1 Samuel 24 - Toba del Oeste

David ja yepaguelegue da'me yalat ñe'me Saúl

¹ Ca'li yem da'me deloi'ye'to gaa'me filisteo laje', ñe'me Saúl 'viyelaq, qama'le qot'aqataĝanem queda'me David ue'ta ga'me aleua jo'ne totapega't di'me En-gadi.

² Qama'le yapetena'ajalo gaa'me tres mil nalada't lo'olpi jo'ne p'ajodaye, qama'le ec, yelaque ñe'me David choqogaa'me nejoĝonaqa. Qama'le yec'adije'ma ga'me ueda'a gaa'me qadi jo'ne qoyen lenaĝat da'me «Quetaq jo'ne viaĝajel».

³ Ca'li yovita ga'me 'nanaĝate lae't, jo'ne 'uo ga'me jauac jo'ne na'ña jodi'me, ñe'me Saúl nouoĝom ga'me laelijec qama'le taue ga'me jauac. Qalaĝaja joñe'me David choqogaa'me nejoĝonaqa ueteda'a ga'me taeteuo da'me nañoĝotetedapiñe.

⁴ Jogaa'me nejoĝonaqa ñe'me David dojedapegue' ñe'me: «Jenjo' nolo' male yepaquichigui ga'me jo'ne joote 'yaĝatetac ñe'me Jaliaĝanec, ca'li am dojapegue', enaac: “Qoyanouelo naa'me adoua' ñe'me adauteua.” A'uetec ga'me jo'ne auetapega 'noota ta'le aua'uo.» Qampaja'a, David ñejeguem qama'le nodichiñi da'me yec'ata ñe'me Saúl qama'le yichaĝaye ga'me lapoto lae.

⁵ Da'me yem da'me yichaĝaye ga'me lapoto lae ñe'me jaliaĝanec, David nomeguet da'me yataqachiñe ja 'noota ga'me lelnataĝac.

⁶ Qama'le enaac da'me dojapegue'to gaa'me nejoĝonaqa: «Joñe'me Jaliaĝanec nach'eñe jayem yachiyoĝotaue da'me ta'le 'uo joga'me je'etec ñe'me yejaliaĝanec. Qa'a joñe'me mach'e liquiyac ñe'me Jaliaĝanec. ¡Ja jaqanatet ta'le ñodegue jena'me youaq ta'le 'uo joga'me je'etec joñe'me!»

⁷ Daa'me daajo' 'laqataqa ñe'me David en 'nemaĝadiñe jogaa'me nejoĝonaqa, qama'le ja yajeta ta'le 'uo joga'me qo'yetec ñe'me Saúl. Ca'li ñe'me Saúl yenoĝonegue, ca'e ga'me jauac, qama'le yitaĝa ec.

⁸ Qalaĝaja David yenoĝonegue, chiyaqaue ga'me jauac dajota'ye ñe'me Saúl, qama'le da'me joote p'aye niyaĝajeguem: «¡Jaliaĝanec, Jaliaĝanec!» Qama'le Saúl nejelec qama'le yauana ñe'me David, queda'me yejoquetedañe naa'me leliquetel, yedaĝataue jena'me aleua ga'me latajoĝoc qa'a 'uo joga'me lauategaĝa.

⁹ Qama'le enaac: «¿Toqoch'e oquegue ga'me 'laqataĝanaĝa'j jogaa'me etedapega jetaque 'uo ga'me am je'etec?

¹⁰ 'Noota qom auayaten queda'me yataqata eja queda'me jenjo' nolo' ñe'me Jaliaĝanec am yanouelo naa'me youa', da'me ouetaue ga'me jauac. Gaa'me ñejoĝonaqa jayem quetedape'uo ta'le am jalat, qalaĝaja jayem am jichoĝoden, qa'a jenaac: “Ja jaqanatet ta'le ja no'en ga'me je'etec ñe'me yejaliaĝanec, qa'a joñe'me Dios en liquiyac qaedi jaliaĝanec.”

¹¹ Yataqata auec'aten, am jaliaĝanec, jena'me jenjo' yajoqot'a jo'ne mach'e lae na'me adapoto. Mach'e jayem da'me jichaĝaye, qalaĝaja ja am 'te jalat. Qaedi male auayaten queda'me qaya'te ua'a ta'le am ñautena, nataq'aen qaya'te ja no'en ta'le am je'etec. Qalaĝaja da'me am jayem auecaatac qa'a jetaque jayem aualat.

¹² Joñe'me Jaliaĝanec nach'eñe qo'mi naloqote'n da'me qo'mi dos, nataq'aen da'me mach'eñe joñe'me 'uo joga'me am 'yetec, jouaĝat da'me ja no'en jo'ne jayem a'uetec. Qalaĝaja jayem ja ch'e ta'le ñodegue jena'me youaq qaedi 'uo ga'me am je'etec.

¹³ Anetouetac ga'me toejeyac 'naqatac jo'ne eetac: “Gaa'me qaleuaĝayaqa nach'egaua chiyaqayilo ga'me naqaleuaĝa.” Chane'eja da'me jayem ja ch'e ta'le ñodegue jena'me youaq jouaĝat am.

¹⁴ ¿Jach'e joga'me auecaatac, da'me am jo'ne am lejaliaĝanec di'me Israel? ¿Jach'e ñe'me auelotaque? ¿Qo'li naqayem, jo'ne jena'am ga'me pioq leuaĝaic, uotaĝa pioĝo lapaĝat?

¹⁵ Joñe'me Jaliaĝanec nach'eñe jo'ne qo'mi naloqote'n da'me qo'mi dos. ¡'Noota qom mach'eñe joñe'me yec'aten ga'me mach'e 'yonatac, qama'le am dajoya'aguet jouaĝat jayem.»

¹⁶ Da'me yem da'me lojaĝac ñe'me David, Saúl enaac: «¿Qo'li ja naqa'am da'me jo'ne auojetac, David mach'e am yalec?» Qanach'e ua'a da'me noyen ñe'me Saúl,

¹⁷ qama'le eetac ga'me 'laqatac: «Da'me am qa'a aua'uo ga'me jo'ne chimaqachiñe, ja jayem 'te auena'am, qa'a jayem a'uetec joda'me 'noota, temaq'aen da'me ja no'en da'me jo'ne am je'etec.

¹⁸ Jenjo' nolo' jayem aualoĝonec queda'me yataqachiñe am jiyaĝaua jo'ne onaĝaicaloec, qa'a ñe'me Jaliaĝanec jayem yanouelo naa'me adoua' qaedi jayem aualat, qalaĝaja ja aua'uo.

¹⁹ Gamachaqaega ga'me jiyaĝaua, da'me yauana ga'me lauteua, ¡qama'le yalat jaĝa'te! Qaya'te ta'le yajeta da'me ec qama'le nec'alaĝatetaye. Chane'eja, ¡'noota qom joñe'me Jaliaĝanec am yejetenec da'me onaĝaic, jouaĝat da'me dojo' jayem a'uetec jenjo' nolo'.

²⁰ Da'me jayem qa'a yataqachiñe jayaten queda'me am lejaliaĝane'j qomle ga'me Israel laje', nataq'aen da'me adejaliaĝa qomle di'me Israel yataqachiñe yachimaqachiñe nataq'aen qaya'te loiquiaqa'.

²¹ Qama'le nayi, a'naĝatot ñe'me Jaliaĝanec, queda'me ja auamaĝadegue gaa'me jayem chiyoqodayi, nataq'aen ena'te auapalaĝat ga'me lenaĝa't gaa'me yalaqapi.»

²² David ya'uo ga'me 'naĝataĝac, yanem ñe'me Saúl. Qama'le Saúl 'viyelaĝague ga'me 'lachaqa', qama'le ñe'me David choqogaa'me nejoĝonaqa yec'adeta ga'me nequepaĝanaĝat.