Tito 1 - Tachi Ak'õre Pedea

Pablopa nãɨ k'art'ade naa bɨda

¹ Mɨ Pablopɨ, Tachi Ak'õre pae pari mimiaparí mãɨnepa Jesucristopa peedapɨ. Mɨ peesima Tachi Ak'õrepa jɨrɨ atadaɨrãpa ichide ĩjãanamẽrá mãɨnepa chi piarã pedea k'awadak'ari Tachi Ak'õrepa k'ɨ̃ria bɨ jĩra p'ananamẽrá.

² Chi mãɨya ĩjãa p'anɨpa Tachi Ak'õre ome ewaricha chok'ae p'ananai k'orea nɨ p'anɨma, nãɨ ĩjũa ooi naena Tachi Ak'õre sea jarak'á bɨpa mãɨya ooyade asi pẽra.

³ Maapae ichia bɨda ewaride mɨa jaratea bɨdepa ichi pedea Cristo k'orea pia k'awapisima. Mãɨ pedea Tachi Ak'õre chi K'aripaparipa mɨá jarateapisima.

⁴ Tito, mɨa nãɨ k'art'a pɨ pae bɨruma. Tachia abarik'a Cristode ĩjãa p'anɨ pẽra pɨt'a piarã mɨ warra jĩra bɨma. Mɨa k'ɨ̃ria bɨma Tachi Pajãnepema Ak'õrepa mãɨnepa Tachi Chipari Jesucristo pida ãchi sõpiadepa pɨ k'aripa p'ananait'a mãɨnepa ne k'ɨ̃risiawẽa p'anapiit'a.

Pablopa Titoa ĩjãapataɨrã ak'ɨpataɨrã chõarã bɨk'oapade ada

⁵ Mɨa pɨ p'usa estaik'a ĩjũa bɨ Creta apataɨde ameesima tachia oodai p'anana jõma oomẽrá. Mɨa jarada jĩra ĩjãapataɨrã ak'ɨpataɨrã chõarã p'uurucha bɨk'oase.

⁶ Ĩjãapataɨrã ak'ɨparí chõa nepɨra pará bɨade adaiwẽa bai bɨma. K'ima abapuru uru bai bɨma. Ichi warrarãpa Cristode ĩjãa p'ananai p'anɨma mãɨnepa jĩp'a nipadai p'anɨma. Mãɨya ẽpẽrarãpa jaradaiwẽma nemietá oo p'anɨ wa k'ɨɨrɨwẽa p'anɨ.

⁷ Ĩjãapataɨrã ak'ɨparipa Tachi Ak'õrepa ooda oopari pẽra nepɨra pará bɨade adaiwẽa bai bɨma. Ichi waapẽarã k'aepẽra atepe bɨ jĩra baiwẽa bɨma, ne wariwẽa bɨ k'orea k'ĩruu baiwẽa bɨma, it'uapa piu nipaiwẽa bai bɨma, k'ĩruuyá baiwẽa bɨma mãɨnepa erreara awaa baiwẽa bɨma.

⁸ Mãɨpari ichi tede cheutarã́ ãarea pia pedeai bɨma, nejõma nepia oo k'ɨ̃ria bai bɨma, k'ɨ̃risia piadepa bai bɨma, jĩp'a bai bɨma, Tachi Ak'õre pae bai bɨma, mãɨnepa ichia ichi k'ak'ua jĩp'a uru bai bɨma.

⁹ Chi piarã pedea ichiá jarateadada minachia ĩjãa bai bɨma. Mãɨya ichia piarã pedea jĩp'a jaratea bɨdepa ẽpẽrarã p'ue k'aripaipɨ pia ĩjãanamẽrá, mãɨnepa chi piarã pedea piawẽa bɨade apataɨrã́ p'ue k'awapiipɨ ãchia piawẽa k'ɨ̃risia p'anɨ.

¹⁰ Mɨa mãɨya jara bɨma k'ɨɨrɨwẽa berã, tachi k'aripak'á pedea jarateapataɨrã mãɨnepa chĩara seapataɨrã sida pará pẽra. Mãɨrã tachi ɨmɨk'ĩra k'ak'ua tauchaadai p'anɨane apataɨrãpɨ.

¹¹ Ãchia jarateaiwẽa bɨ jaratea p'anɨnepa techa ẽpẽrarã́ piawẽa k'ɨ̃risiapipatama. Aba errearadeepuru jarateapatama. Mãɨrã́ jarateapirãse.

¹² Ara mãɨ Cretadepema k'ɨ̃risia k'awaparipa nãɨya jarasima: «Cretadepemarã seajarapataɨrã, ãnimara k'achia jĩra be, ne minachia k'oyá be mãɨnepa chi k'oa be».

^13-14 Mãɨpa jarada piarãpɨ. Mãɨ k'orea mãɨ ẽpẽrarã ɨtɨa base piarã pedea ĩjãanamẽrá, judiorãpa chõarãenapema nepɨrɨpataɨ itu bɨdamẽrá, mãɨnepa chi piarã pedea ĩjãanak'apɨɨrãpa jaratea p'anɨ ĩjãapidaemaapa.

¹⁵ Tachi Ak'õre k'ĩrari pia berãmá nejõma Tachi Ak'õre k'ĩrari pia bɨma. Maamina Tachi Ak'õrene ĩjãanak'apɨɨrãmá mi ãpia pida pia bɨwẽma. Ãchia k'achia k'ɨ̃risiapatama mãɨnepa ãchi sõne nepɨra paraawẽa p'anɨane apatama.

¹⁶ Ãchia jarapatama Tachi Ak'õre k'awa p'anɨt'a, maamina ãchia oo p'anɨnepa unupipatama ichi itu bɨ p'anɨt'a. Ãchi k'ɨɨrɨwẽa be mãɨnepa nepia oodai k'orea p'ananak'ama. Ãchia oopataɨ Tachi Ak'õrepa k'ɨ̃riak'ama.