Esdras 10 - Toba del Oeste

Qoyamaĝadegue ca'li gaa'me yauo' jo'ne ja 'lachaqa'tedi

¹ Ca'li maliaĝa yejoquetedañe naa'me leliquetel ñe'me Esdras, dajoya'uet joga'me netamenaĝaiqui joñe'me Dios da'me 'yaĝatetac joga'me loec ga'me noic, qama'le jalcote gaa'me jiyaĝadipi qoyema'a ca'li, choqogaa'me yauodipi nataq'aen ñoqolqapi, jalcote da'me noenaĝa'j, qa'a yataqata totelo'te.

² Qama'le joñe'me Secanías, c'oĝot joñe'me Jehiel, mach'e chiyoĝoguet di'me Elam, male dojapegue' ñe'me Esdras, enaac: «Da'me qo'mi yataqata ñautenaĝa joñe'me Qanedios ca'li jenaq qadoua' naa'me naajo' yauo' jo'ne yaqa'alo da'me chiyoĝoguelo gaa'me ale'u lael, jo'ne yataqata uo'oe naa'me mach'e p'iya'alo. Qalaĝaja da'me qo'mi Israel laje'pi maliaĝa 'uo joga'me qadeuataqataĝanaĝac joñe'me Qanedios.

³ Jenaĝa yepaquichigui ga'me qa'uaĝatem joñe'me Qanedios, qaedi male jamaĝajoĝodegue naa'me naajo' yauo' nataq'aen jogaa'me c'oqo'te. Yataqata jauoqo qomle joga'me qo'mi auamaĝalo'te, chayovida'a joga'me laqataĝa'j jogaa'me que'teguelo gaa'me lamajoĝonaĝaco joñe'me Qanedios. ¡Yataqata joqochaĝa nayi jaga'me lediije joñe'me Jaliaĝanec!

⁴ Oñejeguem nayi, qa'a jena'me jenjo' nach'ena yataqata qoyen at'onatac, qama'le da'me qo'mi yataqata am yecochaĝa. ¡A'nañaĝadijeguem qama'le aue'et!»

⁵ Qama'le joñe'me Esdras male ñejeguem ca'li, qama'le yiyaĝanalo jogaa'me lajoĝola'te gaa'me tamenaĝaiqui lo'olpi, chayovida'alo gaa'me levita laje' nataq'aen yemeda jogaa'me Israel lec'oqo'tepi, qaedi yataqata eja joga'me laqataĝa'j ca'li jetaque yauote; qama'le yemeda jogaa'me etedapega yauote jenjo'.

⁶ Yem ca'li joñe'me Esdras male yenoĝonegue, ca'e joga'me tamenaĝaiqui jo'ne Dios loĝot, qama'le yec'ata joga'me uetapegoue ga'me Johanán, c'oĝot ñe'me Eliasib, qama'le ua'ña jo'me pi'yaq. Yataqata totelegue qa'a yajouaĝat ga'me nautenaĝa'j jogaa'me ca'li chiyoĝotegue di'me Babilonia, qama'le joñe'me yataqata ja deque'e nataq'aen ja niyom.

⁷ Chane'eja male qoya'uo joga'me namajoĝonaĝac jo'ne qoyanema gaa'me chiyoĝotegue di'me Babilonia jo'ne ueteda'ña di'me noic Jerusalén nataq'aen yema ga'me aleua jo'ne Judá, qaedi 'noota ta'le qoya'uo nojaĝac, qoyacha'ña di'me Jerusalén.

⁸ Gaa'me najoĝola'te nataq'aen gaa'me paĝaguenataĝanaĝayaqa dojedapegue' joga'me jiyaĝadipi qaedi gamachaqaega joga'me jo'ne ja yec'ata qoyen nalo'taguet tres gaa'me noloqo'ote, qama'le qoyamaĝaye, qoye'n ca'ae jogaa'me chiyoĝotegue di'me Babilonia, chayovida'a yataqata qodoĝotaĝanec yema joga'me yauana.

⁹ Chane'eja ca'li yenoĝodegue tres gaa'me noloqo'ote, male yauote da'me lojaĝac di'me Jerusalén. Yemeda jogaa'me jiyaĝadipi jo'ne chiyoĝoteguet di'me Judá nataq'aen di'me 'naleua gaa'me lec'oqo'tepi di'me Benjamín, nolo' jo'ne veinte, auoĝoic jo'ne noveno, ca'li male yema ñichidiñe joga'me nejapichaqa' jo'ne na'ña lae di'me tamenaĝaiqui jo'ne Dios loĝot. Yataqata 'uo da'me loqolanaqa't yajouaĝat joga'me 'laqatac ñe'me Secanías ca'li yataqata qot'oiya, nataq'aen male 'uo joga'me uotep let'adaic.

¹⁰ Joñe'me tamenaĝaiqui lo'o Esdras male ñejeguem qama'le enaac: «Ami yataqata joote anaucheñiya joñe'me Dios ca'li aueñi' adouadi' naa'me naajo' yauo' jo'ne yaqa'alo da'me chiyoĝoguelo gaa'me ale'u lael. Qama'le aueñi nichiguegue da'me lajouaĝajet jena'me jenjo' noic mach'e Israel.

¹¹ Chane'eja mach'e ami anayachiñela't da'me yataqata jalcote joga'me ja no'en jo'ne at'onataqui, joote ami yec'ate'tape joñe'me Jaliaĝanec mach'e Nedios dia'me qadamol ca'li. 'Noota qom yataqata auoqochiiya joñe'me, qama'le oquiya'ae gaa'me jiyaĝa'u jo'ne yaqa'alo da'me chiyoĝoguelo gaa'me ale'u lael, chayovida'alo jogaa'me yauo' jo'ne aueñi' adouadi'.»

¹² Qama'le yema jogaa'me jiyaĝadipi ca'li ue'ta joga'me yauote 'laqata'j, yataqata nete'n: «Yataqata 'noota, jauoqo qomle joga'me auepaquetapega.

¹³ Qalaĝaja qo'mi jalcote jo'ne jouaqa'tena nataq'aen yataqata 'uo jena'me uotep nayi, qama'le ja jaqanatetaq ta'le jouaqa'ta jena'me naq'aic. Qo'mi jalcote jo'ne jauoqo da'me dojo' jo'ne qanautenaĝac, qama'le ja nach'edata da'me nalo'taguet dos gaa'me noloqo'ote qaedi maqachaĝa qoyauana ladic da'me qoyen yem jena'me jenjo'.

¹⁴ Yataqata 'noota ta'le jogaa'me qadajoĝola'te cha'li uetede'ena jena'me Jerusalén, qaedi mach'egaua dojedapiye jena'me jenjo' qadaviyaĝajet. Yem qama'le 'uo joga'me ua'a qama'le novi't jogaa'me jiyaĝa'u jo'ne uo'oe gaa'me loua' jo'ne yoda'alo, naequetapegue'to jogaa'me paĝaguenataĝanaĝayaqa chayovida'alo jogaa'me yatenaĝanaĝayaqa jo'ne yauote nec'atenaĝanaĝac nale. Qom naq'aeta da'me jauoqo qama'le maqachaĝa noqochiñe q'aen da'me lalemataic joñe'me mach'e Qanedios, qa'a chiyaqayi jena'me jenjo' qadoec da'me qo'mi dalematayalo.»

¹⁵ Nach'eñeta joñe'me Jonatán, c'oĝot joñe'me Asael, nataq'aen joñe'me Jahazías, c'oĝot joñe'me Ticvá, ja yiyamaĝade'n da'me dojo', nataq'aen 'uo joñe'me uaĝayeta jo'ne Mesulam nataq'aen joñe'me Sabtai jo'ne levita laje'.

¹⁶ Chane'eja naq'aeta da'me yauote jogaa'me chiyoĝotegue di'me Babilonia ca'li. Joñe'me tamenaĝaiqui lo'o Esdras yiyaĝanalo jogaa'me jo'ne lajoĝola'te gaa'me noyaqa, qaedi yataqata yec'ate'n naajo' jo'ne uo'oe. Qama'le chiyoqotelegue jo'me nolo' jo'ne 'uaeñe, auoĝoic jo'ne décimo, da'me male t'onataĝa'n,

¹⁷ chayovida'a jo'me nolo' jo'ne 'uaeñe, auoĝoic jo'ne 'uaechiñe, uo'e ca'li dalaĝaic, qama'le maqachaĝa qoye'et da'me yema qoyayate'n gaa'me jiyaĝadipi jo'ne yoda'alo gaa'me loua'.

Naa'me lenaqa'te gaa'me jo'ne yoda'alo gaa'me loua'

¹⁸ Naajo' naa'me lenaqa'te gaa'me tamenaĝaiqui lo'ol jo'ne yoda'alo gaa'me loua': Gaa'me chiyoĝoteguet di'me Josué, c'oĝot di'me Josadac nataq'aen gaa'me laqaya': Maaseías, Eliézer, Jarib nataq'aen Guedalías.

¹⁹ Nach'egaua yataqata e'n yepaquichigui da'me male yamaĝadegue jogaa'me loua', qama'le onolqa'tape ya'uo lajaqajec jo'ne penaq qaedi male qoyapalaĝat ga'me lejamaĝataĝac.

²⁰ Gaa'me chiyoĝoteguet di'me Imer: Hananí nataq'aen Zebadías.

²¹ Gaa'me chiyoĝoteguet di'me Harim: Maaseías, Elías, Semaías, Jehiel nataq'aen Ozías.

²² Gaa'me chiyoĝoteguet di'me Pashur: Elioenai, Maaseías, Ismael, Natanael, Jozabad nataq'aen Elasá.

²³ Lenaqa'te gaa'me chiyoĝogueta gaa'me levita laje': Jozabad, Simí, Quelaías (lenaĝat laqaya jo'ne Quelitá), Petahías, Judá nataq'aen Eliézer.

²⁴ Ga'me onolec jo'ne onaĝanaĝaic: Eliasib. Gaa'me jom lo'ol ga'me tamenaĝaiqui: Salum, Télem nataq'aen Urí.

²⁵ Naa'me naajo' jiyaĝa'u laqaya' jo'ne nataq'aen e'n loua' ca'li gaa'me yauo' jo'ne yaqa'a ga'me 'lachaqa't: Gaa'me chiyoĝoteguet di'me Parós: Ramías, Jezías, Malquías, Mijamín, Eleazar, Malquías nataq'aen Benaías.

²⁶ Jogaa'me chiyoĝoteguet di'me Elam: Matanías, Zacarías, Jehiel, Abdí, Jeremot nataq'aen Elías.

²⁷ Gaa'me chiyoĝoteguet di'me Zatú: Elioenai, Eliasib, Matanías, Jeremot, Zabad nataq'aen Azizá.

²⁸ Gaa'me chiyoĝoteguet di'me Bebai: Johanán, Hananías, Zabai nataq'aen Atlai.

²⁹ Gaa'me chiyoĝoteguet di'me Baní: Mesulam, Maluc, Adaías, Jasub, Seal nataq'aen Ramot.

³⁰ Gaa'me chiyoĝoteguet di'me Pahat-moab: Adná, Quelal, Benaías, Maaseías, Matanías, Besalel, Binuy nataq'aen Manasés.

³¹ Gaa'me chiyoĝoteguet di'me Harim: Eliézer, Isías, Malquías, Semaías, Simeón,

³² Benjamín, Maluc nataq'aen Semarías.

³³ Gaa'me chiyoĝoteguet di'me Hasum: Matenai, Matatá, Zabad, Elifélet, Jeremai, Manasés nataq'aen Simí.

³⁴ Gaa'me chiyoĝoteguet di'me Baní: Madai, Amram, Uel,

³⁵ Benaías, Bedías, Queluhu,

³⁶ Vanías, Meremot, Eliasib,

³⁷ Matanías, Matenai nataq'aen Jaasai.

³⁸ Gaa'me chiyoĝoteguet di'me Binuy: Simí,

³⁹ Selemías, Natán, Adaías,

⁴⁰ Macnadbai, Sasai, Sarai,

⁴¹ Azarel, Selemías, Semarías,

⁴² Salum, Amarías nataq'aen José.

⁴³ Gaa'me chiyoĝoteguet di'me Nebo: Jeiel, Matatías, Zabad, Zebiná, Jadau, Joel nataq'aen Benaías.

⁴⁴ Yemeda naa'me naajo' ca'li yoda'alo gaa'me loua' jo'ne yaqa'a di'me 'lachaqa't, qama'le ua'a ca'li male yegue'm jogaa'me choqogaa'me c'oqo'te.