Romano 2 - Tachi Ak'õre Pedea

Tachi Ak'õrepa jõmãɨrã ɨtɨai bɨma

¹ Mãɨya bɨde abaɨ pida k'ɨ̃risiaiwẽa bɨma Tachi Ak'õre k'ĩrari nepɨra pará bɨwẽt'a. Chi atepe jĩp'a oo bɨade a bɨpa mãɨya k'ɨ̃risiaiwẽa bɨma. Abaɨpa nemietá oo bɨade a jararude ara ichi k'orea jara bɨma, ichia pida abarik'a mãɨ jĩra oopari pẽra.

² Tachia k'awa p'anɨma Tachi Ak'õrepa nemietá oopataɨrã ɨtɨaparit'a, ichi pedea piarãpẽanepa.

³ Mãɨya pɨa waapẽarãpa nemietá oo p'anɨane aipɨra, maamina abarik'a oo bɨpɨra, k'ɨ̃risiaiwẽa bɨma Tachi Ak'õrepa mãɨ nepɨra ak'ɨiwẽt'a.

⁴ Pɨa itu bɨ bɨma Tachi Ak'õrepa tachi ome minachia sõpia bɨt'a, ãarea choa bɨt'a mãɨnepa nemietá ooda isapea ɨtɨak'á bɨt'a. ¿Pɨa k'awawẽa bɨk'ãra Tachi Ak'õre sõpia baparima pɨ ome, ichia k'ɨ̃ria bɨẽra pɨa nemietá ooparí itu bɨk'ari ichimá chemẽrá?

⁵ Maamina k'ɨɨrɨwẽa bɨ pẽra pɨ nemietá itu bɨk'ama Tachi Ak'õremá cheemaapa. Mãɨ k'orea Tachi Ak'õrepa ɨtɨai ewaride ichi k'ĩruuk'ari atepe ɨtɨaipɨ. Mãɨ ewaride Tachi Ak'õrepa unupiipɨ sãmaasã́ jõmãɨrã jĩp'a ɨtɨait'a.

⁶ Ichia jõmãɨrã́ teaipɨ ãchia oodada jĩra.

⁷ Chi eda waapẽarãpa pia oo p'anɨma Tachi Ak'õrepa ãchi pia unumẽrá, pia jaramẽrá mãɨnepa ewaricha ãchi ome chok'ae bamẽrá. Mãɨrã piarã chok'ae p'anapiipɨ.

⁸ Maamina chi eda waapẽarãpa waapẽarã k'aepẽra pia p'ananai k'orea jɨrɨpatama. Mãɨpuru chi piarãpẽa pedea ĩjãanai k'ɨ̃rianak'ama mãɨnepa nemietaade p'anapatama. Mãɨ ẽpẽrarã Tachi Ak'õrepa ichi k'ĩruupidepa minachia ɨtɨaipɨ.

⁹ Ichia ɨtɨarude jõma nemietá oo berã minachia mĩa p'ananaipɨ mãɨnepa sõp'ua p'ananaipɨ. Naa judiorã mãɨnepa judiorãwẽ sida mãɨya p'ananaipɨ.

¹⁰ Maamina jõma pia oo berã Tachi Ak'õrepa pia unuipɨ, pia jaraipɨ mãɨnepa ne k'ɨ̃risiawẽa bapiipɨ. Naa judiorã mãɨnepa judiorãwẽ sida mãɨya ooipɨ.

¹¹ Tachi Ak'õrepa ẽpẽrarã ãarea abarik'a nepɨra ak'ɨipɨ.

¹² Chi Moisepa bɨda atua berãpa nemietá oopata pẽra mãɨ Moisepa bɨda atua p'anɨmina Tachi Ak'õrepa ɨtɨaipɨ. Mãɨnepa mãɨ Moisepa bɨda k'awa berãpa nemietá oopata pẽra Tachi Ak'õrepa ara mãɨ Moisepa bɨdadepa ãchi nepɨra ak'ɨipɨ.

¹³ Moisepa bɨda ũri p'anɨnepa ẽpẽrarã Tachi Ak'õre k'ĩrari jĩp'a p'aneenaiwẽma, mãɨpari mãɨ ãarea oo p'anɨnepa Tachi Ak'õrepa ãchi nepɨra newẽa p'anɨane aima.

¹⁴ Judiorãwẽpa mãɨ Moisepa bɨda atua p'anɨmina ãchi k'ɨ̃risiadepa mãɨ Moisepa bɨdade jara bɨ jĩra edaɨde oopatama. Mãɨya ooutade, unupipatama ãchia k'awa p'anɨt'a k'ãret'u pia wa k'ãret'u nemietá.

¹⁵ Ara ãchia oo p'anɨnepa unupi p'anɨma mãɨ Moisepa bɨdade jara bɨ sõnepa k'awa p'anɨt'a. Ãchi k'ɨ̃risiade k'awa p'anɨma nepia ooutade, ne k'ɨ̃risiawẽa p'anaparima. Mãɨpari nemietá ooutade, sõp'ua p'anaparima.

¹⁶ Jõmãɨrãpa ãchi sõne mẽra uru p'anɨt'a Tachi Ak'õrepa nepɨra ak'ɨi ewaride Jesucristodepa mãɨ ak'ɨipɨ. Mɨa chi pedea pia jaratea bɨ jĩra ara mãɨya baipɨ.

Judiorãpa Moisepa bɨdade jara bɨ jĩra oodak'ama

¹⁷ Mãra judiorãpa mãrat'u chi piarãpẽane apatama. Tachi Ak'õre pia k'awa p'anɨane apatama. K'ɨ̃risia p'anɨma ichia mãra k'aripait'a Moisepa bɨda uru p'anɨ pẽra.

¹⁸ Mãɨ Moisepa bɨda uru p'anɨ pẽra k'awa p'anɨma Tachi Ak'õrepa k'ãre k'ɨ̃ria bɨt'a mãɨnepa k'ãre jĩp'a bɨt'a.

¹⁹ Mãrapa k'ɨ̃risia p'anɨma Tachi Ak'õrene ĩjãanak'apɨɨrã́ p'ue pia jaratea p'ananait'a tau p'ãrio berã ateeuta jĩra, p'ãrione berã ɨnaanea ateeuta jĩra.

²⁰ Moisepa bɨda uru p'anɨ pẽra k'ɨ̃risia p'anɨma jõma k'ɨ̃risia uru p'anɨt'a mãɨnepa chi piarã pedea sida k'awa p'anɨt'a. Mãɨpuru k'ɨ̃risia p'anɨma k'ɨ̃risia newẽa berã́ mãɨnepa chi wapida minachia atua berã́ pida p'ue jaratea p'ananait'a.

²¹ Mãrapa waapẽarã́ mãɨya jaratea p'anɨpɨra, ¿k'ãarea ara machiaapuru jarateadawẽma? Mãrapa nechɨak'á bɨade a jarateapatama. Maamina mãra nechɨapatama.

²² Mãrapa k'ima awaraɨ ome k'ãik'á bɨade a jarateapatama. Maamina mãra k'ima awaraɨ ome k'ãipatama. Mãrapa k'ɨ̃rianak'ama juapa oodada sãdoa pia pedeadait'a. Maamina mãɨ sãdo tede mãrapa nechɨapatama.

²³ Moisepa bɨda mãrapa minachia k'awa p'anɨane apatama. Maamina mãɨ Moisepa bɨdade jara bɨ ĩjãanawẽa p'anɨ pẽra, mãra k'orea waapẽarãpa Tachi Ak'õre k'orea piawẽa pedeapatama.

²⁴ Mãɨpuru Tachi Ak'õre pedeade nãɨya bɨ bɨma: «Judiorãwẽpa Tachi Ak'õre k'orea k'achia pedeapatama mãra judiorãpa piawẽa oopata k'orea».

²⁵ Mãrapa Moisepa bɨda oosidara, mãra k'ak'ua tauchaada pia bɨma ẽpẽrarã Tachi Ak'õrenepemarã pẽra. Maamina mãɨ Moisepa bɨ bɨ jĩra oodaepɨra, mãra Tachi Ak'õre k'ĩrari k'ak'ua tauchaawẽa be jĩra p'anɨma.

²⁶ Mãɨne judiorãwẽpa mãɨ Moisepa bɨda oo p'anɨpɨra, k'ak'ua tauchaawẽa p'anɨmina Tachi Ak'õre k'ĩrari k'ak'ua tauchaa bɨ jĩra p'anɨma.

²⁷ Mãra judiorã k'ak'ua tauchaapatama unupidai k'orea Tachi Ak'õre ẽpẽrarãt'a. Mãɨnepa Moisepa bɨda k'awa p'anɨma. Maamina mãɨ Moisepa bɨda oodawẽa p'anɨma. Mãɨpuru chi k'ak'ua tauchaawẽa p'anɨpa mãɨ Moisepa bɨda oodaipɨra, k'awapidaipɨ mãra judiorãmina nepɨra pará p'anɨt'a.

²⁸ Aba pida judiowẽma chi judiorãpa oopataɨ oo bɨẽra. Mãɨnepa k'ak'ua tauchaada ara nãɨ k'ak'uadepemawẽma.

²⁹ Mãɨyawẽapuru Tachi Ak'õremá, chi sõ jĩp'a bɨt'a mãɨt'u judio piarãpẽapɨ. Chi Moisepa bɨdade bɨ bɨ jĩra k'ak'ua tauchaa bɨade aparí judio piarãwẽpɨ, mãɨpari chi Tachi Ak'õre Jaorepa mãɨya sõne jĩp'a bɨparipɨ. Ẽpẽrarãpa chi sõ jĩp'a bɨ k'orea pia jaradak'amina Tachi Ak'õrepa mãɨ k'orea pia jaraparima.