Santiago 1 - Tachi Ak'õre Pedea

Nepɨra pará nɨbɨde choa bai k'orea bɨda

¹ Mɨ Santiagopɨ, Tachi Ak'õre pae pari mimiaparí mãɨnepa Tachi Chipari Jesucristo pae pari mimiaparí. Nãɨ k'art'a bɨruma Israeldepema doce warrarãnepema chedaadarã tuacha berã pae. Mɨa k'ɨ̃ria bɨma mãra pia p'ananamẽrá.

² Ũpẽarã, ne wawariade mĩa p'anɨne minachia arapá p'anat'ɨ.

³ Mãrapa k'awa p'anɨma mãɨya mĩa p'anɨne Tachi Ak'õrene ĩjãa p'ananaipɨra, mãɨne pia choa k'awadait'a.

⁴ Mãɨ piarã choa p'ananaipɨra, ne ãareaɨne pia, jĩp'a p'ananaipɨ. Mi ãpia pida ne newẽa p'ananaiwẽma.

⁵ Mãranepemapa k'ɨ̃risia newẽa bɨpɨra, Tachi Ak'õrea ɨt'aa chiidii bɨma. Mãɨne Tachi Ak'õrepa teaipɨ. Ichiá ɨt'aa chiidisidara ɨtɨawẽa jõmãɨrã́ sõpia, wãak'awẽa teaparima.

⁶ Maamina piarã ĩjãa bɨdepa ɨt'aa chiidii bɨma. Mi ãpia pida k'ɨ̃risiaiwẽa bɨma Tachi Ak'õrepa teaiwẽt'a. Chi mãɨya k'ɨ̃risia bɨ nãupa p'usa t'awa minachia ãyá ateepari jĩra bɨma.

⁷ Chi mãɨya bɨpa k'ɨ̃risia bɨwẽma Tachi Chiparidepa ne uru bait'a.

⁸ Ichi k'ɨ̃risiat'a ume uru bɨ pẽra k'ɨ̃risia aba bɨde ap'i bak'ama.

⁹ Ũpẽa chupuria bɨ arapá bai bɨma Tachi Ak'õremá mãɨ ũpẽa atepe bɨẽra.

¹⁰ Maamina chi ɨbɨa bɨ arapá bai bɨma, Tachi Ak'õrepa ichi chupuria unu bɨẽra. Chi ẽpẽra ɨbɨa bɨ tãaraa baiwẽma nep'ono tãaraa bak'a jĩra.

¹¹ Ɨmata ochiak'ari pisiapa nep'ono k'irú pɨɨpiparima. Maapae chi nep'ono baek'ari chi auk'ará k'ɨrɨt'a jõparima. Ara mãɨ jĩra chi ɨbɨa bɨ ewaricha erreara jɨrɨi k'orea bɨde piuipɨ.

¹² Abaɨpa nemietá ooi k'ɨ̃risiadepema choa bɨpɨra, Tachi Ak'õremá minachia pia bɨma. Jõma choak'ari Tachi Ak'õrepa poro jũra jɨ̃parí tearu jĩra, ichi ewaricha chok'ae bɨipɨ. Tachi Ak'õrepa jõma ichi k'ɨ̃ria berã́ piarãnepa mãɨya chok'ae bɨyade asima.

¹³ Nemietá ooi k'ɨ̃risia beerude mi ãpia pida jaraiwẽa bɨma Tachi Ak'õrepa mãɨyapiruade arãse. Tachi Ak'õrepa nemietá ooi k'ɨ̃risiak'ama mãɨnepa ichia abaɨa k'ɨ̃risiapik'ama.

¹⁴ Mãɨpari nemietá ooi k'ɨ̃risia beeparima ara tachia mãɨya oo k'ɨ̃ria bɨ pẽra.

¹⁵ Nemietá ooi k'ɨ̃risia beek'ari, maapae mãɨya oo beeparima. Mãɨya jõma oo beeda pẽra piuk'ari Tachi Ak'õrenepema ewaricha awara baipɨ.

¹⁶ Ũpẽarã mɨa k'ɨ̃ria berã, ara mãra tuaba nãɨ k'orea searãt'ɨ:

¹⁷ Ɨt'aripa Tachi Pajãnepema Ak'õrepa nejõma minachia pia k'edet'a tachiá teaparima. Ichiapuru nejõma pajãne uruapataɨ ook'oasima. Mãɨrã ewaricha abarik'a uruadak'ama. Mãɨpari Tachi Ak'õre k'ĩra awara bak'ama mãɨnepa k'ĩra awara ook'ama.

¹⁸ Ichia k'ɨ̃riana pẽra ichi piarã pedeadepa tachi chok'ae bɨsima. Mãɨya chi ne uu ĩjũanepema naapema chauda ichiá teada jĩra tachit'u jõma ichia oodadepema ichi pae pia p'anɨma.

¹⁹ Ũpẽarã mɨa k'ɨ̃ria berã, nãɨ k'ɨ̃risia p'anat'ɨ: Jõmãɨrãpa pia ũrinai k'orea p'ananai p'anɨma, pia pedeadai p'anɨma, mãɨnepa paritua k'orea isapea k'ĩruunaiwẽa p'anɨma.

²⁰ Tachi k'ĩruutade Tachi Ak'õrepa jĩp'a oopi bɨ oodak'ama.

²¹ Mãɨpuru nejõma nemietá mãɨnepa nejõma jĩp'awẽa bɨ itu bɨt'ɨ. Maapae Tachi Ak'õrepa ichi pedea mãra sõne bɨda k'ɨ̃risia piadepa ĩjãat'ɨ. Ara mãɨ pedeapa mãra Tachi Ak'õrepa ɨtɨai pada p'ue k'aripaipɨ.

²² Tachi Ak'õre pedea oo p'anat'ɨ. Abapuru mãɨ pedea ũripataɨrã p'anarãt'ɨ. Mãɨya p'ananaipɨra, ara mãra tuaba sea p'ananaipɨ.

²³ Tachi Ak'õre pedea ũri bɨpa mãɨ oowẽpɨra, ẽpẽrapa k'ĩra ak'ɨpataɨde ichi k'ĩra ak'ɨru jĩra bɨma.

²⁴ Ak'ɨrude ichi sãmaasã́ bɨt'a unuparimina, ãyá wãrune abaeda k'ɨ̃risia atuaparima.

²⁵ Maamina abaɨpa Tachi Ak'õre pedea ũrik'ari k'ɨ̃risia atuawẽpɨra, minachia pia baipɨ. Ẽpẽrapa mãɨ pedea jĩp'a bɨ mãɨnepa tachi k'aripa bɨ ewaricha pia k'ɨ̃risiak'ari maapae oo baipɨra, ichia oo bɨdepa minachia pia baipɨ.

²⁶ Abaɨpa Tachi Ak'õrene ĩjãa bɨ k'ɨ̃risia bɨpɨra, maamina ichi k'ĩrame pia ak'ɨwẽpɨra, ara ichi tuaba sea bɨma. Piarã pari ĩjãa bɨma.

²⁷ Chi piarã ĩjãa bɨpa nãɨya ooi bɨma Tachi Pajãnepema Ak'õrepa ichia oo bɨ pia unumẽrá mãɨnepa jĩp'a unumẽrá: jẽramãra warrarã mãɨnepa p'ẽtãarã minachia mĩa p'anɨrã k'aripai bɨma, mãɨnepa nãɨ ĩjũanepemarãpa nemietá oopataɨ jĩra ooiwẽa bɨma.