P'ilipense 2 - Tachi Ak'õre Pedea

Tachi Ak'õrepa Cristo waapẽarã k'aepẽra chi atepe bɨda

¹ Cristode sõpia p'anɨ pẽra, ichia k'ɨ̃ria bɨdepa mãra sõpia p'aneepii bɨ pẽra, Tachi Ak'õre Jaore mãra ome bɨ pẽra mãɨnepa ichi k'ɨ̃ria bɨdepa mãra k'ĩra chupuria bɨ pẽra,

² mɨ nãɨya minachia sõpiapit'ɨ: abarik'a k'ɨ̃risia uru p'anat'ɨ, chi k'ɨ̃ria p'anat'ɨ, mãɨnepa abarik'a k'ɨ̃risiadepa jõma oot'ɨ.

³ Waapẽarã k'aepẽra atepe pia be k'ɨ̃risia p'anɨnepa mi ãpia pida oorãt'ɨ. Mãɨnepa oorãt'ɨ mãra paepuru pia p'ananai k'orea. Mãɨpari k'ɨ̃risiat'ɨ waapẽarã mãra k'aepẽra atepe pia berã.

⁴ Ara machicha pia p'ananai k'orea jɨrɨrãt'ɨ, mãɨpari jɨrɨt'ɨ waapẽarã sida pia p'ananamẽrá.

⁵ Jesucristopa k'ɨ̃risia bada jĩra k'ɨ̃risiat'ɨ:

⁶ Ichi Tachi Ak'õremina, ara Tachi Ak'õre jĩra abarik'a bai k'ɨ̃risiaé pasima.

⁷ Mãɨpari ichi mãɨya bada itu bɨsima, mãɨ chi chipari pae pari mimiaparí pai k'orea. Maapae ara tachi jĩra nãɨ k'ak'uade beesima.

⁸ Mãɨya ook'ari, chupuri beesima. Tachi Ak'õrepa piui bɨade aside ara mãɨyasima. K'urusude minachia mĩak'ari piui bɨmina ara mãɨyasima.

⁹ Mãɨ k'orea pajãne Tachi Ak'õrepa ichi chi atepe minachia k'awa bɨ bɨsima. Ichi ãarea Chipari bɨsima.

¹⁰ Mãɨya jõma pajãne be, nãɨ ĩjũane be mãɨnepa piudaadarã p'anapataɨmá be Jesú k'ĩrari sĩraporode k'op'aneenaipɨ.

¹¹ Mãɨne jõmãɨrãpa Jesucristo jõmãɨrã Chipariade a jaradaipɨ mãɨnepa Tachi Pajãnepema Ak'õrea pia pedeadaipɨ.

Ũpẽarã nãɨ ĩjũane sãmaasã́ p'ananai p'anɨ

¹² Mãɨya mɨ ũpẽarã chi k'ɨ̃ria berã, mɨ mãra ome badadepa Tachi Ak'õre pedea jara bɨ jĩra oo p'anɨma. Naapae mɨ mãra ome bɨwẽmina Tachi Ak'õre minachia wap'ea p'anɨnepa mãɨ oo p'anat'ɨ ichia mãra k'aripada pẽra.

¹³ Ichiapuru mãra k'aripa bɨma ichia k'ɨ̃ria bɨ oo p'ananamẽrá mãɨnepa mãɨya oo k'ɨ̃ria p'ananamẽrá.

¹⁴ Waapẽarã k'orea k'achia pedeadawẽa mãɨnepa k'ĩruu pedeadawẽa jõma oot'ɨ.

¹⁵ Mãɨya mãra k'orea k'achia pedeadawẽa p'ananaipɨ mãɨnepa jĩp'a p'ananaipɨ. Ẽpẽrarã minachia nemietá oopataɨrã t'ãena p'anɨmina nemietá newẽa p'anat'ɨ. Tachi Ak'õre warrarã pẽra ãchi t'ãena k'ãk'ãi uchuchoapataɨ jĩra p'anɨma.

¹⁶ Chi tachi chok'ae bapiparí pedea k'orea ãchiá pia k'awapi p'anat'ɨ. Mãɨya Cristo cherude mɨ mãra k'orea arapá baipɨ. Mãɨne mɨa k'awaipɨ pari nipaé pasit'a mãɨnepa pari mimiaé pasit'a.

¹⁷ Tãaraawẽa bɨde mɨ Cristo k'orea peadai p'anɨma, uvaba Tachi Ak'õrea weateai jĩra. Ara mãɨya mãrapa Cristode ĩjãa p'anɨt'a ãnimara Tachi Ak'õrea paateai jĩra bɨma. Mãɨ k'orea mɨ mãra ome minachia arapá bɨma.

¹⁸ Ara mãɨ jĩra mãra sida mɨ ome ará arapá p'ananai p'anɨma.

Timoteo mãɨnepa Epap'rodito

¹⁹ Tachi Chipari Jesupa k'ɨ̃riasira, mɨa Timoteo isapea mãramá wãpiipɨ. Mãɨya ichi mãicha mɨmá cherude mɨ sida arapá baipɨ mãra sãmaasã́ p'anɨt'a k'awai pẽra.

²⁰ Nãma mɨ ome ichi jĩra bɨ aba newẽma. Ichia mãra piarã k'aripa k'ɨ̃ria bɨma.

²¹ Jõmãɨrãpa ara ãchi pia p'ananai jɨrɨpatama, Jesucristopa k'ɨ̃ria bɨ jɨrɨdai k'aepẽra.

²² Maamina mãrapa k'awa p'anɨma Timoteopa pia ooparit'a. Warrapa ichi ak'õre k'aripapari jĩra ichia chi pedea pia Cristo k'orea k'aripa jaratea bɨma.

²³ Mɨa mãɨ mɨ sãmaasã́ oodai k'awarude Timoteot'a mãramá peei k'ɨ̃risia bɨma.

²⁴ Maamina k'ɨ̃risia bɨma Tachi Chiparipa mɨ k'aripait'a, tãaraawẽa bɨde mɨ sida mãramá wãi k'orea.

²⁵ Mãrapa ũpẽa Epap'rodito mɨ k'aripamẽrá peesidama. Ichia mɨ ome Tachi Ak'õre pedea jaratea bɨma papaká bɨ chõo bɨ jĩra. Naane mɨa ichi jĩitea wãpiipɨ.

²⁶ Ichia mãra piarã unu k'ɨ̃ria bɨma. Minachia k'ɨ̃risia bɨma, mãrapa ara ichi k'ɨdade bada ũrisida pẽra.

²⁷ Piarã ichi k'ak'ua piawẽa basima. Perá piusima. Maamina Tachi Ak'õrepa ichi k'ĩra chupuriasima. Abapuru ichi k'ĩra chupuriaé pasima, mãɨpari mɨ sida k'ĩra chupuriasima mãɨ atepe minachia k'ɨ̃risiapiemaapa.

²⁸ Mãɨpuru mɨa ichi isapea jĩitea wãpi k'ɨ̃ria bɨma, mãrapa ichi unuutade mãicha arapá p'ananamẽrá. Mãɨya mɨ mãra k'orea minachia k'ɨ̃risia baiwẽma.

²⁹ Ichiá sõpia pedeat'ɨ, Tachi Chiparide ĩjãa bɨ pẽra. Chi ichi jĩra be k'orea pia k'ɨ̃risiat'ɨ.

³⁰ Cristopa oopi bɨ k'orea ichi perá piusima. Mãrapa jãmãɨpa mɨ pae p'ue oodawẽa p'anɨt'a, ichia piui atua oosima.