Romano 10 - Tachi Ak'õre Pedea

¹ Ũpẽarã, mɨa sõnepa k'ɨ̃ria bɨma Tachi Ak'õrepa israel ĩjũanepemarã k'aripait'a. Mãɨ k'orea mɨa Ichiá ɨt'aa chiidi baparima.

² Mɨa jararuma ãchia Tachi Ak'õre piarã k'awa k'ɨ̃ria p'anɨ. Maamina Tachi Ak'õrepa k'ɨ̃ria bɨ k'orea piawẽa k'ɨ̃risia p'anɨma.

³ Ãchia k'awadak'ama sãmaasã́ Tachi Ak'õrepa ẽpẽrarã ichi p'uuru jĩp'a bɨ paara bɨit'a, ichia jarada jĩra. Mãɨ itu bɨdak'ari ara ãchia oo p'anɨnepa jɨrɨ p'anɨma Tachi Ak'õre p'uuru jĩp'a bɨ padai k'orea.

⁴ Maamina mãɨya p'ananai k'orea ãchia chi ley oopachidaedapema k'aepẽra, Cristopa ãarea oosima. Chi Cristode ĩjãauta Tachi Ak'õre k'ĩrari jĩp'a berã unuparima.

⁵ Moisepa bɨsima sãmaasã́ ẽpẽrarã p'ue jĩp'a p'ananait'a, chi Tachi Ak'õrepa ichiá bɨpidadepa. Nãɨya bɨsima: «Ẽpẽrapa nãɨ Moisepa bɨdade jara bɨt'a oo baipɨra, mãɨ chok'ae baipɨ».

⁶ Maamina Tachi Ak'õre taade jĩp'a p'anɨrãnepema pai k'orea Cristode ĩjãa bɨma. Mãɨpa nãɨya jara bɨma: «Pɨ sõne jararãse: “¿K'ai pajãnea wãi bɨma?” (Cristo nãɨ ĩjũanea chepii k'orea).

⁷ Ichiaba k'ɨ̃risiarãse: “¿K'ai piudaadarã p'anapataɨmá wãi bɨma?” (Cristo chok'ae p'irabaripii k'orea)».

⁸ Maamina Tachi Ak'õre pedeade nãɨya bɨ bɨma: «Pɨa Tachi Ak'õre pedea k'await'a t'ajuwẽa bɨma. Pɨ it'aedepa ichi pedea jarai bɨma mãɨnepa pɨ sõnepa ĩjãai bɨma». Ichi pedea taipa nãɨya jaratea p'anɨma jõmãɨrãpa ĩjãanamẽrá:

⁹ pɨ it'aedepa Jesú jõmãɨrã Chipariade aipɨra, mãɨnepa Tachi Ak'õrepa ichi chok'ae p'irabaripisit'a pɨ sõnepa ĩjãaipɨra, Tachi Ak'õrepa k'aripaipɨ.

¹⁰ Piarã chi mãɨpa sõnepa ĩjãaipɨra, chi Tachi Ak'õre taade jĩp'a berã paara baipɨ. It'aedepa Jesú jõmãɨrã Chipariade aipɨra ichia k'aripaipɨ.

¹¹ Tachi Ak'õre pedeade nãɨya bɨ bɨma: «Chi ichide ĩjãa bɨpa pari ĩjãa baiwẽma».

¹² Tachi Ak'õre jõmãɨrã Chipari pẽra judiorã mãɨnepa judiorãwẽ sida abarik'a ooparima. Ichiá k'ĩra chupuria idiuta minachia k'aripaparima.

¹³ Tachi Ak'õre pedeade nãɨya bɨ bɨma: «Chi Tachi Chiparia chichupuria ɨt'aa idiutat'a ichia ãarea k'aripaipɨ».

¹⁴ Maamina ẽpẽrarãpa wapida Tachi Chipari Jesucristode ĩjãanawẽa p'anɨne ¿sãmaasã́ ichiá k'ĩra chupuria ididaima? Ichi k'orea wapida ũrinawẽa p'anɨne ¿sãmaasã́ ĩjãanaima? Mãɨnepa abaɨ pida ãchiá jarateade wãwẽpɨra ¿sãmaasã́ ichi k'orea ũrinaima?

¹⁵ Tachi Ak'õrepa abaɨ pida peewẽpɨra, ¿sãmaasã́ jarateade wãnaima? Tachi Ak'õre pedeade nãɨya bɨ bɨma: «Chi pedea pia jarade cheuta minachia pia p'anɨma».

¹⁶ Maamina jõma judiorãpa chi pedea pia Cristo k'orea ĩjãanaé pasima. Isaía k'art'ade nãɨya bɨ bɨma: «Tai Chipari, taipa jaradada ¿k'aipa ĩjãasima?»

¹⁷ Piarã ẽpẽrarãpa Cristo k'orea naa ũrinai p'anɨma, ichide p'ue ĩjãanai k'orea.

¹⁸ Maamina mɨa idiruma: ¿Judiorãpa mãɨ pedea ũrinaé pasik'ãra? Piarã ũrisidama. Tachi Ak'õre pedeade nãɨya bɨ bɨma: «Ichi k'orea jõma nãɨ ĩjũane jarasidama. Mãɨ pedea t'ɨmɨa jarade wãsidama».

¹⁹ Mɨa mãicha idiruma: ¿Judiorãpa mãɨ pedea k'awadak'a pasik'ãra? Ãjã, k'awasidama judiorãwẽpa k'awadada jĩra. Mãɨ k'orea Moisepa bɨdade chi judiorã́ naa jarasima: «Chi mɨa jɨrɨ atadawẽ p'uuru k'aripa bɨdepa mɨa mãrá jiwaapiipɨ mɨ k'ɨ̃rianamẽrá. Chi k'ĩra k'ɨ̃risia nea bɨ p'uuru k'aripa bɨdepa mɨa mãra k'ĩruupik'apiipɨ mɨ k'ɨ̃rianamẽrá».

²⁰ Mãɨnepa Isaíapa Tachi Ak'õrenepa ne wap'eawẽa nãɨya jarasima: «Chi mɨ jɨrɨdawẽa p'anarãpa mɨ unusidama. Chi mɨ k'orea ididawẽa p'ananarã́ ara mɨchi k'orea k'awapisima».

²¹ Maamina israel ĩjũanepemarã k'orea Isaíapa nãɨya jarasima: «Ewaricha mɨ jua ɨapachima ẽpẽrarã k'ɨɨrɨwẽa be mãɨnepa mɨne ĩjãawẽa be mɨmá chedamẽrá».