Nedios di'me Israel,

² qama'le dajotegue di'me Zorobabel nataq'aen Josué nataq'aen gaa'me najoĝola'te gaa'me naqaya', qama'le enapega't: «Qo'mi auaje'tema qaedi ami qalecochiyalo da'me qa'noĝojeguem, qa'a da'me qo'mi jenaqa'ama da'me ami joote qauapiyenot joñe'me Anedios, jo'ne joote jauoqo qadajaqajec chiyoqo'tegue ca'li maliaĝa 'uo di'me Esarhadón, jaliaĝanec di'me Asiria, jo'ne naqaeñe qo'mi nauetequena.»

³ Qalaĝaja Zorobabel nataq'aen Josué chayovida'alo gaa'me najoĝola'te jena'me Israel laje' 'yategueta ca'li: «Ja jaqanatetaq ta'le ami qadecochaĝa'u da'me qa'noĝotapijeguem ga'me netamenaĝaiqui joñe'me Qanedios. Mach'e qo'mi qadejamaq da'me qa'noĝojeguem, qaedi janemaĝam ñe'me Dios Jaliaĝanec jenjo' Israel, qa'a naq'aeta ca'li qo'mi yamaĝalo'te ga'me Ciro, jaliaĝanec di'me Persia.»

⁴ Jogaa'me jiyaĝadipi jo'ne 'lachaqa'tedi e'n lichiguilo jogaa'me jiyaĝa'u jo'ne chiyoĝotegue di'me Judá, nataq'aen jetaque yoqolanaqate't qaedi ja t'onaĝa'n.

⁵ Nach'e ena'am yejete'n gaa'me jaliaĝanaqa, qaedi nach'e ena'am nautenalo jogaa'me Judá laje', chiyoqo'teguet ca'li 'uo da'me lejaliaĝa ñe'me Ciro di'me Persia, chayovida'a da'me male 'uo da'me lejaliaĝa ñe'me Darío di'me Persia.

⁶ Ca'li yemta da'me lejaliaĝa ñe'me Asuero, qama'le gaa'me naute'u dachinataĝalo'te gaa'me 'lachaqa't di'me Judá nataq'aen Jerusalén.

⁷ Gaa'me noloqo'ote ca'li di'me Artajerjes jaliaĝanec di'me Persia, qama'le Bislam, Mitrídates, Tabeel nataq'aen jogaa'me lecochaĝa'u yauote lediije', yamaĝata ga'me Artajerjes. Jaga'me nediije uedaye naa'me nedii's jo'ne Aram le'ec 'laqatac, nach'e ena'am uedaye gaa'me nedii's joga'me 'naqatac laqaya.

⁸ Rehúm, jo'ne naqaeñe lejaliaĝanec ga'me coicopi, choqoñe'me Simsai jo'ne nedaĝanaĝanec, yauote lediije' yamaĝata ñe'me jaliaĝanec Artajerjes, qa'a nautenalo gaa'me 'lachaqa't di'me Jerusalén.

⁹ Nach'egaua gaa'me dedaĝa'n ca'li: ñe'me Rehúm, coico le'ec lejaliaĝanec, ñe'me Simsai jo'ne nedaĝanaĝanec, nataq'aen gaa'me lecochaĝa'u, gaa'me yatenaĝanaĝayaqa, necochaĝa'u laqaya' di'me Persia, Érec, Babilonia, nataq'aen Susa, di'me aleua jo'ne Elam,

¹⁰ nataq'aen yemeda gaa'me 'nachaqa'te laqaya' jo'ne qoyaue'j ca'li, qa'a joñe'me let'adaic jaliaĝanec Asnapar, naqaeñe e'n ne'uaqa, qama'le e'n nauelo gaa'me noyaqa di'me Samaria, nataq'aen gaa'me aleua lael jo'ne ueda'ague ga'me lajego di'me ñache Éufrates.

¹¹ Qama'le janjo' jana'me nediije ca'li qoyamaĝa ñe'me jaliaĝanec Artajerjes: «Am jaliaĝanec Artajerjes, am janemaĝam nayi jenjo' qat'aqatac, da'me qo'mi mach'e adamaĝa's jo'ne jonaqa'ña jena'me chauo'o di'me ñache Éufrates.

¹² »Cha'li am ja'aĝataĝama gaa'me judiopi jo'ne queda'e ca'li di'me Babilonia qaedi dajotegue di'me Jerusalén, queda'me male 'noĝodetapijeguem ga'me noic, jo'ne ja 'noe'n jogaa'me 'lachaqa't nataq'aen qaleuaĝayaqa. Qama'le joote e'n yataqata t'añidañi gaa'me 'lachaĝala'te joga'me qo'noĝojeguem, nataq'aen yemta 'noĝodijeguem gaa'me nequepaĝanaqa'te.

¹³ Nataq'aen jenaq auayaten, qom ua'a da'me yoma't gaa'me nequepaĝanaqa'te chayovida'a ga'me noic male yem, qama'le ja jetaque yejete'n ga'me 'lachaqayaĝac lajo'vi. Chane'eja am jaliaĝanec, jaga'me anaicaua lae't qaya'te uañgui qomle.

¹⁴ Da'me qo'mi yataqata jauoqo ga'me adamajoĝonaĝac, am jaliaĝanec, qama'le ja jajenaqa'tem ta'le naq'aeta da'me am qoye'uetac qomle. Chane'eja am janemaĝam nayi jenjo' qat'aqataĝanaĝac,

¹⁵ qama'le 'noota qom male yataqata auamaĝalegue na'me adejaliaĝaiqui qaedi yataqata qoyec'ate'n gaa'me ledii's jogaa'me 'uaediñe jaliaĝanaqa jo'ne auachiyoĝogueta. Male auejomalegue queda'me jenjo' noic yataqata ja no'en, chayovida'a 'uo ca'li da'me loqolanaqa' gaa'me jaliaĝanaqa nach'e ena'ama gaa'me ale'u lael. Yataqata auejomalegue jaa'me noloqo'ote jo'ne 'uaediñe, gaa'me 'lachaqa't di'me Jerusalén joote yaqanate't da'me nauteta ga'me nejaliaĝaiqui. Yajouaĝat da'me dojo', 'uo ca'li male qoyapalaĝat jenjo' noic.

¹⁶ Qopaquetapega am jaliaĝanec, qom yitaĝa qo'noĝojeguem jena'me jenjo' noic, uotaĝa yem da'me yitaĝa qoye'et ga'me nequepaĝanaĝat, qama'le da'me am ja auaqanatet da'me anejaliaĝatelegue jena'me jenjo' aleua lae jo'ne ua'ague ga'me chauo'o ga'me ñache Éufrates.»

¹⁷ Chane'eja joñe'me jaliaĝanec 'yategueta ca'li: «Jayem jaliaĝanec Artajerjes, male jamaĝa jenjo' mach'e yep'iyenataĝanaĝac ga'me coico le'ec lejaliaĝanec Rehúm, nataq'aen ga'me nedaĝanaĝanec Simsai, nataq'aen yemeda gaa'me lecochaĝa'u, chayovida'alo yema gaa'me neteda'ña ga'me aleua jo'ne Samaria nataq'aen ga'me aleua jo'ne p'aye di'me chauo'o ga'me ñache Éufrates.

¹⁸ »Joote qodojelegue jaga'me nediije jo'ne jayem qonamaĝa ca'li qama'le jomachiya ga'me yelo'teguet.

¹⁹ Qama'le joote jamaĝajoĝolegue da'me yataqata qoyelaque da'me lajoĝoc, qama'le qauejomalegue da'me nojo' noic joote nauteta ca'li jogaa'me 'uaediñe jaliaĝanaqa, chayovida'a uetauelo gaa'me leloiquiaĝaco nataq'aen lauchiyaĝaco.

²⁰ Nataq'aen joote yataqata jayatenaq da'me nojo' Jerusalén uo'oe ca'li gaa'me jaliaĝanaqa jo'ne 'uo da'me lañoqotaĝanaĝa'j jo'ne yachalo'te ca'li gaa'me neda'ña ga'me aleua lae jo'ne chauo'o di'me ñache Éufrates, jo'ne jalcote da'me najelaĝanaĝac da'me gamachaqaega qoyen yejeten.

²¹ Chane'eja paja'a auamaqailegue da'me en qoyaĝañi joga'me qo'noĝotapijeguem ga'me noic, chayovida'a ga'me ua'a da'me yitaĝa jamaĝajoĝolegue.

²² Paja'a auauoyi jena'me jenjo' yamajoĝonaĝac, qaedi ja yitaĝa yajouaĝat jena'me jenjo' nejaliaĝaiqui.»

²³ Qampaja'a joñe'me Rehúm choqoñe'me nedaĝanaĝanec Simsai, nataq'aen yemeda jogaa'me lecochaĝa'u, da'me dojedelegue jaga'me lediije ñe'me jaliaĝanec Artajerjes, qama'le paja'a dajotegue di'me Jerusalén qama'le dojapegue'to jogaa'me judiopi qaedi yaĝadiñe joga'me 'yetedac.

²⁴ Qama'le joga'me te'me yitaĝa qo'noĝojeguem joga'me Dios 'lemec jo'ne ue'ta di'me Jerusalén, male cha'li qoyaĝañi da'me qo'noĝojeguem, chayovida'a ga'me uo'e dalaĝaic ga'me 'uo ca'li lejaliaĝaiqui ñe'me Darío, jaliaĝanec di'me Persia.