Amós 6 - Toba del Oeste

Male qoyapalaĝat qomle jodi'me Israel

¹ ¡Yataqata 'uo da'me adachoĝodequi qomle, da'me ami jo'ne machidiñe da'me oñita'ña di'me Sión uotaĝa di'me Samaria! Yataqata 'uo da'me adachoĝodequi qomle, da'me ami najoĝola'te jena'me jenjo' aleua jo'ne 'uo da'me lejaliaĝa, jo'ne ami yec'atalo nale jogaa'me Israel laje'pi!

² Auec'achiya nayi di'me noic jo'ne Calné, qama'le yataqata auec'achiñe; yem qama'le auec'achiya jodi'me Hamat jo'ne yataqata let'adaic; yem qama'le auec'achiya di'me Gat jo'ne filisteopi loĝot. ¿Qo'li aueñetapega anapaquiyalo'te naa'me naajo' noyaqa? Jena'me jenjo' a'naleuai, ¿qo'li aueñetapega yataqata p'ajaye?

³ Qama'le da'me ami ja jetaque auenache'ta joga'me nolo' jo'ne ja no'en qomle, qalaĝaja joote ovitaue jena'me nejaliaĝa jo'ne neloiquiaĝac.

⁴ Yataqata onaĝaic jona'me adejaliaĝaiquii nale qoya'uo neualayaĝac; yataqata t'adaic joga'me qoyalic ga'me 'nanaĝate c'oĝot nataq'aen joga'me uaca c'oĝot jo'ne yataqata piyo.

⁵ Nale auajediiye jaga'me najeede qama'le yataqata ja natenegue da'me lajamaĝa; jetaque auadenaĝachi di'me David, qalaĝaja ja aueñiya'am da'me leviquinaĝanaĝac.

⁶ Yataqata lat'edael jogaa'me niyomaĝaiqui' nale niyomidigui joga'me lataĝa; joga'me neyoĝoqui' yataqata jama joga'me laeta, qalaĝaja ja uenateteda'a ga'me lachoĝodec jena'me jenjo' 'lachaqa't.

⁷ Ami jo'ne a'uavichiñe da'me ami qoyaueta ga'me ja at'achaqadi', qama'le yem da'me lajamaĝa da'me neualayaĝac.

⁸ Joñe'me Jaliaĝanec jo'ne napacalegue ena'uac, naq'aeta joga'me nenaĝategue jo'ne 'naĝataĝac: «Yataqata jiquiya'a da'me ni'yoĝodenaĝa'j jena'me Jacob c'oqo'tepi; chayovida'a ja joqopitalo gaa'me nejaliaĝaiqui'; qama'le janem qomle jenjo' noic jogaa'me adaute'udi': yataqata jen capegue'to yema gaa'me neteda'ña.»

⁹ Chane'eja, qom maliaĝa uo'oe gaa'me diez da'me uetedaue ga'me 'nachaqa' da'me te'me qonec'alaĝatedegue, qama'le naajo' nach'e ena'am yele'u qomle.

¹⁰ Qama'le naqaena qomle da'me qoyauana: 'uo qomle ga'me jiyaĝaua naqategue ga'me lapat joga'me laqaya jo'ne joote yeleu, qama'le dojapegue' joga'me laqaya jo'ne netaue jo'me 'nachaqa': «¿Qo'li maliaĝa 'uo joga'me am ue'tajop?» Qama'le ga'me laqaya 'yateguet qomle: «Qaya.» Qama'le ga'me 'uaeñe male 'yateguet: «¡Cha'li at'emaqata: ja 'noota ta'le anenaĝategue da'me lenaĝat ñe'me Jaliaĝanec!»

¹¹ Qa'a joñe'me Jaliaĝanec ya'uo qomle lec'atenaĝanaĝac gaa'me 'nachaqa'te t'adayaqa nataq'aen jogaa'me emaqa jaleca'y, qama'le yemeda naa'me naajo' qoyolaĝachiguilo qomle.

¹² ¿Qo'li yaqanate't gaa'me pe'ga naqalegoĝodelegue gaa'me qadi, uotaĝa qoyaqanatet ta'le qonajeguelegue joga'me noĝop? ¡Qalaĝaja da'me ami, joga'me te'me 'noota ladic, ma'te aueñi dedonataĝan, nach'ena jenjo' chiyaqayi da'me qoyen aloqota q'aen!

¹³ Aueñetapega ami made'tape, qalaĝaja ja naq'aeta; anenaĝachiyegue jenjo' nale: «Chiyaqayi da'me qat'añaĝac qama'le nayi yataqata qo'mi qot'oiyalo.»

¹⁴ Qalaĝaja cha'li yataqata auec'achiñe jenjo', ami Israel laje'pi. Joñe'me Jaliaĝanec jo'ne napacalegue ena'uac nenaĝategue jenjo': «'Uo qomle joga'me ami janema, jo'ne yataqata jen ami qonoma't, yema joga'me ua'ague di'me chaĝajo'ma, chayovida'alo jogaa'me ueda'ague di'me chaje'ma.»