Amós 7 - Toba del Oeste

Nauanaĝanaĝac jo'ne uo'oe jogaa'me qojequioĝoel

¹ Jenjo' ca'li joga'me jayem yaloĝonec ñe'me Jaliaĝanec: ca'li te'me paja'a 'uo joga'me nanec jo'ne p'ategue, nale joote yem da'me qodaqataĝan qaedi 'uo ga'me qoyanem joñe'me yelolo'te joga'me jiyaĝadipi, qama'le joñe'me Jaliaĝanec jalcote ga'me lalodi jo'ne qojequioĝoe.

² Chane'eja ca'li jauana joga'me qojequioĝoe da'me yema yalic ga'me nanec, qama'le jojapegue' joñe'me Jaliaĝanec, jenaac: «¡Am Jaliaĝanec, qo'mi avichoĝode'n! ¿Toqoch'e auetapega am nalo'taguet joga'me adayi jo'ne Jacob lec'oqo'tepi, da'me yataqata jaleca?»

³ Qampaja'a ñe'me Jaliaĝanec yaĝañi joga'me te'me 'yeteque, qama'le enaac: «¡Jenjo' male ja di'yoq qomle!»

Nauanaĝanaĝac joga'me dole'

⁴ Jenjo' ca'li ga'me jayem yaloĝonec joñe'me Jaliaĝanec: jauana joga'me dole' da'me 'naqañe jo'ne en daqaqa ga'me ñache let'a, jo'ne nataq'aen en pa'l gaa'me nanaĝanaqa'te.

⁵ Qama'le jenaac: «¡Cha'li ena'te aua'uo jena'me jenjo', am Jaliaĝanec! ¿Toqoch'e auetapega am nalo'taguet jenjo' noic jo'ne Jacob lec'oqo'tepi, da'me yataqata jaleca?»

⁶ Qama'le joñe'me Jaliaĝanec yitaĝa ja ya'uo jena'me jenjo' ca'li, qama'le enaac: «Yataqata ja ja'uo qomle jena'me jenjo'.»

Nauanaĝanaĝac jo'ne 'uo joga'me naloqotenaĝanaĝat

⁷ Joñe'me Jaliaĝanec nataq'aen jayem yaloĝona ca'li jenjo': jauana joñe'me ue'tajop joga'me lae ga'me nequepaĝanaĝat, qama'le jauana da'me lajoqot'a joga'me 'nonataĝanaĝat jo'ne naloqotenaĝanaĝat.

⁸ Qama'le jayem yenat: «Amós, ¿jach'e ga'me auana?» Qama'le jenaac: «Jauana ga'me 'nonataĝanaĝat jo'ne emec lo'o.» Qama'le jayem 'yateguet: «Nayi da'me male 'uo jenjo' 'nonataĝanaĝat, qama'le yataqata jayaten qomle da'me en nejiyaĝauayaĝa'j jenjo' yalaqapi jo'ne Israel lec'oqo'tepi. Male ja yitaĝa ta'le jichoĝode'n qomle.

⁹ Gaa'me netamenaqa'te di'me Isaac male yataqata qoyapalaĝa't qomle, chayovida'alo gaa'me tamenaĝaiqui' di'me Israel yataqata qoyolaĝachiguilo qomle. Qama'le ñodijeguem jena'me yedaĝanaĝat da'me ñautenalo joga'me layi di'me Jeroboam.»

Amós ma'te necotayapegue' ñe'me Amasías

¹⁰ Amasías jo'ne tamenaĝaiqui lo'o ca'li di'me noic Betel yamaĝa ca'li ga'me 'laqatac ñe'me Jeroboam jo'ne jaliaĝanec di'me Israel, enaac: «Am jaliaĝanec, ñe'me Amós quetaue joga'me jiyaĝadipi jo'ne Israel lec'oqo'tepi, yataqata am nautena. Jena'me jenjo' qat'achaqa' yataqata qonouala nayi da'me lojaĝac.

¹¹ Qa'a joñe'me eetac nale: “Joñe'me Jeroboam male yeleu qomle, qoyedo'oc joga'me nedaĝanaĝat yataqata yaic, chayovida'a yema jena'me Israel c'oqo'tepi qoyaueta qomle ga'me ja 'lachaqa't.”»

¹² Qama'le Amasías jayem yamaĝalegue ca'li jenjo' 'laqatac, enaac: «¡Am jo'ne auetapela't aqataĝanaĝaic, oca'e qomle jena'me jenjo' Betel! Qom jetaque maliaĝa anec'aletaye da'me a'uaĝatetac da'me Dios 'laqataĝanaĝac, qama'le auajoyi di'me aleua Judá.

¹³ Ja jetaque da'me yitaĝa auapaĝaguenataĝan nayi jena'me jenjo' Betel, qa'a nach'ena netamenaqa' ñe'me qadajoĝola', nataq'aen mach'e netamenaĝaiqui' yema ga'me Israel laje'pi.»

¹⁴ Qalaĝaja ja'ateguet ca'li: «Ja jayem 'te aqataĝanaĝaic, uotaĝa ta'le jachiyoĝogueta gaa'me Dios 'laqatanaĝanaĝanaqa. Nach'edata da'me jo'onataĝatac da'me jetela jena'me 'nanaĝate, nataq'aen jaliquetac nale jana'me higo jo'ne uaue jena'me viaq.

¹⁵ Qalaĝaja joñe'me Jaliaĝanec Dios en jaĝañi da'me jetela jana'me 'nanaĝate, qama'le jayem dojapegue', enaac ca'li: “Oc qomle, auec'ata jena'me yalaqapi jo'ne Israel laje'pi, qama'le a'uaĝatetac da'me 'yaqataĝanaĝac”.

¹⁶ »Chane'eja 'noota qom anaquiaĝana da'me 'laqatac joñe'me Jaliaĝanec. Da'me am male auenaac: “Ena'te a'uaĝatetac da'me 'laqataĝanaĝac joñe'me Dios, qaedi ja qonautena jena'me Israel laje'pi, uotaĝa ta'le auepoleguelo'te ga'me lec'oqo'tepi di'me Isaac”.

¹⁷ Qalaĝaja naq'aeta ca'li jena'me jenjo' 'laqatac joñe'me Jaliaĝanec Dios: “Jana'me adoua yataqata yequejeguet qomle da'me ue'ta jena'me jenjo' noic, qama'le naa'me ac'oqo'te chayovida'alo naa'me ac'oqotel yataqata qoyala't qomle. Yataqata qonalichiguilo qomle naa'me a'nale'u. Da'me am qamqa'me oue'ta qomle di'me aleua jo'ne qaya'ague da'me adeleu. Qama'le jena'me Israel lec'oqo'tepi yataqata qoye'n neua'ac qomle, qaya'ague joga'me qoyauega q'ae'n.”»