Tito 2 - Tachi Ak'õre Pedea

Pablopa Titoa jarateapida

¹ Maamina pɨa chi piarã pedea jĩp'a jaratea bai bɨma.

² Chõarã́ jaratease ãchi k'ak'ua jĩp'a uru p'ananamẽrá, k'ĩra jĩp'a p'ananamẽrá, k'ɨ̃risia piadepa nipadamẽrá, Cristode minachia ĩjãa p'ananamẽrá, piarã k'ɨ̃rianepa p'ananamẽrá, mãɨnepa jõma choadamẽrá.

³ Mãɨnepa chõtãarã́ jaratease Tachi Ak'õre k'ĩrari jĩp'a p'ananamẽrá, waapẽarã k'orea seadepa k'achia pedeadawẽa p'ananamẽrá mãɨnepa piu nipapidaemaapa. Mãɨpari nepia jarateadai p'anɨma.

^4-5 Ãchia ãwẽerã́ jarateadai p'anɨma ãchi k'ima mãɨnepa ãchi warrarã k'ɨ̃rianamẽrá, k'ɨ̃risia piadepa nipadamẽrá, wẽra jĩp'a p'ananamẽrá, ãchi te pia ak'ɨdamẽrá, sõpia p'ananamẽrá, mãɨnepa ãchi k'imapa jara bɨ ũrinamẽrá. Mãɨya abaɨ pida Tachi Ak'õre pedea k'achia pedeadaiwẽma.

⁶ K'ũtãarã́ jaratease k'ɨ̃risia piadepa jĩp'a nipadamẽrá.

⁷ Jõma pia oo bɨdepa jõmãɨrã́ unupi base sãmaasã́ nipadai p'anɨ. K'ɨ̃risia piadepa jĩp'a jaratea base.

⁸ Piarã pedea jaratea base mi ãpia pida pɨ k'orea k'achia pedeapidaemaapa. Mãɨya jaratea baipɨra, pɨchi nek'ĩramaarã k'ĩranejasiadaipɨ. Ãchia mi ãpia pida tachi k'orea p'ue k'achia pedeadaiwẽma.

⁹ Chipari pae pari mimiapataɨrã́ jaratease ãchi chiparipa jara bɨ jõma oodamẽrá. Nejõma pia oodai p'anɨma ãchi chiparipa pia unumẽrá. Ãchi chiparipa jararu k'achia p'anoonai pia bɨwẽma.

¹⁰ Ãchi chiparidé chɨadaiwẽa p'anɨma, mãɨpari unupidai p'anɨma ãchia nejõma jĩp'a oo p'anɨt'a. Mãɨya ẽpẽrarãpa k'awadaipɨ Tachi Ak'õre K'aripaparí pedea minachia pia bɨt'a.

¹¹ Tachi Ak'õrepa jõmãɨrã́ unupisima ichi sõpiadepa ẽpẽrarã k'aripaparit'a.

¹² Mãɨpa tachiá k'awapi bɨma nejõma k'achia mãɨnepa nãɨ ĩjũanepemarãpa k'ɨ̃riapataɨ itu bɨdai p'anɨt'a. Mãɨnepa k'awapi bɨma tachi nãɨ ĩjũane p'anɨne k'ɨ̃risia piadepa tachi k'ak'ua jĩp'a ak'ɨ uru nipadai p'anɨt'a Tachi Ak'õrepa k'ɨ̃ria bɨ jĩra.

¹³ Tachi pia p'ananai ewari nɨ p'anɨmisa mãɨya p'ananai p'anɨma. Mãɨ ewaride Tachi K'aripaparí Jesucristo cherude, ichi k'ĩrawãrea ununaipɨ, ichi Tachi Ak'õre chi atepe bɨdeepuru.

¹⁴ Tachi k'orea Jesucristopa ara ichi itu peapisima ãarea nemietaadepema k'aripai k'orea. Tachi ara ichi pae pia bɨsima ichi p'uurude p'ananamẽrá mãɨnepa nejõma pia oo k'ɨ̃ria p'ananamẽrá.

¹⁵ Jõma mãɨ jaratea base. K'aripase ũpẽarãpa mãɨ pedea oodamẽrá. Piawẽa oo be ɨtɨase, Tachi Ak'õrepa pɨ bɨda pẽra mãɨya oomẽrá. Ũpẽarã́ pɨ k'ɨ̃rianawẽa uru p'anɨpirãse.