Amós 9 - Toba del Oeste

Qaya'te nepaten da'me lec'atenaĝanaĝac joñe'me Jaliaĝanec

¹ Jauana joñe'me Jaliaĝanec ue'ta joga'me tamenaqa', qama'le jayem dojapegue', enaac: «¡A'uaĝan ga'me p'ajeguem jena'me ñetamenaĝaiqui, qaedi yema nemañe, qama'le qoyep'aĝadiñe ga'me jiyaĝadipi! Qom uo'oe jogaa'me te'me nec'aletedaye, naqaegaua qomle qoyedo'oque ga'me yataqata yaic yedaĝanaĝat. Te'me jetaque dajodegue, qalaĝaja yataqata qaya'te nec'aletaye qomle.

² Te'me tadoue jena'me aleua lauel da'me nañoĝochidiñe, qalaĝaja jauanalo qomle; uotaĝa te'me dajotegue jena'me piyem, qalaĝaja ñenotaĝadiñe qomle.

³ Uotaĝa jetaque nañoĝochidiñe di'me p'ajeguem jenjo' qajoĝonaĝa jo'ne lenaĝat Carmelo, qalaĝaja qomle jajoyilo; uotaĝa tadiñgui joga'me noĝop laeñi, qama'le jamaq joñe'me jiyac jo'ne noĝop le'ec, qama'le jen yalic qomle.

⁴ Nataq'aen qom qoyaueta ga'me ja 'lachaqa't, quetapegue'to jogaa'me laute'u, qama'le jena'me yedaĝanaĝat jamaq qomle qama'le yala't jogaa'me. ¡Nach'e eta't da'me jauanalo jogaa'me, qalaĝaja ja jachetalo'te da'me 'noota, maq joda'me ja no'en!»

⁵ Joñe'me Jaliaĝanec jo'ne napacalegue ena'uac pelegue jena'me aleua qama'le jenjo' aleua yataqata deda nale, chayovida'a yema noye'n jogaa'me neteda'ña. Jena'me aleua qa'a nichijeguem nale, nataq'aen eyelaĝañe joga'me, ena'am nale nichijeguem uotaĝa nichiiñe di'me ñache let'adaic jo'ne Nilo.

⁶ Qa'a ñe'me Jaliaĝanec yana'ña ga'me 'lachaqa' di'me piyem, qama'le di'me laqauaejeguem jo'ne malaĝadaic en lapadenaĝat jena'me aleua. Yiyaĝana nale joga'me ñache let'a, qama'le en laguelegue ga'me noĝop jena'me aleua. ¡Nach'eñe joñe'me Jaliaĝanec jo'ne ye'et yema da'me dojo'!

⁷ Naq'aeta ca'li nenaĝategue joñe'me Jaliaĝanec: «Ami Israel laje'pi, nayi yataqata qaya'te jiyota'a da'me ami, uotaĝa jogaa'me 'lachaqa't di'me Etiopía. Ena'am ca'li ami jachiyoĝoteda'ague jodi'me Egipto, nataq'aen ca'li ñauela'ajalo gaa'me filisteopi jo'ne ueteda'a di'me Creta, uotaĝa jogaa'me Aram laje'pi ca'li ueteda'a di'me Quir.»

⁸ Joñe'me Jaliaĝanec yec'atetac jenjo' nejaliaĝa jo'ne yataqata 'uo da'me loec, qama'le enaac: «Yataqata japalaĝat qomle jenjo' jo'ne ue'ta na'me aleua, qalaĝaja ja yema ta'le japalaĝat ga'me lec'oqo'tepi di'me Jacob. Naq'aeta jenjo' 'yaqatac, jayem jo'ne Jaliaĝanec ja 'nalegue.

⁹ Nayi qama'le yataqata jiyamaĝachiñi jenjo' 'nachaqa' jo'ne ue'ta jenjo' Israel laje'pi, qama'le yitaĝa chimaqachiñe qomle, ena'am nale qonaqat jaga'me trigo jala, qama'le qoyiyamaĝat nale, chayovida'a yataqata qaga'te onole peta ta'le ch'e 'naqañe.

¹⁰ Yema jogaa'me loeco lo'ol jo'ne uetedaue jenjo' yalaqapi qomle yele'u jogaa'me, qa'a yedo'oque ñe'me yedaĝanaĝat jo'ne yataqata yayaqa naa'me lia'a: yema jogaa'me nenaĝatedegue nale: “Qa'a jenjo' ja eja: qaya'te ja no'en ta'le qo'mi yedalo'te”.

Qomle yitaĝa qoyiyamaĝatetac jodi'me Israel

¹¹ »Na'taquena ga'me nolo' qomle yitaĝa jiyamaĝachiñi di'me lomachaqa' di'me jaliaĝanec David. Yitaĝa ñauela, jo'oĝon joga'me dola, qama'le yitaĝa jen ena'am ca'li yemta 'uo jenjo' 'lachaqa'.

¹² Qama'le joga'me maliaĝa 'uo jodi'me Edom, chayovida'alo yemeda jogaa'me 'nachaqa'te jo'ne yoqo'te ca'li, yitaĝa loqo'te qomle ñe'me Israel.» Naq'aeta naajo' 'laqataqa joñe'me Jaliaĝanec, qama'le eja yepaquichiguilo qomle.

¹³ «Nateda'aquena naa'me noloqo'ote da'me maliaĝa 'uo ga'me naqataĝanaĝac jenjo' nanec jo'ne trigo jala, qom te'me laloqo' da'me qonajeguelegue jenjo' nanaĝanaqa'; nataq'aen 'uo joga'me uo'e da'me yataqata jalcote jaga'me uva, ch'e qopelegue jaga'me lae, qama'le te'me laloqo' da'me qoyaañi joga'me trigo jala. Jena'me qajoĝonaĝa uotaĝa comadaĝa ta'ya joga'me lataĝa, ena'am joga'me noĝop: yataqata jalcote.

¹⁴ Qama'le jachiyoĝo'tague di'me aleua jo'ne ja 'lachaqa't ga'me yalaqapi jo'ne Israel laje'pi. Qama'le yitaĝa ye't qomle dia'me noyaqa jo'ne te'me dola'y ca'li, chayovida'a yitaĝa neda'ña. Yitaĝa yauote lanaĝanaqa't jo'ne uva lichidijat, qama'le niyomidigui joga'me lataĝa; nataq'aen yauote noqop'adichi qama'le joga'me lanec naqaega yali'j qomle.

¹⁵ Qa'a yitaĝa jaalo'te jogaa'me mach'e yataqata 'lachaqa't, qama'le ja yitaĝa ta'le qonaqa't qomle jenjo' aleua ca'li jo'ne janema.» Naq'aeta jenjo' 'laqatac joñe'me Dios mach'e Jaliaĝanec.