Romano 4 - Tachi Ak'õre Pedea

Abrahanpa Tachi Ak'õrene ĩjãana

¹ ¿K'ãre jaradaima Abrahán, chi tai judiorã chõarãenapema k'ak'uade bada k'orea?

² Abrahanpa ne oo bɨdepa Tachi Ak'õrepa mãɨ chi ichidirã jĩp'a berã paara bɨdapara, ara ichi k'orea p'ue pia pedeai pasima. Maamina piarã Tachi Ak'õre k'ĩrari p'ue pia pedeaiwẽ pasima.

³ Tachi Ak'õre pedeade nãɨya jara bɨma: «Abrahanpa Tachi Ak'õrene ĩjãasima. Mãɨ k'orea Tachi Ak'õrepa ichi nepɨra newẽa bɨade a jarasima».

⁴ Chi mãɨ mimiaipɨra, ichi erreara pari teak'ama, mãɨpari ichi mimiana pari chi chiparipa teaipɨ.

⁵ Maamina chi ne oowẽa bɨpa Tachi Ak'õrene ĩjãaipɨra, Tachi Ak'õrepa mãɨ chi ichidirã jĩp'a berã paara bɨipɨ. Chi nemietá oo berãpa Tachi Ak'õrene ĩjãasidara Tachi Ak'õrepa ãchi chi ichidirã jĩp'a berã paara bɨparima.

⁶ Ara mãɨ jĩra Davipa jarasima: Tachi Ak'õrepa chi mãɨ ne oowẽa bɨt'a chi ichidirã jĩp'a berã paara bɨipɨra minachia pia baipɨ.

⁷ Nãɨya jarasima: «Chi ẽpẽrarãpa Moisepa bɨda oodawẽa p'anana mãɨnepa nemietá oodada Tachi Ak'õrepa k'ɨ̃risia atuasira minachia pia p'ananaipɨ.

⁸ Ẽpẽrapa nemietá ooda k'orea Tachi Chiparipa nepɨra newẽa bɨade aipɨra, mãɨ ẽpẽra minachia pia baipɨ».

⁹ Mãɨya ¿abapuru chi k'ak'ua tauchaa bet'a minachia pia p'ananaik'ãra? ¿K'ak'ua tauchaawẽa be sida minachia pia p'ananaiwẽk'ãra? Taipa jarasidama Abrahanpa Tachi Ak'õrene ĩjãana pẽra Tachi Ak'õrepa ichi nepɨra newẽa bɨade a jarasit'a.

¹⁰ Maamina ¿Tachi Ak'õrepa ichi sãmaasã́ nepɨra newẽa bɨade a jarasima? ¿Nepɨrawẽa bɨade a jarasik'ãra ichi k'ak'ua tauchaak'ari wa tauchaai naena? Piarã ichi k'ak'ua tauchaai naena Tachi Ak'õrepa ichi nepɨra newẽa bɨade a jarasima.

¹¹ Abrahanpa Tachi Ak'õrene ĩjãana pẽra, k'ak'ua tauchaawẽa badamina Tachi Ak'õrepa ichi nepɨra newẽa bɨade a jarasima. Mãɨ k'awapii k'orea Abrahanpa k'aadea ichi k'ak'ua tauchaasima. K'ak'ua tauchaawẽa berãpa Tachi Ak'õrene ĩjãanaipɨra, Abrahán ãchi ak'õrepɨ, abarik'a ĩjãa p'anɨnepa Tachi Ak'õrepa nepɨra newẽa p'anɨane a jara bɨ pẽra.

¹² Mãɨnepa Abrahanpa ichi k'ak'ua tauchaai naena ĩjãa bada jĩra k'ak'ua tauchaa berãpa ĩjãanaipɨra Abrahán ãchi ak'õrepɨ.

¹³ Tachi Ak'õrepa Abrahaná mãɨnepa ichidepa chedai pada ẽpẽrarã́ nãɨ ĩjũa teayade asima. Maamina mãɨya jaraé pasima Abrahanpa Moisepa bɨda uru bɨda pẽra. Mãɨpari mãɨya jarasima Abrahán nepɨra newẽa bɨade a jarada pẽra. Mãɨya nepɨra newẽa bɨade a jarasima Abrahanpa ichide ĩjãana pẽra.

¹⁴ Moisepa bɨda uru berãpa Tachi Ak'õrepa teai jarada jitautapara, tachi pari Cristode ĩjãa p'ananai pasima mãɨnepa Tachi Ak'õrepa teai jarada jitadaiwẽ pasima.

¹⁵ Mãɨ Moisepa bɨda jara bɨ jĩra oowẽa p'anɨnepa, Tachi Ak'õrepa tachi ɨtɨaipɨ. Piarã Moisepa bɨda nea badapara, nepɨra pará p'ananaiwẽ pasima.

¹⁶ Tachi Ak'õrepa teai jarada tachia jitadaipɨ ichide ĩjãa p'anɨ pẽra. Tachi Ak'õrepa ichi sõpiadepa mãɨ pari tea bɨma. Mãɨpuru jõma Abrahán ẽpẽrarã, chi Moisepa bɨdadepa p'anɨrãpa, mãɨ piarã jitadaipɨ. Maamina abapuru ãchiapuru jitadaiwẽma, mãɨpari judiorãwẽ pida Abrahán jĩra Tachi Ak'õrene ĩjãanaipɨra jitadaipɨ. Mãɨya Abrahán jõma tachi, chi Tachi Ak'õrene ĩjãa berã ak'õrepɨ.

¹⁷ Tachi Ak'õre pedeade nãɨya bɨ bɨma: «Mɨa pɨ bɨsima chok'ará p'uuru be ak'õre bamẽrá». Piarã Tachi Ak'õre k'ĩrari Abrahán jõma tachi, chi Tachi Ak'õrene ĩjãa berã ak'õrepɨ. Abrahanpa ĩjãa basima chi piudada chok'ae p'irabaripiparí mãɨnepa chi nenea bɨdepa ne ooparí Tachi Ak'õrene.

¹⁸ Tachi Ak'õrepa nãɨya jarasima: «Pɨdepa chedaadarã chok'ará tuananaipɨ». Abrahanpa p'ue warra unuiwẽ k'awa bɨmina ĩjãasima Tachi Ak'õrepa warra unupiit'a ichia jarada jĩra. Mãɨya ĩjãa bɨdepa chok'ará p'uuru berã ak'õre beesima Tachi Ak'õrepa jarada jĩra.

¹⁹ Warra unui k'orea minachia chõa basimina Abrahanpa mãɨ wapida minachia ĩjãa basima. Ichi perá cien ãyo basima. Ichi k'ima Sara pida warra t'õiwẽa bɨ k'awa basimina ichia wapida minachia ĩjãa basima.

²⁰ Mi ãpia pida k'ɨ̃risiaé pasima Tachi Ak'õrepa teai jarada teaiwẽt'a. Mãɨpari sõnepa piarã minachia ĩjãa basima mãɨnepa Tachi Ak'õrea pia pedeapachima.

²¹ K'awa basima Tachi Ak'õrepa ooi jarada piarã jõma p'ue ooit'a.

²² Mãɨya ĩjãana pẽra Tachi Ak'õrepa nepɨra newẽa bɨade a jarasima.

²³ Chi Tachi Ak'õre pedeade mãɨya bɨ bɨt'a ichi paepuru bɨé pasima.

²⁴ Mãɨpari tachi k'orea pida pedea bɨma, tachia ĩjãa p'anɨnepa Tachi Ak'õrepa nepɨra newẽa p'anɨane a jara bɨ pẽra. Tachi Ak'õrepa Tachi Chipari Jesú piu bada chok'ae p'irabaripisima. Ara mãɨne tachia ĩjãa p'anɨma.

²⁵ Ichia Jesú bɨsima tachi nemietá k'orea piumẽrá. Maapae piu badadepa chok'ae p'irabaripisima tachi chi ichidirã jĩp'a berã paara bɨi k'orea.