Tito 3 - Tachi Ak'õre Pedea

Tachi Ak'õrepa ichi sõpiadepa tachi k'aripada

¹ Ũpẽarã́ k'ɨ̃risiapise chi nãɨ ĩjũanepema minachia k'awa p'anɨrã juade p'ananai p'anɨma. Ãchia jarauta oodai p'anɨma mãɨnepa nejõma pia oodai k'orea p'ananai p'anɨma.

² Ũpẽarã́ jarase: abaɨ k'orea piawẽa pedeadaiwẽa p'anɨma mãɨnepa k'ĩruu pedea p'ananaiwẽa p'anɨma, mãɨpari sõpia p'ananai p'anɨma, jõmãɨrã ome minachia bɨ jĩra p'ananaiwẽa p'anɨma.

³ Piarã naena tachi sida k'ɨ̃risia piawẽa p'anasidama, Tachi Ak'õrene ĩjãanawẽa p'anasidama mãɨnepa piawẽa k'ɨ̃risia p'anasidama. Tachia nemietá oo k'ɨ̃ria berã mãɨnepa arapá oo k'ɨ̃ria berã, chipari pae pari mimiaparí jĩra jõma oopachidama. Paritua k'achiade nipapachidama, chĩarapa uru bɨ k'orea sõpiawẽa p'anapachidama, chĩarapa tachi unuemaapachidama, mãɨnepa tachia chĩara unuemaapachidama.

⁴ Maamina Tachi K'aripaparipa ichi pia bɨt'a mãɨnepa ichia tachi k'ɨ̃ria bɨt'a jõmãɨrã́ k'awapisima.

⁵ Mãɨpa tachi k'aripasima. Tachia pia oodada k'orea k'aripaé pasima, mãɨpari ichi k'ĩra chupuria bɨdepa k'aripasima. Tachi nemietá k'ɨ̃risia atuasima neet'á t'õna jĩra p'aneenamẽrá mãɨnepa chiwidi jĩra p'aneenamẽrá. Ichiaba Tachi Ak'õre Jaorepa tachiá mãicha chok'ae p'anapisima.

⁶ Tachi K'aripaparí Jesucristodepa Tachi Ak'õrepa ichi Jaore tachiá teasima, pania minachia weasi jĩra tachi k'ak'ua ɨ̃rɨ.

⁷ Mãɨya Tachi Ak'õrepa ichi sõpiadepa tachi jĩp'a unu bɨ pẽra ewaricha ichi ome chok'ae p'ananaipɨ. Mãɨ nɨ p'anɨma.

⁸ Mãɨ pedea piarã arí bɨ pẽra, mãɨne ĩjãanai p'anɨma. Mɨa k'ɨ̃ria bɨma pɨa mãɨ minachia jaratea bai Tachi Ak'õrene ĩjãa berãpa nejõma pia oo wãnamẽrá. Mãɨ pedea minachia pia bɨma. Jõmãɨrã k'aripaparima.

⁹ Maamina paritua pedea piawẽa bɨ k'orea k'ĩruu pedearãse. Ichiaba Moisepa bɨda k'orea k'ĩruu pedearãse. Mãɨnepa tachi chõarãenapemarã t'ɨ̃ jarateapataɨ itu bɨse. Jõma mãɨ piawẽa bɨ mãɨnepa mi ãpia pida k'aripak'ama.

¹⁰ Abaɨpa ũpẽarã́ k'ĩruu pedeapisira, ichi ɨtɨase waa mãɨya oopiemaapa. Ichia ĩjãawẽpɨra, mãicha ɨtɨase. Mãɨne waidi ĩjãawẽpɨra, ichi ome barãse.

¹¹ Pɨa minachia k'awa bɨma mãɨ ẽpẽrapa chi piarã pedea itu bɨk'ari piawẽa oo bɨt'a. Nemietá oo bɨdepa unupi bɨma ara ichi Tachi Ak'õre k'ĩrari nepɨra pará bɨade a bɨt'a.

Nãɨ k'art'ade Pablopa k'aadea bɨda

¹² Mɨa ũpẽa Artema wa ũpẽa Tík'ik'o pɨmá wãpiipɨ. Jãma pak'ari isapea Nicópoli p'uurudea mɨ ak'ɨde chese. Mɨa nãɨ ewãra bɨmisa, mãma bai k'ɨ̃risia bɨma.

¹³ Ẽpẽra chi k'aripa pedeaparí Zena mãɨnepa Apolo pɨmãɨpa wãutade ne ãareaɨne k'aripase pia wãnamẽrá.

¹⁴ Tachi chi Cristode ĩjãa berãpa pia oo k'awadai p'anɨma nenea k'ede k'aripadai k'orea. Mãɨya ara tachi pari p'ananaiwẽma.

¹⁵ Jõma mɨ ome p'anɨpa pɨá pia bapade a jarautama. Chi taipa k'ɨ̃ria p'anɨ Cristode ĩjãapataɨrã́ pia p'anapade a jarase. Mɨa k'ɨ̃ria bɨma Tachi Ak'õrepa ichi sõpiadepa jõma mãra k'aripa bai.