Romano 6 - Tachi Ak'õre Pedea

Nemietaadepema ãyá wãnana

¹ ¿Mãɨ k'orea sãmaasã́ k'ɨ̃risia p'anɨma? ¿Tachi wapida nemietaade nipadaik'ãra Tachi Ak'õrepa ichi sõpiadepa atepe k'ĩra chupuriamẽrá?

² ¡Piarã mãɨya oodaiwẽa p'anɨma! Tachi nemietaadepema piusidama. Mãɨpuru ¿sãmaasã́ nemietaade nipadaima?

^3-4 Mãrapa k'awa p'anɨma porochoasidaɨde unupisidama Cristo ome ará p'anɨt'a. Mãɨya unupisidama ichi ome piusidat'a mãɨnepa t'ɨbarisidat'a. Maapae Tachi Pajãnepema Ak'õrepa ichi chaarea waibɨa bɨdepa Cristo chok'ae p'irabaripida jĩra tachi sida chok'ae p'irabaripisima chok'ae bait'a chiwidi jĩra nipadamẽrá.

⁵ Tachi Cristo ome piusida pẽra ichi chok'ae p'irabarida jĩra chok'ae bait'a chiwidi jĩra nipadaipɨ.

⁶ Tachia k'awa p'anɨma tachi k'ɨ̃risia chota bɨ piusit'a Cristo ome k'urusude barijira bɨdada jĩra. Mãɨya tachi k'ɨ̃risia chota bɨpa nãɨ k'ak'uapa nemietá oo k'ɨ̃ria bɨ waa p'ue oopiiwẽma. Tachi waa nemietá pae pari mimiapataɨrãwẽma.

⁷ Piarã abaɨ pida Cristo ome ará piusira, nemietá oo badadepema ãjã́ pari beesima.

⁸ Tachi Cristo ome ará piudada pẽra ĩjãa p'anɨma ichi ome chok'ae p'ananait'a.

⁹ Tachia k'awa p'anɨma Cristo piu bada chok'ae p'irabarida pẽra waa piuiwẽma. Chi piudapa ichi waa p'ueiwẽma.

¹⁰ Cristo bari k'ak'o aba piudapa nemietá ãarea p'uesima. Ichi waa piuiwẽma mãɨpari Tachi Ak'õre pae chok'ae bɨma.

¹¹ Ara mãɨ jĩra k'awadai p'anɨma mãra nemietaadepema piusidat'a mãɨnepa Tachi Chipari Jesucristodepa Tachi Ak'õre pae chok'ae p'anɨ.

¹² Mãɨpuru nemietá itu mãra chipari papirãt'ɨ. Mãɨya mãra k'ak'ua piui bɨpa nemietá oo k'ɨ̃ria bɨt'a mãrapa waa oodaiwẽma.

¹³ Mãra k'ak'uá itu nemietá oopirãt'ɨ. Mãɨpari ara mãra Tachi Ak'õrea teat'ɨ. Mãra nemietaade piu p'anana Tachi Ak'õre pae chok'ae p'aneesidama. Mãɨpuru mãra k'ak'ua Tachi Ak'õrea teat'ɨ jĩp'a oodai k'orea.

¹⁴ Tachi Ak'õrepa ichi sõpiadepa mãra k'aripada pẽra mãɨnepa Moisepa bɨdadepa p'anɨwẽ pẽra, nemietá waa mãra chipari paiwẽma.

Jĩp'a oodai k'orea

¹⁵ ¿Mãɨnepema sãmaasã́ k'ɨ̃risia p'anɨma? Tachi Ak'õrepa ichi sõpiadepa tachi k'aripada pẽra mãɨnepa tachi Moisepa bɨdadepa p'anɨwẽ pẽra ¿nemietá oodai p'anɨk'ãra? ¡Mãɨyawẽma!

¹⁶ Mãrapa k'awa p'anɨma ara mastu abaɨ pae pari mimiapataɨrã p'ananai k'orea teadaipɨra, chi chiparipa jararu jõma oodai p'anɨt'a. Ara mãɨ jĩra mãrapa nemietá mãra chipari jĩra bɨdaipɨra, nemietá oodak'ari piudaipɨ. Maamina Tachi Ak'õre mãra chipari bɨdaipɨra, ichi pedea ooutade jĩp'a nipadaipɨ.

¹⁷ Naena mãra nemietá pae pari mimiapataɨrã pasima. Maamina jõma Tachi Ak'õre k'orea jarateadada sõnepa oo p'anɨ pẽra mɨa Tachi Ak'õrea sõpia bɨade aparima.

¹⁸ Mãra nemietá oodaadadepema pari ãjã́ p'aneenak'ari Tachi Ak'õre pae pari mimiapataɨrã p'aneesidama jĩp'a oodai k'orea.

¹⁹ Mɨa mãɨya pedea bɨma nãɨ k'ɨ̃risia jarateai k'orea. Mãɨya jaratea bɨma mãrapa mãɨ ãarea ará k'ɨ̃risia ãyá ũripidaemaapa. Piarã naena mãrapa ara mastu teasidama nemietá pae pari mimiapataɨrã p'ananai k'orea. Mãɨya mãrapa k'ĩra p'era oosidaɨde, jõma nemietá ewaricha atepe oo p'anapachidama. Maamina naapae Tachi Ak'õre pae pari mimiapataɨrã pẽra ara mastu teat'ɨ jĩp'a oodai k'orea. Mãɨya Tachi Ak'õre pae pia p'ananaipɨ.

²⁰ Mãra nemietá pae pari mimiapataɨrã paside jĩp'a oodai k'ɨ̃risiadak'a pasima.

²¹ Maamina nemietá oo p'anɨnepa ¿k'ãre pia jitasidama? ¿Mãɨya oo p'anana k'orea, k'ĩra p'era p'anɨwẽk'ãra? Nemietá oo p'anɨ k'orea ẽpẽrarã piudaipɨ.

²² Naapae mãra nemietá oodaadadepema pari ãjã́ p'aneenana pẽra Tachi Ak'õre pae pari mimiapataɨrã p'aneesidama. Mãɨya Tachi Ak'õre pae pia p'aneesidama. Mãɨpuru ichi ome ewaricha chok'ae p'ananaipɨ.

²³ Piarã nemietá oo p'anɨ k'orea ẽpẽrarã piudaipɨ. Maamina Tachi Chipari Jesucristodepa Tachi Ak'õrepa ewaricha chok'ae bapiipɨ, ne pari tea bɨ jĩra.