Romano 11 - Tachi Ak'õre Pedea

Chi eda judiorãpa Cristode ĩjãanana

¹ Mãɨ k'orea mɨa nãɨ idiruma: «¿Tachi Ak'õrepa israel ĩjũanepemarã ichidirã itu bɨsik'ãra?» ¡Mãɨyawẽma! Mɨ israel ĩjũanepemapɨ, Abrahanepa chedaadadepemapɨ, Benjaminepa chedapɨ.

² Tachi Ak'õrepa naena israel ĩjũanepemarã jɨrɨ atasima ichi p'uuru bamẽrá. Mãɨpuru ãchi itu bɨwẽa bɨma. Mãrapa Tachi Ak'õre pedeade Elía k'orea bɨda k'awa p'anɨma. Eliapa Tachi Ak'õrea israel ĩjũanepemarã k'orea nãɨya piawẽa pedeasima.

³ «Mɨ Chipari, chi pɨ pari pedeapataɨrã jõma k'enasidama mãɨnepa chi pɨá ãnimara paateapataɨ jõma ãrisidama. Abapuru mɨt'u beesima, maamina mɨ sida jɨrɨ p'anɨma peadai k'orea».

⁴ Mãɨne Tachi Ak'õrepa nãɨya p'anoosima: «Mɨa ẽpẽrarã siete mil mɨ pae uru bɨma. Ãchi Baal k'ĩrari sĩraporode k'op'aneenak'ama».

⁵ Ara mãɨ jĩra nãɨ ewaride pida Tachi Ak'õrepa ichi sõpiadepa tai judiorã chok'araawẽa p'anɨt'a ichi pae uru bɨma.

⁶ Mãɨya Tachi Ak'õrepa ichi sõpiadepa jɨrɨ atasipɨra, taipa oo p'anɨ k'orea jɨrɨ ataé pasima. Taipa oo p'anɨ k'orea jɨrɨ atadapara, mãɨyara ichi sõpiadepa jɨrɨ ataiwẽ pasima.

⁷ ¿Mãɨnepema sãmaasã́ k'ɨ̃risia p'anɨma? Israel ĩjũanepemarãpa Tachi Ak'õre p'uuru padai jɨrɨ p'anamina, mãɨya oodaé pasima. Maamina israel ĩjũanepemarã chok'araawẽa p'anɨpa ĩjãasidama, Tachi Ak'õrepa jɨrɨ atada pẽra. Waapẽarãpa ĩjãanai k'ɨ̃rianaé pasima.

⁸ Tachi Ak'õre pedeade nãɨya bɨ bɨma: «Tachi Ak'õrepa ãchi k'ãi p'anɨ jĩra bɨsima p'ue k'awapidaemaapa, ãchi taupa ununa p'ue k'awapidaemaapa, mãɨnepa ãchi k'ɨɨrɨpa ũrina p'ue k'awapidaemaapa. Wapida ara mãɨya p'anɨma».

⁹ Mãɨnepa judiorã poro jũra jɨ̃parí jɨ̃ bɨ Davipa mãɨ k'orea Tachi Ak'õrea jarasima: «Ãchi arapaapataɨ nek'opataɨ te oomaa p'anɨne, pɨa ãchiá ãchi ɨtɨaiwẽane a k'ɨ̃risiapise. Mãɨya ãchi tuaba seadaipɨ ãnimara k'idap'ede baeuta jĩra. Mãɨne ãchi ɨtɨase.

¹⁰ Ãchi tau p'ãrio be jĩra bɨse ãchia unu p'anɨt'a k'awapidaemaapa. Mãɨnepa ewaricha minachia mĩapise».

Tachi Ak'õrepa judiorãwẽ k'aripada

¹¹ Nãɨ mɨa idiruma: ¿judiorãpa Cristo itu bɨsida pẽra waa Tachi Ak'õre ome p'ue pia p'ananaiwẽk'ãra? ¡Mãɨyawẽma! Mãɨpari mãɨya oodada pẽra Tachi Ak'õrepa judiorãwẽ k'aripaparima. Mãɨya judiorãpa jiwá p'aneenak'ari ichi k'ɨ̃rianaipɨ.

¹² Judiorãpa Cristo itu bɨdada pẽra ãchi k'aepẽra Tachi Ak'õrepa jõma nãɨ ĩjũanepema judiorãwẽ minachia k'aripa bɨma. Mãɨpuru chi judiorã mãicha Tachi Ak'õre ome pia p'aneeuta ewaride ¿Tachi Ak'õrepa jõmãɨrã pia k'aripaiwẽk'ãra?

¹³ Mɨa judiorãwẽa nãɨ jararuma. Mɨ Tachi Ak'õrepa peeda bɨsima, mãrá jarateamẽrá. Mãɨ mɨa jõma jĩp'a oo k'ɨ̃ria bɨma.

¹⁴ Mɨa judiorãwẽa jaratea bɨdepa k'ɨ̃ria bɨma mɨ ẽpẽrarã judiorã pida mãɨ pedea ũri k'ɨ̃rianait'a, jiwá p'anɨ jĩra. Mãɨya Tachi Ak'õrepa eda ãchidiidepema k'aripaipɨ.

¹⁵ Tachi Ak'õrepa judiorã itu bɨda pẽra waapẽarã nãɨ ĩjũanepemarã ichi ome pia bɨsima. Mãɨpuru Tachi Ak'õrepa judiorã mãicha pia jɨrɨ atarude ¿sak'aima? Ãchi sida piudaadarã jĩra p'anana Tachi Ak'õre ome chok'ae p'ananaipɨ.

¹⁶ Trigo naa chauutade p'ana ook'oadak'ari mãɨ p'ananepema Tachi Ak'õrea aba teadaipɨra chi waapẽarã p'ana sida Tachi Ak'õrenepɨ. Mãɨnepa pak'uru k'arra pia bɨpɨra, chi pak'uru jua sida pia p'anɨma.

¹⁷ Chi eda waapẽarã judiorã Tachi Ak'õre awara p'aneesidama olivo pak'uru jua t'ɨat'upataɨ jĩra. Mãra judiorãwẽ Tachi Ak'õre newẽa p'anasidama olivo pak'uru chi ichi tuaba mẽa warida jĩra. Maamina mãra Tachi Ak'õrene ẽpẽrarã p'aneesidama, pak'uru jua chi t'ɨat'udade ara mãɨ juade wãa nɨbɨda jĩra. Mãɨya naapae Tachi Ak'õrepa mãra sida k'aripa bɨma judiorã k'aripa bada jĩra.

¹⁸ Maamina k'ɨ̃risiarãt'ɨ mãra judiorãwẽ Tachi Ak'õre k'ĩrari atepe pia bet'a judiorã k'aepẽra. K'ɨ̃risiat'ɨ mãra chi k'arradepa chok'ae p'anɨt'a. Chi k'arra mãranepa chok'ae bɨwẽma.

¹⁹ Abaɨpa jarai bɨejã: «Tachi Ak'õrepa judiorã itu bɨsima pak'uru jua t'ɨat'uda jĩra, mɨt'u mãɨ pak'urude wãa bɨi k'orea».

²⁰ Piarã mãɨya bɨma. Maamina Tachi Ak'õrepa ãchi itu bɨsima Cristode ĩjãanaé pasi pẽra. Maapae mãra jɨrɨ atasima Cristode ĩjãanana pẽra. Mãɨ k'orea mãra judiorã k'aepẽra pia be k'ɨ̃risiarãt'ɨ, mãɨpari Tachi Ak'õre wap'ea p'anat'ɨ.

²¹ Judiorãpa ĩjãanawẽa p'anɨ k'orea Tachi Ak'õrepa ãchi itu bɨsima pak'uru jua t'ɨat'uru jĩra. Ara mãɨ jĩra mãra judiorãwẽpa ĩjãanaepɨra, Tachi Ak'õrepa mãra sida itu bɨipɨ.

²² Minachia k'ɨ̃risiat'ɨ sãmaasã́ Tachi Ak'õrepa ichi sõpiadepa k'aripapari mãɨnepa sãmaasã́ ɨtɨapari. Judiorãpa ĩjãanaé pasi pẽra Tachi Ak'õrepa ɨtɨak'ari ãchi itu bɨsima. Mãɨne mãra judiorãwẽ ichi sõpiadepa k'aripa bɨma mãɨnepa k'aripa baipɨ. Maamina mãɨnepa p'ananai p'anɨma. Mãrapa ĩjãa p'ananaiwẽpɨra, Tachi Ak'õrepa mãra sida ɨtɨak'ari itu bɨipɨ pak'uru jua t'ɨat'uk'oaru jĩra.

²³ Mãɨnepa chi judiorã Cristode ĩjãanawẽa p'anɨrãpa ĩjãanaipɨra, Tachi Ak'õrepa ãchi mãicha jɨrɨ ataipɨ ichi jua chaareadepa, chi pak'uru jua t'ɨat'udade mãicha wãa nɨbɨru jĩra.

²⁴ Piarã mãra judiorãwẽ olivo pak'uru ichi tuaba mẽa warida jĩra p'anasidama. Tachi Ak'õrepa mãɨ pak'urudepema t'ɨat'uk'ari olivo pak'uru uudade bɨsima. Mãɨya baiwẽa bɨmina Tachi Ak'õrepa oosima. Mãɨpuru ¿judiorã mãicha p'ue jɨrɨ ataiwẽk'ãra chi uuda pak'uru jua mãicha wãa nɨbɨru jĩra?

Tachi Ak'õrepa ãarea israel ĩjũanepemarã k'aripai k'orea

²⁵ Ũpẽarã, mɨa k'ɨ̃ria bɨma Tachi Ak'õrepa naena k'awapiwẽa bada mãrapa k'awadait'a. Mãɨya judiorã k'aepẽra pia be k'ɨ̃risiadaiwẽma. Tachi Ak'õrepa naena k'awapiwẽa bada nãɨpɨ: chok'ará judiorã k'ɨɨrɨwẽa p'aneesidama mãɨnepa mãɨya p'aneenaipɨ aba jõma chi Cristode ĩjãanai p'anɨ judiorãwẽpa ĩjãautadea.

²⁶ Mãɨya Israel p'uuru Tachi Ak'õrepa jõma k'aripaipɨ. Tachi Ak'õre pedeade nãɨya bɨ bɨma: «Tachi K'aripaparí Sión p'uurudepa cheipɨ. Ichia Jacobodepa chedaadarã nemietá awara bɨipɨ.

²⁷ Mɨa ãchi ome pedea auipɨ. Ãchia nemietá oodada k'ɨ̃risia atuaipɨ».

²⁸ Judiorãpa chi pedea pia Jesú k'orea itu bɨ p'anɨ pẽra Tachi Ak'õre ome chi nek'ĩramaapɨ. Mãɨpuru mãra judiorãwẽ Tachi Ak'õre ẽpẽrarã p'ue p'ananaipɨ. Maamina Tachi Ak'õrepa ãchi chõarãenapemarã jɨrɨ atada pẽra waidi k'ɨ̃ria bɨma.

²⁹ Piarã Tachi Ak'õrepa teada ẽemarik'ama. Ichia t'ɨ̃na itu bɨk'ama.

³⁰ Mãra judiorãwẽpa naena Tachi Ak'õrene ĩjãanak'a pasima. Maamina judiorãpa ĩjãanawẽa p'anɨ pẽra naapae Tachi Ak'õrepa mãra k'ĩra chupuria bɨma.

³¹ Ãchia naapae ĩjãanak'ama, Tachi Ak'õrepa k'ĩra chupuriamẽrá mãra judiorãwẽa k'ĩra chupuria bɨ jĩra.

³² Piarã Tachi Ak'õrepa jõmãɨrã eda jɨ̃a nɨbɨsima ãchi k'ɨɨrɨwẽa p'anɨ k'orea. Mãɨya oosima jõmãɨrã k'ĩra chupuriai k'orea.

³³ Tachi Ak'õre minachia ne k'awa bɨma mãɨnepa k'ɨ̃risia k'awa bɨma. Ichia ooi k'ɨ̃risia bɨt'a mi ãpia pida p'ue k'awadaiwẽma. Ichia oo bɨ sida p'ue k'awadaiwẽma.

³⁴ «¿K'aipa Tachi Chipari k'ɨ̃risia k'awa bɨma? ¿K'aipa ichiá k'ɨ̃risia jarateaparima?

³⁵ ¿K'aipa Tachi Ak'õrea ne teasima jĩitea teamẽrá?»

³⁶ Tachi Ak'õrepuru nejõma oosima. Nejõma ichidepa bɨma mãɨnepa ichi pae bɨma. Tachia ewaricha ichiá pia pedeadai p'anɨma. Mãɨya beese.