Romano 13 - Tachi Ak'õre Pedea

Chi minachia k'awa berã juade p'anat'ɨ

¹ Jõmãɨrã nãɨ ĩjũanepema minachia k'awa berã juade p'ananai p'anɨma Tachi Ak'õrepa ãchi mãɨya bɨda pẽra. Newẽma Tachi Ak'õrepa bɨdawẽt'a.

² Mãɨpuru chi nãɨ ĩjũanepema minachia k'awa berã pedea itu bɨrupa Tachi Ak'õrepa bɨda itu bɨruma. Chi mãɨya itu bɨ berã ɨtɨaipɨ.

³ Piarã chi jĩp'a oo bepa ãchi minachia k'awa berãpa ɨtɨait'a wap'eadak'ama, mãɨpari chi nemietá oopataɨrã wap'eapatama. Mãɨpuru mãra minachia k'awa berã ome ne wap'eawẽa p'ana k'ɨ̃ria p'anɨpɨra, pia oot'ɨ ãchia pia ununamẽrá.

⁴ Piarã mãra minachia k'awa berã Tachi Ak'õrepa ichi pae pari mimiapataɨrã jĩra bɨsima mãra k'aripadamẽrá. Maamina mãrapa nemietá oodaipɨra, ãchi wap'eat'ɨ piarã minachia ɨtɨadai p'anɨ pẽra. Ãchi Tachi Ak'õre pae pari mimiapataɨrã jĩra p'anɨma chi nemietá oo berã ɨtɨadai k'orea.

⁵ Mãɨpuru mãra nãɨ ĩjũanepema minachia k'awa berã juade p'ananai p'anɨma ɨtɨapidaemaapa. Mãɨ awara ãchi juade p'ananai p'anɨma, k'awa p'anɨ pẽra mãɨya p'ananai mãɨ jĩp'a bɨt'a.

⁶ Mãɨ k'orea chi mãrapa erreara teadai p'anɨt'a mãra minachia k'awa berã́ teapatama, ãchi Tachi Ak'õre pae pari mimiapataɨrã jĩra p'anɨ pẽra, mãɨnepa mãɨya mimiapata pẽra.

⁷ Jõmãɨrã́ teat'ɨ mãrapa ãchicha teadai p'anɨ jĩra. Mãra minachia k'awa berã́ erreara teadai p'anɨt'a teat'ɨ. Mãrapa wap'eadai p'anɨ wap'eat'ɨ. Mãrapa chi pia jaradai p'anɨa pia jarat'ɨ.

⁸ Mãrapa tee pará p'anɨpɨra, mãɨ waa teadawẽa p'anarãt'ɨ. Abapuru chi k'ɨ̃ria p'anat'ɨ. Chi waapẽarã k'ɨ̃ria bɨpa jõma Moisepa bɨda oo bɨma.

⁹ Mãɨ Moisepa bɨdade jara bɨma: «K'ima awaraɨ ome k'ãirãse, mĩa pearãse, nechɨarãse, abaɨpa uru bɨt'a k'ɨ̃riarãse». Mãɨ pedea mãɨnepa jõma mãɨ Moisepa bɨdade jara bɨ sida nãɨ k'ɨ̃risia aba bɨde jõma jara bɨma: «Abaɨ k'ɨ̃riase ara pɨchi k'ɨ̃ria bɨ jĩra».

¹⁰ Chi k'ɨ̃ria uru bɨpa waapẽarã piawẽa ook'ama. Chi waapẽarã k'ɨ̃ria bɨde jõma Moisepa bɨda oo bɨma.

¹¹ Jõma makɨɨ oo p'anat'ɨ, k'awa p'anɨ pẽra nãɨ ewari sãmaasã́ bɨt'a. Ɨ̃rɨmat'ɨ. Waa k'ãi p'anarãt'ɨ. Chi tachi nãɨ ĩjũa nemietaadepema k'aripai k'ait'a bɨma, tachia naa ĩjãanana k'aepẽra.

¹² Nãɨ ewari mietá bɨ jõpodoma teamasi nɨbada ewaripodo jĩra. Mãɨpuru tachia nemietá itu bɨdak'ari pia oodai p'anɨma. Mãɨya nemietaadepema jõma ãyá p'ananaipɨ, papaká bɨpa ãst'á ichi ne jɨ̃parí chaarea bɨt'a jɨ̃ bɨ jĩra.

¹³ Tachi jĩp'a nipadai p'anɨma ãst'á nipapata jĩra. Arapá oopataɨ tiidá it'ua tode wãnaiwẽa p'anɨma, tachi k'ak'uadepa nemietá oo p'ananaiwẽa p'anɨma, k'ĩruu pedea p'ananaiwẽa p'anɨma, mãɨnepa abaɨpa uru bɨ k'orea piawẽa k'ɨ̃risiadaiwẽa p'anɨma.

¹⁴ Mãɨpari Tachi Chipari Jesucristo nipada jĩra nipat'ɨ. Nãɨ k'ak'uapa nemietá oo k'ɨ̃ria bɨt'a oodai k'ɨ̃risiarãt'ɨ.