Mateo 9 - Tachi Ak'õre Pedea

Jesupa sorek'ea bada jɨpada

¹ Jesú p'ãp'orrode batook'ari mãicha senia choma k'ĩaria wãk'ari ichi bapari p'uurudea chesima.

² Mãma ẽpẽra sorek'ea bɨt'a ẽpẽra uapataɨde Jesumá enemeesidama. Jesupa unusima ãchia piarã ĩjãa p'anɨ ichia chi sorek'ea bɨ p'ue jɨpa beepiit'a. Mãɨ k'orea Jesupa chi sorek'ea bɨa jarasima: —Sõpia base, k'ũtã́. Pɨa nemietá ooda k'ɨ̃risia atuasima.

³ Mãma Moisepa bɨda jarateapataɨrã waapẽarã p'anasidama. Mãɨrãpa k'ɨ̃risiasidama: «Ichia Tachi Ak'õre k'ĩrari piawẽa pedea bɨma».

⁴ Maamina ãchia k'ɨ̃risia p'anɨ Jesupa k'awasima. Mãɨpuru jarasima: —Mãrapa ¿k'ãre k'orea mãra sõne jãɨya piawẽa k'ɨ̃risia p'anɨma?

⁵ Mãramá ¿chi sãɨ jarait'a chaarea bɨma? ¿Pɨa nemietá ooda k'ɨ̃risia atuayade ait'a wa p'irabarik'ari nipapade ait'a?

⁶ Tachi Ak'õrepa mɨ, chi Ẽpẽra Warra bɨsima nãɨ ĩjũane p'anɨpa nemietá oopataɨ k'ɨ̃risia atuamẽrá. Mãɨ mãrá unupiipɨ. Ara mãɨne chi sorek'ea bɨa nãɨya jarasima: —P'irabarise. Pɨchi ne ẽpẽra uapataɨ atak'ari tiidá wãse.

⁷ Ara mãɨne chi sorek'ea bada p'irabarik'ari tiidá wãsima.

⁸ Mãɨ unusidaɨde chi mãma p'anana ne wap'easidama. Maamina Tachi Ak'õrea pia pedeasidama ichi jua chaareadepema ẽpẽrá teada, k'ak'ua piawẽa bee jɨpa beepimẽrá.

Jesupa Mateo t'ɨ̃na

⁹ Jesú mãmãɨpa wãrune ẽpẽra Mateo apataɨ unusima. Mãɨ ẽpẽra chi Romanepema pae erreara jɨrɨp'eparí tede suak'abari basima. Jesupa Mateoa jarasima: «Mɨ ome chese». Ara mãɨne Mateo p'irabarik'ari Jesú ome wãsima.

¹⁰ Mãɨya bak'ari Jesú Mateo tede nek'o basima. Jesú ome p'ɨrrɨapataɨrã, Romanepema pae erreara jɨrɨp'epataɨrã mãɨnepa nemietá oopataɨrã Jesú ome nek'o p'anasidama.

¹¹ Waapẽarã p'ariseorãpa mãɨ unusidama. Mãɨ k'orea Jesú ome p'ɨrrɨapataɨrã́ idisidama: —Mãra jarateaparí ¿k'ãre k'orea Romanepema pae erreara jɨrɨp'epataɨrã ome mãɨnepa waapẽarã nemietá oopataɨrã ome ará nek'oparima?

¹² Ãchia mãɨya idiuta Jesupa ũrik'ari jarasima: —K'ak'ua pia berãpa nẽará teaparí jɨrɨdak'ama. Mãɨt'u chi k'ak'ua piawẽa berãpa jɨrɨpatama.

¹³ Nãɨ pedea k'ãre jara bɨ k'awayá wãt'ɨ: “Ãnimara peadak'ari, mɨ pae paateadai k'aepẽra mɨa k'ɨ̃ria bɨma mãrapa waapẽarã k'ĩra chupuria p'ananait'a”. Mɨ chi jĩp'a berã t'ɨ̃i k'orea chewẽa bɨma, mãɨpari nemietá oopataɨrãt'u t'ɨ̃ bɨma Tachi Ak'õremá chedamẽrá.

Nek'odak'apɨ́ ewari k'orea jarateada

¹⁴ Mãɨya bak'ari Juan chi Porochoaparí ome p'ɨrrɨapataɨrã Jesumá chedak'ari idisidama: —Taipa mãɨnepa chi p'ariseorãpa Tachi Ak'õrene k'ɨ̃risiadayá nek'odak'apɨ́ ewari oopatama, maamina chi pɨ ome p'ɨrrɨapataɨrãpa ¿k'ãre k'orea mãɨya oodak'ama?

¹⁵ Jesupa ãchiá jarasima: —Ɨmɨk'ĩrapa wẽra atarude ¿k'ai sõp'ua baima? Mãɨ ɨmɨk'ĩra chi ichia t'ɨ̃narã ome bɨmisa arapá p'ananaipɨ. Maamina chi ewari ará parude waapẽarã ẽpẽerãpa ichi ãyá ateewãnaipɨ. Maapaepuru ichia t'ɨ̃narãpa Tachi Ak'õrene k'ɨ̃risiadayá nek'odak'apɨ́ ewari oodai.

¹⁶ »Tachia neet'á sore k'õa bɨmá p'aru chiwidi ará k'osadak'ama. Mãɨya k'osadaipɨra, chi abaɨ jidibarirupa chi p'aru sore minachia atepe k'õawãipɨ.

¹⁷ Ichiaba abaɨ pida uvaba chiwidi ãnimara e ooda chi sorede t'ɨɨdak'ama. Mãɨya oodaipɨra baak'ak'ari mãɨ ãnimara e ooda chota jĩawãipɨ. Maapae uvaba weawãipɨ mãɨnepa chi ãnimara e ooda ãriipɨ. Mãɨpuru uvaba chiwidi ãnimara e ooda chiwidide t'ɨɨdai p'anɨma. Mãɨya umea tãaraa choadaipɨ.

Jesupa wẽrak'au jɨpada

¹⁸ Jesupa mãɨya jaratea bɨde judiorã chi mãɨrã chaareadepema chesima. Mãɨ ẽpẽra Jesú k'ĩrari bedabari k'obeek'ari jarasima: —Mɨ k'au arat'ea k'ĩrawẽasima. Maamina pɨ wãk'ari pɨ jua ichi ɨ̃rɨ bɨsira ɨ̃rɨmaipɨ.

¹⁹ Jesú p'irabarik'ari mãɨ ẽpẽra ome wãsima. Chi ichi ome p'ɨrrɨapataɨrã sida wãsidama.

²⁰ Mãɨ wãrune wẽra aba ãyo k'ak'o doce oamia jita bɨpa Jesú ãpɨtepa ara k'ait'a wãk'ari, ichi neet'á ɨ̃rɨpema chi i t'õmarisima.

²¹ Mãɨya oosima ichia chi Jesú neet'á ɨ̃rɨpema t'õmarirupa jɨpa beei k'ɨ̃risia bada pẽra.

²² Maamina mãɨya t'õmariside, Jesupa ãpɨtea ak'ɨk'ari, mãɨya jarasima mãɨ wẽrá: —K'au, arapaase. Piarã jɨpa beeit'a ĩjãana pẽra pɨ jɨpa beesima. Ara mãɨne mãɨ wẽra pia beesima.

²³ Jesú judiorã chi chaarea bɨ tede cheside siru chaapataɨrã mãɨnepa jẽapataɨrã unusima.

²⁴ Jesupa ãchiá jarasima: —Ãyá wãt'ɨ. Wẽrak'au piuwẽa bɨma, mãɨpari k'ãi bɨma. Mãɨ k'orea ẽpẽrarãpa ichimá ak'ɨdak'ari eesidama.

²⁵ Maamina ẽpẽrarã ãyá jeret'aak'oak'ari Jesú tiida eda wãsima. Maapae wẽrak'au juade jitak'ari k'ĩrapapisima.

²⁶ Jesupa ooda k'orea ãarea mãɨ tuade ũrisidama.

Jesupa tau p'ãrio p'anana jɨpak'oa bada

²⁷ Jesú mãmãɨpa wãside tau p'ãrio p'anana ume ichi k'aade bia chesidama. Mãɨ ẽpẽrarãpa jĩk'ua jarasidama: —¡Jesú, Davidepa cheda, tai k'ĩra chupuriase!

²⁸ Jesú tiida eda wãside mãɨ tau p'ãrio p'anɨ ichimá chesidama. Maapae Jesupa ãchiá idisima: —¿Mãrapa piarã ĩjãa p'anɨk'ãra mɨa mãra p'ue jɨpa beepiit'a? Ãchia p'anoosidama: —Ãjã, tai Chipari.

²⁹ Maapae Jesupa ãchi taude t'õmarik'ari jarasima: —Mãrapa ĩjãa p'anɨ jĩra mɨa ooipɨ.

³⁰ Ara mãɨne unu p'aneesidama. Maapae Jesupa ũraasima mãɨ abaɨ pida nepɨrɨpidaemaapa.

³¹ Maamina mãmapema wãnak'ari Jesupa ãchi ome ooda jõma mãɨ tuade jarade wãsidama.

³² Mãɨ tau p'ãrio p'anana wãutade waapẽarãpa ẽpẽra k'ĩrame t'urrá bɨ jaore mietá pará bɨ enemeesidama.

³³ Jesupa mãɨ jaore mietá jeret'aak'ari ẽpẽra k'ĩrame t'urrá badapa pedeasima. Ẽpẽrarã mãma p'anɨpa k'awa k'ɨ̃risiadaé pasima. Nãɨya jarasidama: —Israel tuade waidi nãɨ jĩra ununak'a pasima.

³⁴ Maamina p'ariseorãpa jarasidama: —Jãɨ Jesupa jaore mietá ãyá jeret'aaparima, jaore mietaarã chi atepe bɨpa ichiá mãɨ jua chaarea teada pẽra.

Ne uu chauk'ari ¿k'aipa baadaima?

³⁵ Mãɨya bak'ari Jesú p'uuru waibɨa becha mãɨnepa p'uuru chak'e bemá p'ɨrrɨa wãsima. Judiorã ará pedeapataɨ techa jarapachima Tachi Ak'õrepa ichidirã ichi juade ua bɨ k'orea. Ichiaba mãɨ pedea pia jaratea nipasima jõma k'ak'ua piawẽa berã mãɨnepa k'ak'ua p'ua be jɨpa beepik'oasima.

³⁶ Ẽpẽrarã ará minachia nɨbɨ unuk'ari, sõchupuriasima, ãchi chupuria, k'ĩra piaawẽa para bada pẽra, oveja chi ak'ɨparí newẽa p'anɨ jĩra p'anana pẽra.

³⁷ Mãɨne ichi ome p'ɨrrɨapataɨrã́ nãɨya jarasima: —Piarã nãɨ ẽpẽrarã ne uu minachia chau nɨbapari jĩra p'anɨma. Maamina chi mimiapataɨrã waibɨawẽa p'anɨma.

³⁸ Mãɨpuru chi ne uu ĩjũa Chiparia ɨt'aa chiidit'ɨ mimiapataɨrã ichi ne uu ĩjũamá peemẽrá.