Romano 15 - Tachi Ak'õre Pedea

Waapẽarã k'aripat'ɨ pia p'ananamẽrá

¹ Tachia ĩjãa p'anɨ k'orea minachia k'awa berãpa tachia k'ɨ̃ria p'anɨ k'aepẽra, chi pia atua k'ede k'aripadai p'anɨma.

² Mãɨpari waapẽarãpa k'ɨ̃ria p'anɨt'a oodai p'anɨma ãchi pia p'ananamẽrá mãɨnepa pia ĩjãanamẽrá.

³ Piarã Cristo pida ara ichia k'ɨ̃ria bɨt'a ooé pasima, mãɨpari Tachi Ak'õre pedeade bɨ bɨ jĩra mãɨyasima. Nãɨya bɨ bɨma: «Tachi Ak'õre, ãchia pɨ k'orea k'achia pedeasidaɨde mɨ k'orea pida k'achia pedeasidama».

⁴ Nejõma Tachi Ak'õre pedeade bɨda tachiá jarateai k'orea bɨma. Tachi sõpiapiparima mãɨnepa k'aripaparima jõma choadamẽrá. Mãɨya tachia piarã k'awa p'anɨma Tachi Ak'õre ome ewaricha pia p'ananait'a.

⁵ Mɨa k'ɨ̃ria bɨma ara mãɨ tachi sõpiapiparí mãɨnepa choapiparí Tachi Ak'õrepa mãra k'aripa bait'a, abarik'a k'ɨ̃risiadamẽrá Jesucristopa k'ɨ̃ria bɨ jĩra.

⁶ Mãɨya mãrapa Tachi Pajãnepema Chipari Jesucristo Ak'õrea ará pia pedea p'ananaipɨ.

Chi pedea pia Cristodé judiorãwẽ pae pida bɨma

⁷ Cristopa mãra pia atada jĩra chi pia atat'ɨ. Mãɨ unuutade ẽpẽrarãpa Tachi Ak'õrea pia pedeadaipɨ.

⁸ Mɨa jararuma: Cristo chesima tai judiorã k'aripai k'orea. Tachi Ak'õrepa judiorã chõarãenapemarã ome pedea bɨda Cristopa oosima. Mãɨpa unupisima Tachi Ak'õrepa jara bɨ jĩra ooparit'a.

⁹ Mãɨnepa Cristo chesima judiorãwẽpa Tachi Ak'õrea pia pedeadamẽrá ãchi k'ĩra chupuriada pẽra. Mãɨnepema Tachi Ak'õre pedeade nãɨya bɨ bɨma: «Mɨa judiorãwẽ t'ãena pɨá pia pedeaipɨ. Mɨa pɨá pia k'ariipɨ».

¹⁰ Mãɨnepa nãɨya bɨ bɨma: «Mãra judiorãwẽ, Tachi Ak'õre p'uuru ome arapaat'ɨ».

¹¹ Mãɨnepa nãɨya bɨ bɨma: «Jõma mãra judiorãwẽ, Tachi Chiparia pia pedeat'ɨ. Jõma p'uuru berã, ichiá pia pedeat'ɨ».

¹² Mãɨnepa Isaíapa ichi k'art'ade nãɨya bɨsima: «Jesedepa aba cheipɨ. Mãɨ jõma p'uuru be Chipari beeipɨ. Judiorãwẽpa ichide ĩjãanaipɨ nejõma pia nɨ p'anɨt'a ãchiá teamẽrá».

¹³ Nejõma pia tachia nɨ p'anɨt'a Tachi Ak'õrepa teaipɨ. Mãrapa ichide ĩjãa p'anɨ pẽra mɨa k'ɨ̃ria bɨma ichia mãra minachia arapaapiit'a mãɨnepa ne k'ɨ̃risiawẽa p'anapiit'a. Mãɨya Tachi Ak'õre Jaore jua chaareadepa mãrapa pia k'awadaipɨ nejõma pia tachia nɨ p'anɨt'a piarã atadaipɨ.

Pablopa judiorãwẽa jarateaparima

¹⁴ Ũpẽarã, mɨa k'awa bɨma mãrapa piarã pia oo p'anɨt'a mãɨnepa minachia k'awa p'anɨ pẽra machit'u p'ue chi jaratea p'ananait'a.

¹⁵ Maamina nãɨ k'art'ade mɨa k'ɨ̃risia wawaria piarã bɨsima, mãrá k'ɨ̃risia atuapidaemaapa. Mãɨya bɨsima Tachi Ak'õrepa ichi sõpiadepa mɨ bɨda pẽra

¹⁶ judiorãwẽ t'ãena Jesucristo pae pari mimiaparí bamẽrá. Mãɨpuru pedea pia Tachi Ak'õre k'orea ãchiá jaratea bɨma. Ĩjãasidara p'aare judiopa ãnimara paatearu jĩra mɨa ãchi Tachi Ak'õrea tearuma pia unumẽrá. Mãɨne Tachi Ak'õre Jaorepa ãchi Tachi Ak'õre pae pia bɨipɨ.

¹⁷ Jesucristo ome bɨ pẽra mɨa Tachi Ak'õre pae oo bɨ k'orea minachia arapá bɨma.

¹⁸ Maamina ara mɨchi k'orea mi ãpia pida pia pedeaiwẽma. Abapuru Cristopa mɨnepa ooda k'orea pia pedeaipɨ. Piarã mɨnepa Cristopa k'aripasima judiorãwẽpa Tachi Ak'õrene ĩjãanamẽrá. Mɨa jaratea bɨdepa, oo bɨdepa,

¹⁹ mãɨnepa ẽpẽerãpa ne p'ue oodak'apɨɨdepa mãɨya k'aripasima. Mɨa Tachi Ak'õre Jaore jua chaareadepa jõma mãɨ ãarea oosima. Jerusalenepa Ilírico tuadea chi pedea pia Cristo k'orea mɨa jõma jarateai badamá jarasima.

²⁰ Piarã chi pedea pia Cristo k'orea mɨa jaratea k'ɨ̃ria bɨma waidi ũrinak'aɨrãmá. Abaɨpa jaratea bɨmá, mɨ mimia k'ɨ̃riawẽma.

²¹ Mãɨya mɨa Tachi Ak'õre pedeade bɨ bɨ jĩra oo bɨma. Nãɨya bɨ bɨma: «Ichi k'orea jaradawẽa p'anɨrã́, ãchia ununaipɨ. Ichi k'orea ũrinawẽa p'anɨrã, ãchia k'awadaipɨ».

Pablo Roma p'uurudea wãi k'ɨ̃risiada

²² Mãɨ k'orea bari k'ak'o minachia mɨ mãramá wã k'ɨ̃ria bɨmina, p'ue wãwẽa bɨma.

²³ Maamina nãma jõma jarateada pẽra ara nãma k'ait'a newẽma sãma Cristo k'orea jarateait'a. Ewari k'ak'o minachia tãaraa pa basima mɨ mãramá wã k'ɨ̃ria bɨẽra,

²⁴ España tuadea wãrune mãra ak'ɨi k'ɨ̃ria bɨma. Mãra ome tãaraa arapá p'aneenak'ari, k'ɨ̃ria bɨma mãrapa mɨ k'aripadait'a, pia wãmẽrá.

²⁵ Maamina ara nãɨena mɨ Jerusalenea wãipɨ erreara Tachi Ak'õre ẽpẽrarã́ teai k'orea.

²⁶ Mãɨ erreara ũpẽarã Macedonia tuadepemarãpa mãɨnepa Acaya tuadepemarãpa arapá jɨrɨp'esidama, Tachi Ak'õrene ĩjãapataɨrã Jerusalenepemarã chi nenea k'ede k'aripadai k'orea.

²⁷ Mãɨ ũpẽarã judiorãwẽpa mãɨ erreara ũpẽarã judiorã pae arapá jɨrɨp'esidama. Piarã mãɨya oodai p'anasidama judiorã́ tee pará p'anɨ jĩra. Judiorãwẽpa nejõma pia Tachi Ak'õre k'orea judiorãnepa jitadada pẽra, ũpẽarã judiorã́ nepia nãɨ ĩjũanepema teadai p'anɨma.

²⁸ Mãɨ erreara ũpẽarã Jerusalenepemarã́ teak'ari mɨ España tuadea wãipɨ. Wãrune mãramá wãipɨ.

²⁹ Mɨa k'awa bɨma mãramá cherude Cristopa tachi minachia k'aripait'a.

³⁰ Ũpẽarã, Tachi Ak'õre Jaoredepa tachi chi k'ɨ̃ria p'anɨma. Mãɨpuru Tachi Chipari Jesucristodepa mɨa mãrá chichupuria idiruma mɨ k'aripadait'a, Tachi Ak'õrea ɨt'aa chiididamẽrá.

³¹ Ichiá ɨt'aa chiidit'ɨ Judea tuadepema Jesude ĩjãanak'apɨɨrãpa mɨ piawẽa oopidaemaapa. Mãɨnepa ɨt'aa chiidit'ɨ mɨa erreara ẽpẽrarã Tachi Ak'õrenepemarã Jerusalenepemarã pae ateerut'a pia jitadamẽrá.

³² Mãɨya Tachi Ak'õrepa k'ɨ̃riaipɨra, mɨ mãramá arapá wãipɨ mãɨnepa mãra t'ãena pia ɨ̃apaa baipɨ.

³³ Mɨa k'ɨ̃ria bɨma chi Tachi Ak'õre tachi ne k'ɨ̃risiawẽa bapiparí jõma mãra ome bait'a. Mãɨya beese.