Romano 3 - Tachi Ak'õre Pedea

¹ Mɨa mãɨya jara bɨ pẽra, abaɨpa nãɨya k'ɨ̃risiaima: «¿K'ãarea ɨmɨk'ĩra k'ak'ua tauchaa bɨima? mãɨnepa ¿mãɨ judiorã k'aepẽra judiorãwẽ Tachi Ak'õre k'ĩrari atepe p'anɨma?»

² Mãɨyawẽma. Ne wawariadepa judiorã pai minachia pia bɨma. Naa mɨa jararuma mãɨya p'anɨt'a Tachi Ak'õrepa ichi pedea ãchiá teada pẽra.

³ Maamina chi eda ãchidiidepemarãpa chi ãchia oodai p'anɨ jĩra oodaé pasima. ¿Mãɨ k'orea Tachi Ak'õrepa ooi jarada ooiwẽk'ãra?

⁴ Mãɨyawẽma. Tachi Ak'õrepa ooi jarada piarã jõma ooipɨ. Ẽpẽrarã seajarapatamina Tachi Ak'õrepa ooparima ichia jara bɨ jĩra. Ichi Pedeade nãɨya bɨ bɨma: «Jõmãɨrãpa k'awadaipɨ pɨa jara bɨ jĩp'a bɨt'a; abaɨ pida pɨ k'orea k'achia pedearude pɨa k'awapiipɨ pɨ jĩp'a bɨt'a».

⁵ Mɨ pedearuma ẽpẽrarã pedeapata jĩra. Chi eda waapẽarãpa jarapatama nemietá oo p'anɨnepa, chi Tachi Ak'õre jĩp'a bɨt'a unupipataade apatama. Mãɨne Tachi Ak'õrepa ɨtɨaipɨra, ichi jĩp'a bɨwẽane apatama. ¿Chi mãɨya jara p'anɨa k'ãre jaradaima? ¿Jaradaik'ãra Tachi Ak'õre jĩp'a bɨwẽt'a, tai ɨtɨai pẽra?

⁶ ¡Piarã mãɨyawẽma! Tachi Ak'õre mãɨya jĩp'a bɨwẽpara, ¿sãmaasã́ nãɨ ĩjũanepemarã nepɨra ak'ɨi pasima?

⁷ Chi eda waapẽarãpa jarapatama sea jara p'anɨnepa, chi Tachi Ak'õre seak'apɨ́ pia unupipataɨt'a. K'ɨ̃risiapatama ãchia sea jara p'anɨ k'orea ẽpẽrarãpa Tachi Ak'õrea atepe pia pedeadait'a. Mãɨpuru ãchimá, Tachi Ak'õrepa nepɨra ak'ɨiwẽa bɨma.

⁸ Mãɨyara ¿tachia nemietá oodai p'anɨk'ãra ẽpẽrarãpa Tachi Ak'õrea pia pedeadamẽrá? Chi eda waapẽarãpa ãchi k'ɨ̃risia k'achiadepa jarapatama taipa mãɨya jaratea p'anɨt'a. Chi mãɨya jara berã Tachi Ak'õrepa piarã nepɨra pará p'anɨane aipɨ.

Ẽpẽra jĩp'a bɨ newẽma

⁹ Mãɨpuru ¿k'ãre jaradaima? ¿Jaradaik'ãra tai judiorã waapẽarã k'aepẽra atepe pia p'anɨma? ¡Mãɨyawẽma! Mɨa nãɨ k'art'ade k'awapisima judiorãpa mãɨnepa judiorãwẽpa nemietá oopataɨt'a.

¹⁰ Mãɨ k'orea Tachi Ak'õre pedeade nãɨya bɨ bɨma: «Ẽpẽra jĩp'a bɨ aba pida newẽma.

¹¹ Mi aba pida k'awa bɨma k'ãre jĩp'a bɨt'a. Mi aba pida Tachi Ak'õre jɨrɨk'ama.

¹² Jõmãɨrã o ãyá wãsidama. Jõmãɨrã Tachi Ak'õre k'ĩrari piawẽa p'aneesidama. Mi aba bɨ pida pia ook'ama. Pia oo bɨt'a aba pida newẽma.

¹³ Ãchia k'achia pedeapataɨ piuda t'ɨbaripataɨmá chi uria ewa nɨbɨ jĩra bɨma. Ãchi it'aedepa seajarapatama. Ãchia jara p'anɨnepa waapẽarã piawẽa oopatama taamapa k'aaru jĩra.

¹⁴ Unuemaa p'anɨnepa ãchi it'aedepa k'achia pedeapatama.

¹⁵ Paritua mĩa peapatama.

¹⁶ Ãchi wãutacha waapẽarã mĩapidak'ari, nepɨrade baepipatama.

¹⁷ Waapẽarã ome ne k'ɨ̃risiawẽa p'ananait'a atua p'anɨma.

¹⁸ Ãchia Tachi Ak'õre mi ãpia pida wap'eadak'ama».

¹⁹ Mãɨ pedea Tachi Ak'õre pedeade bɨt'a chi mãɨ bɨda ũri berã́ jara bɨma. Mãɨya mi ãpia pida p'ue nemietaawẽa bɨade a jarawẽma. Mãɨ Moisepa bɨdadepa k'awa p'anɨma jõma nãɨ ĩjũanepemarã Tachi Ak'õre k'ĩrari nepɨra pará p'anɨt'a.

²⁰ Piarã Moisepa bɨda oo bɨdepa mi ãpia pida Tachi Ak'õrepa chi ichidirã jĩp'a berã paara bɨiwẽma. Mãɨ Moisepa bɨdadepa k'awapi bɨma tachia nemietá oopataɨ.

Tachi Ak'õrepa Jesucristodepa ẽpẽrarã chi ichidirã jĩp'a berã paara bɨparima

²¹ Maamina idiapae Tachi Ak'õrepa k'awapisima mãɨ Moisepa bɨ bada awara sãmaasã́ ẽpẽrarã chi ichidirã jĩp'a berã paara bɨpariit'a ara ichia jara bada jĩra. Moisepa bɨdade mãɨnepa Tachi Ak'õre pari pedeapataɨrãpa bɨdada k'art'ade pida mãɨ k'orea bɨ bɨma.

²² Mãɨya Tachi Ak'õrepa ara ichia jararut'a ooparima, mãɨ Jesucristo ichi piuside ichi Ak'õre pedea ũri basi pẽra. Mãɨya ichia chi ãarea Jesude ĩjãautat'a chi ichidirã jĩp'a berã paara bɨparima. Aba pida k'ĩra awara unuk'ama.

²³ Piarã jõmãɨrãpa nemietá oopata pẽra Tachi Ak'õre pia bɨdepema awara p'anɨma.

²⁴ Maamina Tachi Ak'õrepa ichi sõpiadepa ẽpẽra chi ichidirã jĩp'a berã paara bɨparima pari ne tearu jĩra. Mãɨya jaraparima Jesucristopa nemietaadepema k'aripada pẽra.

²⁵ Tachi Ak'õrepa Jesucristo bɨsima ichi oa ãrimẽrá tachi nemietá k'orea. Mãɨne ĩjãautade Tachi Ak'õrepa tachi nemietá k'ɨ̃risia atuaparima. Mãɨpa unupi bɨma Tachi Ak'õre jĩp'a bɨt'a tachi k'aripai k'orea. Cristo chei naena nemietá oodada Tachi Ak'õrepa ãarea choa bɨdepa ɨtɨawẽa basima.

²⁶ Idiapae ichia Jesucristodepa tachi k'aripa bɨma, ichi jĩp'a bɨ pẽra. Ichia jararut'a ara mãɨya oopari pẽra, chi Jesude ĩjãautat'a chi ichidirã jĩp'a berã paara bɨparima.

²⁷ Mãɨpuru ¿k'ãre ara tachi k'orea pia pedeadaima? P'ue pia pedeadaiwẽma. ¿K'ãre k'orea? P'ue pia pedeadaiwẽma, Moisepa bɨda oo p'anɨnepa Tachi Ak'õrepa tachi chi ichidirã jĩp'a berã paara bɨiwẽ pẽra, mãɨpari Jesude ĩjãa p'anɨnepa mãɨya bɨipɨ.

²⁸ Tachia jaratea p'anɨma Jesude ĩjãa p'anɨnepa Tachi Ak'õrepa tachi chi ichidirã jĩp'a berã paara bɨit'a. Mãɨya jarak'ama, Moisepa bɨdade ĩjãa p'anɨnepa.

²⁹ Mãɨyawẽpɨra ¿Tachi Ak'õre abapuru chi judiorã ãchi Ak'õrek'ãra? ¿Ichi chi judiorãwẽ Ak'õrewẽk'ãra? Piarã ichi chi judiorãwẽ Ak'õrepɨ,

³⁰ ichi aba bɨ pẽra. Ichia jõma Jesude ĩjãautat'a chi ichidirã jĩp'a berã paara bɨparima. K'ak'ua tauchaa berãpa mãɨnepa k'ak'ua tauchaawẽa berã pida Jesude ĩjãasidara chi ichidirã jĩp'a berã paara bɨparima.

³¹ Jesude ĩjãa p'anɨ pẽra ¿Moisepa bɨda itu bɨdai p'anɨk'ãra? Mãɨyawẽma, mãɨpari mãɨ Moisepa bɨda pia unupatama.