P'ilipense 4 - Tachi Ak'õre Pedea

¹ Mãɨ k'orea mɨ ũpẽarã, mɨa jarada jĩra Tachi Chiparide minachia ĩjãa p'anat'ɨ. Mɨa mãra minachia k'ɨ̃ria bɨma mãɨnepa unu k'ɨ̃ria bɨma. Mãra k'orea mɨ minachia arapá bɨma. Mãrat'u mɨ arapaapipataɨpɨ.

Pablopa ũpẽarã́ oopida

² Mɨa ũpẽawẽra Evodia mãɨnepa ũpẽawẽra Sintik'ea chichupuria idiruma chi pia pedeadamẽrá Tachi Chipari Jesucristo ome p'anɨ pẽra.

³ Ichiaba pɨ, chi mɨ ome Tachi Ak'õrepa oo bɨt'a ooparí, mɨa pɨá idiruma mãɨ ũpẽawẽrarã k'aripamẽrá. Ãchi, Clemente ome mãɨnepa waapẽarã sida mɨ ome minachia mimiasidama, chi pedea pia Cristo k'orea k'awapidai k'orea. Jõma ãchi t'ɨ̃ Tachi Ak'õrepa ichi ewaricha chok'ae p'ananai k'art'ade bɨ bɨma.

⁴ Tachi Chipari Jesucristo ome p'anɨ pẽra ewaricha arapá p'anat'ɨ. Mɨa mãicha jararuma: ¡Arapá p'anat'ɨ!

⁵ Mãra ẽpẽrarã paara pia p'anɨt'a, jõmãɨrã́ unupit'ɨ. Tachi Chipari chei ewari k'ait'a bɨma.

⁶ Ne paritua k'orea minachia k'ɨ̃risiarãt'ɨ, mãɨpari Tachi Ak'õrea ɨt'aa chiidit'ɨ, ichiá chichupuria idit'ɨ, mãɨnepa nejõma k'orea pia bɨade at'ɨ.

⁷ Mãɨpa Tachi Ak'õrepa mãra sõ mãɨnepa mãra k'ɨ̃risiat'a ne k'ɨ̃risiawẽa p'anapiipɨ Jesucristo ome p'anɨ pẽra. Mãɨ ne k'ɨ̃risiawẽa bait'a ẽpẽrarãpa ãchi tuaba p'ue k'awadaiwẽma.

⁸ Mãɨ awara ũpẽarã, jõma piarãnepema, nejõma tachia pia bɨt'a unupataɨdepema, jõma jĩp'a bɨdepema, jõma nemietaawẽa bɨdepema, jõmãɨrãpa k'ɨ̃riapataɨdepema, jõma chi piipará bayade a p'anɨnepema, nejõma piadepema mãɨnepa nejõma tachia pia jarapataɨdepema k'ɨ̃risia p'anat'ɨ.

⁹ Mɨa jarateada, chi mãrapa mɨnepa k'awadada, mɨnepa ũrinana mãɨnepa ununana jõma oo p'anat'ɨ. Mãɨne Tachi Ak'õre mãra ome baipɨ mãɨnepa mãra ne k'ɨ̃risiawẽa bɨipɨ.

Ũpẽarãpa ne tea peedada k'orea Pablopa pia bɨade ada

¹⁰ Tachi Chiparidepa mɨ minachia arapá bɨma, mãrapa mɨ k'ɨ̃risia p'anɨnepa mãicha ne tea peesida pẽra. Mãɨ mãrapa naena oo k'ɨ̃ria p'ananamina p'ue oodaé pasima.

¹¹ Mãɨya jarawẽa bɨma mɨ nenea bɨ pẽra. Ne ãareaɨne mɨa k'awasima mãɨya ne k'ɨ̃risiawẽa bait'a, ara mɨa ne uru bɨdepa.

¹² Nenea bɨde mãɨnepa ne minachia uru bɨde, sãmaasã́ bai k'awa bɨma. Mɨa k'awasima parituade sãmaasã́ ne k'ɨ̃risiawẽa bait'a, ne jãwaa bɨde mãɨnepa jarra bɨde; ne minachia uru bɨde mãɨnepa newẽa bɨde.

¹³ Cristodepa jõma p'ue ooipɨ ichia mɨ chaareapii bɨ pẽra.

¹⁴ Maamina mɨa mãrá pia bɨade aruma, mɨ minachia mĩa bɨde k'aripadada pẽra. Piarã mãrapa pia oosidama.

¹⁵ Ũpẽarã P'ilipodepemarã, mãrapa k'awa p'anɨma chi pedea pia Cristo k'orea naa ĩjãasidaɨde mɨ Macedonia tuadepa tua awaraɨdea jarateade wãside, ũpẽarã waapẽarã p'uurudepemarãpa mɨá ne tea peedaé pasima. Aba mãrapuru mɨá mãɨyasidama.

¹⁶ Mɨ Tesalónica p'uurude baside mãrapa bari k'ak'o minachia ne tea peesidama k'aripadai k'orea.

¹⁷ Mɨa idiwẽa bɨma mãrapa ne tea peedamẽrá, mãɨpari k'ɨ̃ria bɨma pia oo p'anɨ k'orea Tachi Ak'õrepa mãra pia k'aripait'a.

¹⁸ Nejõma mãrapa ũpẽa Epap'rodito ome tea peedada mɨa jitasima. Mãɨpuru ne minachia uru bɨma. Mãɨpa mɨ pia baipɨ. Mãrapa tea peedada, k'era p'iumá Tachi Ak'õrea teada jĩra bɨma. Mãɨ Tachi Ak'õrepa pia unu bɨma.

¹⁹ Piarã jõma mãrapa newẽa p'anɨt'a, mɨ Pajãnepema Ak'õrepa nejõma pia uru bɨdepema Jesucristodepa teaipɨ.

²⁰ Mãɨpuru ewaricha Tachi Pajãnepema Ak'õrea pia pedeadai p'anɨma. Mãɨya beese.

Pablopa k'aadea bɨda

²¹ Jõma ẽpẽrarã Tachi Ak'õrenepemarã Jesucristo ome berã́ pia p'anapadade a jarat'ɨ. Ũpẽarã mɨ ome p'anɨ pida pia p'anapadade a jara p'anɨma.

²² Jõma ẽpẽrarã Tachi Ak'õrenepemarã nãmapemarãpa pia p'anapadade a jara p'anɨma. Ũpẽarã chi Romanepema chi atepe poro chaarea bɨ pae mimiapataɨrãpa mãɨya jara p'anɨma.

²³ Mɨa k'ɨ̃ria bɨma Tachi Chipari Jesucristopa ichi sõpiadepa mãra k'aripa bait'a.