Esdras 3 - Toba del Oeste

Yitaĝa qolapaĝañi ga'me yema'a't

¹ Ca'li yovita jo'me auoĝoic jo'ne séptimo lenaĝat Etanim, gaa'me Israel lec'oqo'tepi joote yauo'oe naa'me yataqata 'lachaqa'te, qama'le yema jogaa'me male yema'a't di'me Jerusalén.

² Chane'eja Josué jo'ne c'oĝot ñe'me Josadac, chayovida'alo gaa'me lecochaĝa'u jo'ne tamenaĝaiqui lo'olpi, ena'am jodi'me Zorobabel, c'oĝot di'me Salatiel, nataq'aen gaa'me laqaya'olqa, naqaegaua 'uauteda'aguet da'me 'noĝodijeguem ga'me c'atonaĝala' jo'ne Dios loĝot, qaedi yitaĝa qoyauo'oe gaa'me najaqae's jo'ne qoyeguedoue, qa'a naq'aeta ca'li jenjo' Moisés lamajoĝonaĝac, jiyaĝaua jo'ne Dios liquiyac ca'li.

³ Ga'me c'atonaĝala' da'me 'noĝodijeguem yataqata e'n t'añañi, qa'a t'oitedaque gaa'me jiyaĝa'u jo'ne 'lachaqa'tedi, qama'le ne'teta nataq'aen javit da'me yauote lajaqaje'j jo'ne qoyegoue, yate'm joñe'me Jaliaĝanec ja 'nalegue.

⁴ Ca'li yovita ga'me nolo' jo'ne tachigui da'me yauote ga'me neualayaĝac jo'ne qonauelo jogaa'me nomachaĝaiqui', nach'ega jo'ne uaye jaga'me namajoĝonaqate jo'ne nediije, qama'le jaa'me noloqo'ote yauote lajaqaje'j jo'ne qoyegoue, ga'me yaqanate't nale joga'me nolo'.

⁵ Nach'e ena'am qoyauo'oe gaa'me najaqae's yemeda naa'me noloqo'ote, nataq'aen nale yemta auoĝoic dalaĝaic, uotaĝa gaa'me noloqo'ote jo'ne tadoue da'me ja 'nalegue leualayaĝac ñe'me Jaliaĝanec, nach'e ena'ama gaa'me 'uo nale yadegue ga'me yaqanate't da'me yate'm ñe'me Jaliaĝanec.

⁶ Joga'me 'uaeñe nolo' da'me auoĝoic jo'ne séptimo, male ua'ña da'me yauote lajaqaje'j, yate'm joñe'me Jaliaĝanec, te'me maliaĝa ja qo'noĝojeguem joñe'me tamenaĝaiqui jo'ne Jaliaĝanec ja 'nalegue loĝot.

⁷ Male qoyanema jaga'me laicaua gaa'me onataĝanaĝayaqa nataq'aen gaa'me ye't ga'me epaq nale, nataq'aen qoyanema niqui'yaĝat, naquip nataq'aen aceite gaa'me 'lachaqa't di'me Tiro nataq'aen Sidón, qaedi qonaqat ga'me epaq jo'ne lenaĝat cedro, chiyaqa'ague di'me Líbano qama'le qoyapagaĝadegue da'me qoyedotegue jodi'me Jope, qa'a naq'aeta ca'li yaje'tema ñe'me Ciro, jaliaĝanec di'me Persia.

Male qo'noĝojeguem ga'me tamenaĝaiqui

⁸ Ca'li joote yenoĝonegue ga'me onolec uo'e nataq'aen dos gaa'me auoĝoyaqa da'me novideta di'me Jerusalén jogaa'me qoye'n ne'uaqa ca'li, qama'le yemta 'noĝotedapijeguem ga'me tamenaĝaiqui jo'ne loĝot joñe'me Jaliaĝanec Dios. Qama'le Zorobabel, c'oĝot di'me Salatiel, nataq'aen Josué, c'oĝot di'me Josadac, choqogaa'me laqaya' jo'ne tamenaĝaiqui lo'ol nataq'aen gaa'me levita laje', chayovida'alo yema ga'me jiyaĝadipi, niquiyayelo gaa'me levita laje' jo'ne joote veinte gaa'me ne'uoidi, qaedi yelodelegue da'me 'nonataĝanaĝac.

⁹ Josué nataq'aen gaa'me c'oqo'te, nataq'aen gaa'me laqaya', yauote onolec da'me 'lonataĝanaĝa'j, uauelo joñe'me Cadmiel nataq'aen jogaa'me c'oqo'te jo'ne mach'e chiyoĝoteguet di'me Judá, nataq'aen gaa'me chiyoĝoteguet di'me Henadad, gaa'me c'oqo'te choqogaa'me laqaya', jo'ne ca'li mach'e levita laje', qaedi naqaenaua da'me yelodelegue gaa'me t'onataĝadoue jena'me tamenaĝaiqui Dios loĝot.

¹⁰ Ca'li gaa'me 'noĝodijeguem male ye't jaga'me p'añe jena'me tamenaĝaiqui Jaliaĝanec loĝot, qama'le gaa'me tamenaĝaiqui lo'ol yataqata nechachidiñi, yatedañe naa'me leuo lael 'lonataĝanaĝaiqui', lajoqot'alo naa'me lajeedel. Gaa'me levita laje' jo'ne chiyoĝoteguet di'me Asaf yachi'y naa'me latoviaĝanatal, qa'a male 'nonaĝachedigui ñe'me Jaliaĝanec, qa'a naq'aeta ga'me lamajoĝonaĝac ca'li di'me David, jaliaĝanec di'me Israel.

¹¹ Uo'oe jogaa'me t'onaĝa'tape, yo'o'tape gaa'me nalaco jo'ne onaĝayaqa, qama'le uo'oe gaa'me 'yadeteguet ca'li: «¡Auañem adamaiqui joñe'me Jaliaĝanec! ¡Yataqata 'noota joñe'me, qa'a nach'e eta't ja pal da'me qo'mi noqopitalo, mach'e qo'mi Israel lec'oqo'tepi!» Qama'le yema ga'me jiyaĝadipi 'nalaĝadijeguem qa'a made'tape, nataq'aen yataqata 'nonaĝachedigui ñe'me Jaliaĝanec, qa'a male yitaĝa qo'noĝotapijeguem ga'me netamenaĝaiqui.

¹² Jalcote gaa'me tamenaĝaiqui lo'olpi, gaa'me levita laje' nataq'aen gaa'me najoĝola'te jo'ne 'yaĝaicachidi, nach'egaua jo'ne yauata ca'li ga'me 'uaeñe tamenaĝaiqui, yataqata nete'n da'me noye'tape, qa'a yauata da'me yitaĝa qo'noĝojeguem jenjo' dalaĝaic tamenaĝaiqui. Nataq'aen uo'oe gaa'me 'nalaqatedapijeguem qa'a made'tape.

¹³ Qaya'te yayaten da'me dojo' lajamaĝa, qa'a yataqata jalcote jogaa'me, da'me uo'oe 'nalaqatedapijeguem, uotaĝa noye'tape, qama'le chayovida'alo gaa'me qaya'aguelo da'me qodomachiya.