Amós 2 - Toba del Oeste

¹ Nach'e ena'am yitaĝa ya'uo da'me 'laqatac ñe'me Jaliaĝanec, enaac: «Jogaa'me neteda'ña di'me Moab, yataqata jalcote da'me 'lonata'j jo'ne ja no'en. Chane'eja male jaje'tema da'me ne'uaĝanague'j, qa'a yegouelo ca'li gaa'me p'inaqa di'me lejaliaĝanec ga'me Edom laje'pi, chayovida'a da'me yataqata lojoche.

² Chane'eja jegouelo qomle gaa'me noyaqa di'me Moab, nataq'aen jen yavi'j qomle gaa'me lejaliaĝaiqui' di'me aleua jo'ne Queriot. Chane'eja nach'edi di'me ua'a ga'me nalada't, qama'le chimaqapi'ña qomle ga'me 'loĝoyaĝac, choqoga'me lajamaĝa jaga'me najeede, qa'a male yele'u jogaa'me Moab laje'pi.

³ Male joĝotaĝanec qomle ga'me noic ga'me lajoĝola' qama'le jalat, nach'e ena'ama gaa'me lecochaĝa'u. ¡Qaya'te yaqanatet ta'le qonec'alaĝategue!» Naq'aeta jenjo' 'laqatac ñe'me Jaliaĝanec.

⁴ Nach'e ena'am ya'uo da'me 'laqatac ñe'me Jaliaĝanec, enaac: «Da'me Judá laje'pi, yataqata jalcote da'me 'lonata'j jo'ne ja no'en. Chane'eja male jaje'tema da'me ne'uaĝanague'j, qa'a 'yota'n ca'li da'me yapaĝaguenataĝanaĝac, nataq'aen ja yoqocha'alo daa'me yamajoĝonaĝaco. Nataq'aen netamenoto gaa'me qop'iyapegalo jo'ne ja ejoda, jo'ne nach'e ena'am netamenoto ca'li jodia'me let'al.

⁵ Chane'eja jegouelo qomle gaa'me noyaqa di'me Judá, nataq'aen jen yavi'j qomle gaa'me lejaliaĝaiqui' di'me noic let'adaic Jerusalén.»

Qoya'uo nec'atenaĝanaĝac ga'me Israel

⁶ Nach'e ena'am ya'uo da'me 'laqatac ñe'me Jaliaĝanec, enaac: «Da'me Israel laje'pi, yataqata jalcote da'me 'lonata'j jo'ne ja no'en. Chane'eja male jaje'tema da'me ne'uaĝanague'j, qa'a yeme'n nale ga'me qaya'te laviyaĝajet, uotaĝa ga'me choĝodac qoyen tayi nale ga'me pela'.

⁷ Nataq'aen peta'ñguilo gaa'me choĝodayaqolqa, chayovida'a da'me ye'ue'tape gaa'me. Joga'me net'a choqoga'me c'oĝot yemetedapiye jaga'me onole yauo, qama'le ch'e ye'uetedac da'me yenaĝat jo'ne ja 'nalegue.

⁸ Ualo'te nale jogaa'me neuo lael jo'ne nepotanaqa, nale dajotedalegue joga'me c'atonaĝala'; nataq'aen yauata jaga'me laicaua jo'ne loeco lo'o lejetenaĝanaĝat, qama'le quetot joga'me lataĝa qaedi niyome'tape, da'me uetedaue ga'me ñetamenaĝaiqui.

⁹ Qalaĝaja da'me jayem jetaque jo'ouategue ca'li ga'me adadiqui, qama'le japalaĝa't gaa'me amorreopi, yataqata je'n qayaua joca'li, mate mane'e da'me yataqata locayaqa jogaa'me, ena'am jaga'me epaq jo'ne cedro, nataq'aen da'me yataqata 'uañaĝayaqa, ena'am jaga'me epaq jo'ne roble.

¹⁰ Qa'a ami jachiyoĝoteda'ña ca'li di'me Egipto, nataq'aen ami jetelalo nalo'taguet cuarenta gaa'me 'uoidi da'me ovitaue di'me aleua jo'ne totapega't, qaedi ami janema jenjo' aleua jo'ne loĝo't ca'li joga'me amorreopi.

¹¹ Qama'le chayovida'a nayi je'n 'yaqatanaĝanaĝanaqa jogaa'me yodapecache jo'ne ac'oqo'chedi', nataq'aen gaa'me laqaya' je'n yiquiyaqa jo'ne nazareopi. Ami Israel lec'oqo'tepi, ¿qo'li ja naq'aeta jena'me jenjo'?» Naq'aeta da'me 'laqatac ca'li joñe'me Jaliaĝanec.

¹² «Qalaĝaja da'me ami auamaqailo'te ga'me nazareopi qaedi niyomidigui joga'me lataĝa, nataq'aen ja auajeñe'tema jogaa'me 'yaqatanaĝanaĝanaqa ta'le 'yaĝatetedac da'me 'yaqataĝanaĝac.

¹³ Qama'le nayi male jen yejam jena'me aleua, chimaqatapi'ña joga'me p'añe jo'ne ue'toto naa'me adapia'chedi', ena'am da'me lajamaĝa jaga'me cadeeta jo'ne dajali ga'me li'yac jo'ne trigo.

¹⁴ Te'me auajoyiye, te'me ami vidiaqayaqa, qalaĝaja ja auaqanachichi ta'le jayem auajoyi'yem. Uo'oe jogaa'me yataqata 'uañaĝayaqa, qalaĝaja qomle qaya'te 'lañaĝa'j. Chayovida'alo jogaa'me yataqata ja damichiguilo naa'me lai'li, qaya'te onolec ta'le nec'alegue qomle.

¹⁵ Jogaa'me chiquenec lo'ol nataq'aen ja nec'aledegue, uotaĝa gaa'me vidiaqayaqa; chayovida'alo jogaa'me nalo'te gaa'me pe'ga ja yaqanate't ta'le jayem dajode'guem.

¹⁶ Ga'me nolo' qom 'uo da'me dojo', chayovida'alo jogaa'me yataqata qaleuaĝayaqa jo'ne lataĝanaĝayaqa male yajaĝadegue jogaa'me 'leuoĝonaqatel qaedi male yataqata dajodegue.» Naq'aeta jenjo' 'laqatac ñe'me Jaliaĝanec.