Romano 9 - Tachi Ak'õre Pedea

Ãarea Israeldepa chedaadarã piarã Israeldepemawẽpɨ

¹ Mɨ Cristode pẽra piarã pedea jararuma. Sea jarawẽma. Tachi Ak'õre Jaorepa mɨ sõne nãɨ pedea piarã ara k'awapi bɨma.

^2-3 Nãɨ jararuma: mɨ ẽpẽrarã judiorã k'orea ewaricha minachia sõp'ua baparima, Tachi Ak'õre ome piawẽa p'anɨẽra. Mɨ Cristodepema awara beei pasima, mɨ ũpẽarã k'aripai k'orea,

⁴ chi Israeldepemarã. Tachi Ak'õrepa ãchi naa jɨrɨ atasima ichi warrarã p'ananamẽrá. Ichi k'ĩrawãrea achiterrea ãchiá unupisima. Ichia ãchi chõarãenapemarã ome pedea ausidama. Moisepa bɨda ãchiá teasima. Ãchirã́ k'awapisima ichi te nepalade k'ãre oodai p'anɨt'a mãɨnepa jõma ichia teai jarada ãchi pae basima.

⁵ Ãchi chõarãenapemarã chi minachia k'awapataɨrã pasima. Ãchidepa Cristo ẽpẽra k'ak'uade chesima. Ichit'a jõmãɨrã Ak'õrepɨ. Ichiaapuru tachia ewaricha pia pedeadai p'anɨma. Mãɨya beese.

⁶ Mɨa jarawẽa bɨma Tachi Ak'õrepa chi israel ĩjũanepemarã pae ooyade adat'a oowẽa bɨ. Mãɨpari mɨa jara bɨma ãarea Israeldepa chedaadarã Tachi Ak'õre k'ĩrari piarã Israeldepemawẽpɨ.

⁷ Mãɨnepa jõma Abrahanepa chedada Tachi Ak'õre k'ĩrari Abrahán warrarãwẽma. Tachi Ak'õrepa Abrahaná nãɨya jarasima: «Pɨ warra Isaadepa warrarã minachia ununaipɨ».

⁸ Mãɨ pedeapa tachiá k'awapi bɨma jõma Abrahanepa nãɨ k'ak'uade t'õnana Tachi Ak'õre warrarãwẽma. Tachi Ak'õrepa teai jarada warrarãt'a mãɨt'u Abrahán warrarã piarãrãpɨ.

⁹ Tachi Ak'õrepa Abrahaná teai jarada pedea nãɨpɨ: «Nãɨ cheru ãyone mɨ mãicha cheipɨ. Mãɨne Sarapa warra t'õ baipɨ».

^10-12 Mãɨ awara Tachi Ak'õrepa k'awapisima chi ichia jɨrɨ atai k'ɨ̃ria bɨt'a jɨrɨ ataparí. Mãɨnepa k'awapisima mi ãpia pida jɨrɨ atak'ama ãchia oo p'anɨt'a pia unu bɨ pẽra mãɨpari jɨrɨ ataparima ichia t'ɨ̃na pẽra. Nãɨya k'awapisima: Rebecapa mikisu t'õsima. Chi ak'õre tachi chõarãenapema Isá pasima. Maamina mãɨ warrarã t'õnai naena mãɨnepa mi ãpia pida pia wa nemietá oodai naena Tachi Ak'õrepa Rebecá jarasima: «Chi naapema chi k'aadeapema juade baipɨ».

¹³ Mãɨ k'orea Tachi Ak'õre pedeade nãɨya bɨ bɨma: «Mɨa Jacobo k'ɨ̃riasima, maamina Esaú unuemaasima».

¹⁴ ¿Mãɨnepema sãmaasã́ k'ɨ̃risia p'anɨma? ¿Tachi Ak'õrepa jĩp'a ook'a k'ɨ̃risia p'anɨk'ãra? ¡Mãɨyawẽma!

¹⁵ Tachi Ak'õrepa Moisea nãɨya jarasima: «Mɨa chi k'ĩra chupuria k'ɨ̃ria bɨ ẽpẽra k'ĩra chupuriaipɨ mãɨnepa chi mɨa k'ɨ̃rianepa k'aripa k'ɨ̃ria bɨ ẽpẽra k'ɨ̃rianepa k'aripaipɨ».

¹⁶ Piarã chi Tachi Ak'õrepa jɨrɨ ata bɨ ẽpẽra jɨrɨ atak'ama, mãɨ ẽpẽrapa oo bɨt'a pia unu bɨ pẽra, mãɨyawẽpɨra mãɨ chi ẽpẽrapa mãɨya k'ɨ̃ria bɨ pẽra. Mãɨpari chi ichia k'ĩra chupuria k'ɨ̃ria bɨt'a jɨrɨ ataparima.

¹⁷ Ichi pedeade ichia p'araoná jarada nãɨya bɨ bɨma: «Mɨa pɨ chi atepe k'awa bɨ bɨsima mɨ chaarea bɨ unupii k'orea. Mãɨya mɨt'u jõma nãɨ ĩjũane t'ɨ̃ p'oa baipɨ».

¹⁸ Mãɨpa k'awapi bɨma Tachi Ak'õrepa abaɨ k'ĩra chupuria k'ɨ̃ria bɨpɨra mãɨya ooparit'a mãɨnepa abaɨ k'ɨɨrɨwẽa beepii k'ɨ̃ria bɨpɨra mãɨya ooparit'a.

¹⁹ Mãɨ pedea k'orea abaɨpa nãɨya jarai bɨejã: «Tachi Ak'õrepa mãɨya oopari pẽra ¿k'ãre k'orea tachi nepɨrade p'anɨane a bɨma? ¿Ichia tachi bɨda jĩra p'anɨwẽk'ãra?»

²⁰ Maamina ¿chi mãɨya pedea bɨpa Tachi Ak'õrea mãɨya pedeai bɨk'ãra? Chok'opa chi chok'o k'aparia jarai bɨk'ãra: «Pɨa ¿k'ãre k'orea mɨ jãɨya k'asima?»

²¹ ¿Chi chok'o k'aparipa oo k'ɨ̃ria bɨ jĩra ooiwẽa bɨk'ãra? ¿Chok'o arapaapataɨ ewari k'oreapema mãɨnepa paritua ewari k'oreapema chi abarik'a yooropa k'ai bɨwẽk'ãra?

²² Ara mãɨ jĩra Tachi Ak'õrepa oo k'ɨ̃rianat'a nãɨya oosima. Ẽpẽrarãpa nemietá oo p'anɨ k'orea Tachi Ak'õrepa ichi k'ĩruupidepa mãɨnepa ichi chaareadepa ãchi ɨtɨak'ari t'ɨpɨ uruadea jira peei pasima. Maamina ãchia nemietá oo p'anɨt'a ãarea choasima.

²³ Mãɨya choasima ichi pia bɨ waibɨa bɨdepema ichia k'ĩra chupuria bɨ ẽpẽrarã́ k'awapii k'orea. Ãchi ichia naena jɨrɨ atasima ichi pia bɨdepema uru p'ananamẽrá.

²⁴ Tachi mãɨ ẽpẽrarãnepemapɨ. Tachi Ak'õrepa tachi jõma t'ɨ̃sima. Eda waapẽarã judiorãma, ya eda waapẽarã judiorãwẽma,

²⁵ Tachi Ak'õrepa jarada Osea k'art'ade nãɨya bɨ bɨ jĩra: «Chi mɨ p'uurudepemarãwẽ pada naapae mɨ p'uurudepemarãane aipɨ. Mɨa k'ɨ̃riawẽa bada p'uuru mɨa k'ɨ̃ria bɨ p'uuruade aipɨ».

²⁶ «Mãɨnepa nãɨya bɨ bɨma: Mɨa jarasima mãra mɨ ẽpẽrarãwẽpɨ. Mãɨya jaradamá, mɨa mãra mɨ warrarãane aipɨ».

²⁷ Mãɨnepa Isaíapa israel ĩjũanepemarã k'orea nãɨya jarasima: «Israel ĩjũanepemarã chok'ará p'anɨma p'usa ipu jĩra. Maamina ãchi chok'araawẽa p'anɨ k'aripaipɨ

²⁸ Tachi Chiparipa nãɨ ĩjũane be isapea jõma ɨtɨai pẽra».

²⁹ Mãɨnepa mãɨ naena Isaíapa nãɨya jarasima: «Chi Tachi Chipari chi Ne Ãarea P'ue Bɨpa tachi israel ĩjũanepemarã ãpia p'anɨ chok'ae bɨdaépara, Sodomanepemarã mãɨnepa Gomorradepemarã jĩra bai pasima».

Judiorãpa Cristode ĩjãanawẽa p'anɨ k'orea

³⁰ ¿Mãɨpa k'ãre jara bɨma? Judiorãwẽpa jɨrɨdak'a pasima chi Tachi Ak'õre p'uuru jĩp'a bɨ padai k'orea. Maamina mãɨya p'aneesidama Cristode ĩjãanana pẽra.

³¹ Mãɨpari israel ĩjũanepemarãpa chi Tachi Ak'õrene jĩp'a berã p'ananai k'orea jɨrɨ p'anasima, chi ley uru p'anɨnepa. Maamina p'ue mãɨya oodaé pasima.

³² ¿K'ãre k'orea mãɨyanaé pasima? Mãɨyanaé pasima Cristode ĩjãanai k'aepẽra ãchia oo p'anɨnepa ichi k'ĩrari jĩp'a p'ananai k'orea jɨrɨ p'anana pẽra. Piarã ãchia Cristode ĩjãanaé pasima mawaramá t'enabariuta jĩra.

³³ Tachi Ak'õre pedeade mãɨnepema nãɨya bɨ bɨma: «Ũrit'ɨ. Mɨa Sión p'uurude mawara bɨruma. Mãɨ mawaramá ẽpẽrarã t'enabaridak'ari baedaipɨ. Maamina chi ichide ĩjãa bɨpa pari ĩjãa baiwẽma».