Romano 14 - Tachi Ak'õre Pedea

Ũpẽarã k'orea ẽk'arra ãpɨte pedeadaiwẽa p'anɨ

¹ Ũpẽa abaɨ pida tachia Jesucristode ĩjãa p'anɨ k'orea wapida pia atua bɨpɨra, ichi pia jitat'ɨ. Maamina ichia atua bɨ k'orea ichi ome k'ĩruu pedearãt'ɨ.

² Mɨa nãɨ jara bɨma: waapẽarã ũpẽarãpa k'awa p'anɨma nejõma k'odai p'anɨ. Maamina chi eda ũpẽarãpa tachia Jesucristode ĩjãa p'anɨ k'orea wapida pia atua p'anɨ pẽra k'ɨ̃risia p'anɨma abapuru ne uu ĩjũanepema k'odai p'anɨ.

³ Maamina chi nejõma k'oparipa chi nejõma k'ok'apɨ́ itu bɨiwẽa bɨma. Mãɨnepa nejõma k'ok'apɨɨpa chi nejõma k'oparí k'achia pedeaiwẽa bɨma, umea Tachi Ak'õrepa jɨrɨ atada pẽra.

⁴ ¿Pɨ k'aima mãɨya abaɨ pae pari mimiaparí k'orea k'achia pedeait'a? Ichi chiparia puru jaraipɨ pia oo bɨ wa piawẽa oo bɨt'a. Maamina Tachi Chiparipa jaraipɨ jõma ichi pae pari mimiapataɨrãpa pia oo p'anɨ, ichi jua chaareadepa k'aripa bɨ pẽra pia oo p'ananamẽrá.

⁵ Mãɨnepa chi eda ũpẽarãpa k'ɨ̃risia p'anɨma chi mimianak'apɨ́ ewari, ewari awaraɨ k'aepẽra atepe piipará bɨma. Chi eda waapẽarã ũpẽarãpa k'ɨ̃risia p'anɨma ewari ãarea abarik'a p'anɨ jĩra p'anɨma. Maamina ãchicha sõnepa k'ɨ̃risia p'anɨ jĩra, mãɨya oodai p'anɨma.

⁶ Chi mimianak'apɨ́ ewari ak'ɨ bɨpa Tachi Chipari pae mãɨya oo bɨma. Chi nejõma k'oparipa mãɨya k'oparima Tachi Chipari wap'ea bɨ pẽra. Mãɨ k'orea nek'orude ichia Tachi Ak'õrea sõpia bɨade aparima. Mãɨnepa chi nejõma k'ok'apɨɨpa mãɨya k'ok'ama Tachi Chipari wap'ea bɨ pẽra. Mãɨ k'orea nek'orude ichia pida Tachi Ak'õrea sõpia bɨade aparima.

⁷ Mi aba pida ara ichi pae chok'ae bɨwẽma. Mãɨnepa mi aba pida ara ichi pae piuiwẽma.

⁸ Chok'ae p'anɨne Tachi Chipari pae chok'ae p'anɨma. Mãɨnepa piusidara Tachi Chipari pae piudaipɨ. Mãɨya chok'ae p'anɨne wa piuutade Tachi Chiparidepɨ.

⁹ Cristo piusima, piudaadarã Chipari pai k'orea. Mãɨnepa chok'ae p'irabarisima, chi chok'ae berã Chipari pai k'orea.

¹⁰ Mãɨpuru ¿k'ãre k'orea pɨ ũpẽa k'orea k'achia pedea bɨma? ¿K'ãre k'orea ichi k'ɨ̃riawẽa bɨma? Tachi ãarea Tachi Ak'õre k'ĩrari p'ananaipɨ tachicha oodada ak'ɨmẽrá.

¹¹ Tachi Ak'õre pedeade nãɨya bɨ bɨma: «Tachi Chiparipa nãɨya jara bɨma: mɨ piarã chok'ae bɨ pẽra piarãnepa jararuma jõmãɨrã mɨ k'ĩrari sĩraporode k'op'aneenak'ari mɨá pia pedeadaipɨ. Mãɨnepa jõmãɨrãpa “mɨ Tachi Ak'õreane” a jaradaipɨ».

¹² Piarã tachicha oodada Tachi Ak'õrea jõma jaradaipɨ.

¹³ Mãɨpuru abaɨpa oo bɨ k'orea waa piawẽa pedeadaiwẽa p'anɨma. Mãɨpari sõnepa nãɨya k'ɨ̃risiadai p'anɨma: tachia oo p'anɨnepa ũpẽa abaɨ sida nemietaade baepidaiwẽa p'anɨma.

¹⁴ Mɨ Tachi Chipari Jesucristo ome bɨ pẽra piarã k'awa bɨma mi ãpia pida chik'o mietá bɨwẽt'a. Maamina abaɨmá paritua chik'o k'oi pia bɨwẽpɨra, makɨɨ k'oiwẽa bɨma.

¹⁵ Mãɨpuru pɨa k'o bɨdepa pɨ ũpẽa ichi sõpiawẽa beepiipɨra, pɨa ichi k'ɨ̃riawẽma. Pɨa k'o bɨdepa pɨ ũpẽa sõk'achiapirãse Cristo ichi k'orea piuda pẽra.

¹⁶ Mãrapa oo p'anɨt'a pia k'awa p'anɨma. Maamina waapẽarãpa mãɨ k'orea k'achia pedeadaipɨra, oorãt'ɨ piawẽa pedeapidaemaapa.

¹⁷ Tachi Ak'õrepa ichi juade p'anɨrã́ jarak'ama k'ãre k'odai p'anɨt'a mãɨnepa k'ãre todai p'anɨt'a. Mãɨpari k'ɨ̃ria bɨma ãchia ichi Jaoredepa jĩp'a oo p'ananait'a, ne k'ɨ̃risiawẽa p'ananait'a mãɨnepa arapá p'ananait'a.

¹⁸ Chi mãɨya Cristo pae mimiapataɨrã Tachi Ak'õrepa pia unu bɨma. Ẽpẽrarã pida pia unupatama.

¹⁹ Mãɨ k'orea jɨrɨdai p'anɨma ũpẽarã ome ne k'ɨ̃risiawẽa p'ananai k'orea. Mãɨya chi k'aripa p'ananaipɨ pia ĩjãanai k'orea.

²⁰ Mãrapa k'o p'anɨnepa Tachi Ak'õrepa waapẽarã sõne ooda itu bɨrãt'ɨ. Piarã Tachi Ak'õre k'ĩrari mãɨ chik'o ãarea pia bɨma. Maamina chi tachia k'o p'anɨnepa abaɨ nemietaade baepidait'a, mãɨ piawẽa bɨma.

²¹ Pia bɨma ne k'iuru k'oiwẽt'a, uvaba toiwẽt'a, wa mi ãpia pida ooiwẽt'a, pɨ ũpẽa nemietaade baepiemaapa.

²² Pɨa nejõma k'oi k'ɨ̃risia bɨpɨra, wa nejõma k'oiwẽ k'ɨ̃risia bɨpɨra, aba pɨapuru Tachi Ak'õre ome pɨ k'ɨ̃risiat'a k'awa bɨma. Piarã tachia oo p'anɨ k'orea tachi sõne piawẽa k'ɨ̃risiadaepɨra, minachia arapá p'ananaipɨ.

²³ Maamina chi «Nãɨ k'oiwẽa bɨade» a k'ɨ̃risia bɨpa mãɨ k'oipɨra, ichi sõne piawẽa beeipɨ, piawẽa oo bɨ k'ɨ̃risia bɨ pẽra. Piarã tachia oo bɨt'a jĩp'a bɨwẽane a k'ɨ̃risiadaipɨra, mãɨya ooutade, nemietá oo p'anɨma.