Amós 3 - Toba del Oeste

Dios yaqateque ga'me Israel laje'pi da'me ye'uaĝa'n qomle

¹ Ami Israel lec'oqo'tepi, anaquiaĝañiya ñe'me Jaliaĝanec, nach'eñe jo'ne ami naqa't joca'li ami ne'uaqa di'me Egipto:

² «Naqa'ami da'me jen ami yiquiyaqa, ja auañiya'ama gaa'me noyaqa laqaya'. Chane'eja yataqata ami je'uaĝa'n qomle, yajouaĝat jogaa'me adoecodi' jo'ne auauoyi' nale.»

³ Qom naequetapega't gaa'me dos, qa'a yajouaĝat da'me joote nayatena't.

⁴ Nale t'oqo ga'me jauaĝaic, qa'a 'uo joga'me loĝonec; qom de'uotac, qa'a 'uo ga'me yaliquetac.

⁵ Nataq'aen nale nachiñi joga'me mayo' qa'a yajouaĝat da'me qoya'uo jaga'me napogoqotaĝanaqate, qama'le yacha'a't nale 'uo ga'me pichiñgui.

⁶ Nale qodomachiya jaga'me najeede qama'le joga'me jiyaĝadipi male jalilegue. Qom 'uo joga'me ja no'en jo'ne ualegue joga'me noic, qama'le yajouaĝat da'me nach'eñe ñe'me Jaliaĝanec ya'uo jena'me jenjo'.

⁷ Qa'a joñe'me Jaliaĝanec, qom 'uo joga'me jetaque ya'uo, qama'le 'uaeñe da'me yaloĝonalo joñaa'me lamaĝa's jo'ne 'laqatanaĝanaĝanaqa.

⁸ Qom t'oqo ñe'me jauaĝaic, ¿jach'e ga'me ja do'e? Nataq'aen qom doje joñe'me Jaliaĝanec, ¿jach'e ga'me aqataĝanaĝaic jo'ne ja 'yaĝatetac?

Qoyapalaĝat qomle di'me Samaria

⁹ A'uaqataĝañiyema qomle jogaa'me neteda'ña na'me nejaliaĝaiqui di'me noic Asdod, nataq'aen naa'me nejaliaĝaiqui' jodi'me Egipto: «Anec'achiyalo naa'me qajoĝona'a di'me Samaria, qaedi auañiya joga'me ja nalemaĝa, qa'a jenjo' ue'ta da'me neloiquiaĝac.»

¹⁰ Yataqata nenaĝategue jenjo' joñe'me Jaliaĝanec: «Naa'me naajo' ja yayate'n ta'le e'n chimaqachidiñe jogaa'me lelnataĝaco, qa'a yiyamaĝatetedac joga'me yauata jo'ne ch'e lecachaĝa't ca'li.»

¹¹ Qama'le joñe'me Jaliaĝanec mach'e Dios nenaĝategue jenjo': «Uo'oe qomle joga'me adaute'upi coletedapejop ga'me at'achaqadi': ami yaloĝonalo da'me 'lañaĝa'j, qama'le yema yacota, yema joga'me uetauelo naa'me adejaliaĝaiqui'.»

¹² 'Laqatac joñe'me Jaliaĝanec: «Ena'am nale ga'me 'nanaĝate nouatoqo't jetaque nec'alaĝategue jaga'me 'nanaĝate nale jauaĝaic yipaĝata, qalaĝaja nach'edata da'me qodoĝotaĝaneque dojolqa naa'me lapia'te uotaĝa jaga'me lequetela, qama'le naq'aeta da'me te'me qonec'alaĝatedegue qomle ga'me Israel lec'oqo'tepi jo'ne 'lachaqa't di'me Samaria: nach'edata da'me qoyachi joga'me onolec nela' liche, uotaĝa joga'me lapiaĝala' lae.»

¹³ Joñe'me Jaliaĝanec jo'ne napacalegue ena'uac nenaĝategue ca'li jenjo': «Auomachiiya jenjo', qama'le a'uaĝachitac di'me noic jo'ne Jacob lec'oqo'tepi.

¹⁴ Qa'a qom ua'a da'me ja'uo yec'atenaĝanaĝac ga'me Israel laje'pi yajouaĝat jogaa'me 'lonataqa jo'ne ja 'noe'n, qama'le yataqata japalaĝa't jogaa'me c'atonaĝala'te di'me noic jo'ne lenaĝat Betel. Nataq'aen gaa'me lepeel di'me c'atonaĝala' male qoyichaĝadegue qama'le tadi'ña jena'me aleua.

¹⁵ Jolaĝachiguilo gaa'me emaqa jo'ne nauelo nale naqaviaĝa uotaĝa nepi'yaĝa. Male jen qayaua gaa'me 'nachaqa'te jo'ne 'uo ga'me li'yoĝodaĝat jo'ne chiyaqayi ga'me marfil, chayovida'a yataqata jen pa'l jogaa'me nejaliaĝaiqui'.» Naq'aeta jena'me 'laqatac joñe'me Jaliaĝanec.