Romano 1 - Tachi Ak'õre Pedea

Nãɨ k'art'ade Pablopa naa bɨda

¹ Mɨ Pablopɨ, Jesucristo pae pari mimiaparí. Tachi Ak'õrepa mɨ jɨrɨ atasima Jesucristopa peeda bamẽrá mãɨnepa bɨsima chi pedea pia Tachi Ak'õre k'orea jarateade wãmẽrá.

² Mãɨ pedea pia Tachi Ak'õrepa chõarãena teayade a jarasima. Ichi pari pedeapataɨrãpa mãɨ k'orea Ichi Pedea pia bɨ k'art'ade bɨsidama.

^3-4 Mãɨ pedea pia ichi Warra k'orea jara bɨma. Ichi Warra Tachi Chipari Jesucristo nãɨ k'ak'uade Israeldepema poro jũra jɨ̃parí jɨ̃ bɨ Davidepa chedapɨ. Ichiaba ichi piu bada chok'ae p'irabaripiside Tachi Ak'õre Jaorepa unupisima Tachi Ak'õre Warra chaarea bɨt'a.

⁵ Jesucristodepa Tachi Ak'õrepa mɨ bɨsima ichia peeda bamẽrá. Ichidepa mãɨya bɨsima jõma tuachadepemarãpa Jesucristode ĩjãanamẽrá, ichi pedea oodamẽrá mãɨnepa ichiá pia pedeadamẽrá.

⁶ Mãra sida Tachi Ak'õrepa t'ɨ̃sima Jesucristo pae p'ananamẽrá.

⁷ Mɨa nãɨ k'art'a bɨruma ãarea Romanepema ũpẽarã pae. Tachi Ak'õrepa mãra k'ɨ̃ria bɨma mãɨnepa t'ɨ̃sima ichi ẽpẽrarã p'ananamẽrá. Mɨa k'ɨ̃ria bɨma Tachi Pajãnepema Ak'õrepa, Tachi Chipari Jesucristo ome ãchi sõpiadepa mãra k'aripa p'ananait'a ne k'ɨ̃risiawẽa p'ananamẽrá.

Pablo Roma p'uurudea wãyá bada

⁸ Naa mɨa jararuma: Jesucristodepa mɨa jõma mãra k'orea Tachi Ak'õrea sõpia bɨade aparima mãrapa Jesucristode ĩjãa p'anɨ k'orea tuachadepemarãpa pedea p'anɨ pẽra.

⁹ Tachi Ak'õrepa k'ɨ̃ria bɨt'a ãarea mɨ sõnepa oo bɨma, chi pedea pia ichi Warra k'orea jaratea bɨ pẽra. Ichia k'awa bɨma mɨa ɨt'aa chiidirucha mãra k'orea ɨt'aa chiidiparit'a.

¹⁰ Mɨa ɨt'aa chiidiparima ichia k'ɨ̃ria bɨpɨra mɨ itu mãra ak'ɨde wãpimẽrá.

¹¹ Piarã mɨa mãra unu k'ɨ̃ria bɨma Tachi Ak'õre Jaoredepa k'aripai k'orea. Mãɨya mãra chaarea p'ananaipɨ.

¹² Mɨa k'ɨ̃ria bɨma tachia abarik'a Cristode ĩjãa p'anɨnepa chi k'aripa p'ananaipɨ chaarea p'ananai k'orea.

¹³ Ũpẽarã, mɨa k'ɨ̃ria bɨma mãrapa k'awadait'a piarã bari k'ak'o minachia mãramá wãi k'ɨ̃risia basit'a. Maamina wapida p'ue wãwẽa bɨma. Mãramá wã k'ɨ̃ria bɨma mɨa jaratea bɨdepa mãmapemarãpa Jesucristode ĩjãanamẽrá waapẽarã tuadepemarãpa ĩjãanana jĩra.

^14-15 Mɨa pedea pia Jesú k'orea jõmãɨrã́ jarateai bɨma. Ne k'awa berã́, ne atua k'edea, k'art'a k'awa berã́ mãɨnepa k'art'a atua berã́ jarateai bɨma. Mãɨ k'orea mãra Romanepemarã́ pida jarateade wã k'ɨ̃ria bɨma.

¹⁶ Mɨ p'erak'ama chi pedea pia Jesú k'orea jarateai k'orea, chi mãɨ pedea ĩjãauta Tachi Ak'õrepa ichi jua chaareadepa jõma k'aripapari pẽra; naa judiorã mãɨnepa judiorãwẽ sida.

¹⁷ Mãɨ pedea piadepa Tachi Ak'õrepa k'awapi bɨma tachi k'aripait'a, ichia jara bɨ jĩra. Jesucristode ĩjãautarã mãɨya baipɨ. Tachi Ak'õre pedeade nãɨya bɨ bɨma: «Chi jĩp'a bɨt'a, Tachi Ak'õrene ĩjãa bɨdepa chok'ae baipɨ».

Ẽpẽrarã Tachi Ak'õre k'ĩrari nepɨra pará p'anɨ

¹⁸ Tachi Ak'õrepa pajãnepa k'awapi bɨma nemietá oo berã mãɨnepa jĩp'awẽa berã ichi k'ĩruupidepa ãarea ɨtɨait'a. Ãchia nemietá oo p'anɨnepa chi piarã pedea itu k'awapidak'ama.

¹⁹ Tachi Ak'õre k'orea p'ue k'awadai bɨt'a ãchia minachia k'awa p'anɨma, ichia k'awapi bɨ pẽra.

²⁰ Nãɨ ĩjũa oodaedapema chi ichia ooda ak'ɨ p'anɨnepa k'awa p'anɨma ichi chi ewaricha ne ãarea p'ue oo bɨt'a mãɨnepa ichi Tachi Ak'õret'u. Mãɨ ãarea ooda ak'ɨ p'anɨnepa, ẽpẽrarãpa chi Tachi Ak'õre ẽpẽerãpa ne p'ue oodak'apɨ́ mãɨ pia unupatama. Mãɨ k'orea chi nemietá oopataɨrãpa p'ue atua p'anɨane adaiwẽa p'anɨma.

²¹ Ãchia Tachi Ak'õre k'awa p'anasidamina ichiá pia pedeadaé pasima mãɨnepa sõpia bɨade adaé pasima. Mãɨpari k'ɨ̃risia newẽa berã jĩra p'aneesidama. Mãɨya piawẽa k'ɨ̃risiadak'ari p'ãrione p'aneesidama.

²² K'ɨ̃risia k'awaa p'aneenayane asidamina k'ɨ̃risia newẽa p'aneesidama.

²³ Tachi Ak'õre piuk'apɨ́ pia bɨt'a itu bɨsidama. Maapae ẽpẽra piupari jĩra sãdo oodak'ari mãɨa pia pedea p'aneesidama. Ichiaba sãdo wawaria ook'oasidama: ĩpanarã, ãnimara bɨɨrɨ k'ĩmari berã mãɨnepa ãnimara ĩjũane urrujupataɨrã, mãɨrã́ pia pedeadai k'orea.

²⁴ Mãɨ k'orea Tachi Ak'õrepa itu bɨsima ãchi sõne nemietá oo k'ɨ̃ria bɨt'a oodamẽrá. Mãɨpuru k'ĩra p'era oo p'aneesidama.

²⁵ Chi Tachi Ak'õre piarãpẽat'a itu bɨdak'ari chi seat'a oo p'aneesidama. Tachi Ak'õrepa nejõma oodamina ichi k'aepẽra ichia oodat'a ĩjãa p'aneesidama mãɨnepa mãɨa pia pedea p'aneesidama. Maamina tachia Tachi Ak'õreapuru ewaricha pia pedeadai p'anɨma. Mãɨya beese.

²⁶ Mãɨpuru Tachi Ak'õrepa itu bɨsima k'ĩra p'era oodamẽrá. Wẽra ɨmɨk'ĩra ome k'ãii pada itu bɨdak'ari abarik'a wẽra ome k'ãi p'aneesidama.

²⁷ Ara mãɨ jĩra ɨmɨk'ĩra wẽra ome k'ãii pada itu bɨdak'ari abarik'a ɨmɨk'ĩra chi k'ɨ̃rianak'ari k'ĩra p'era oo p'aneesidama. Mãɨ nemietá oo p'anɨ k'orea Tachi Ak'õrepa ãchi ɨtɨaipɨ, ichia ɨtɨai bɨ jĩra.

²⁸ Ãchia Tachi Ak'õre itu bɨdada pẽra ichia itu bɨsima nemietá k'ɨ̃risiadak'ari, chi tachia oodaiwẽa p'anɨt'a mãɨya oo p'ananamẽrá.

²⁹ Nejõma k'achia oopatama. K'ĩra p'erai bɨ oopatama, ne minachia uru p'ananai k'ɨ̃riapatama, waapẽarã piawẽa oopatama, waapẽarãpa uru bɨ k'orea piawẽa k'ɨ̃risiapatama, mĩa peapatama, k'ĩruu pedeapatama, waapẽarã seapatama, waapẽarã k'orea k'achia k'ɨ̃risiapatama mãɨnepa waapẽarã k'orea seajarapatama.

³⁰ Waapẽarã k'orea k'achia pedeapatama, Tachi Ak'õre unuemaapatama mãɨnepa waapẽarã k'ĩrari piawẽa pedeapatama. Waapẽarã k'aepẽra atepe p'anɨane a k'ɨ̃risiapatama mãɨnepa mãɨya jarapatama. Waapẽarã piawẽa oodai k'orea jɨrɨpatama. Ãchi ak'õre mãɨnepa nae pedea ũrinak'ama.

³¹ K'ɨ̃risia newẽa p'anɨma. Ãchia pedea jaradada oodak'ama. Waapẽarã k'ɨ̃rianak'ama mãɨnepa waapẽarã k'ĩra chupuriadak'ama.

³² Ãchia minachia k'awa p'anɨma Tachi Ak'õrepa chi mãɨya oo berã minachia ɨtɨait'a. Maamina ara mãɨya oo nipapatama mãɨnepa waapẽarãpa abarik'a nemietá ooutade mãɨ pia bɨade a k'ɨ̃risiapatama.