Mateo 8 - Tachi Ak'õre Pedea

Jesupa aida pará k'ɨdade bada jɨpada

¹ Jesú eyadepa edá cheside ẽpẽrarã chok'ará ichi k'aade cheepɨrɨsidama.

² Mãɨya bɨde ẽpẽra aida pará bɨ Jesumá chesima. Sĩraporode k'obeek'ari nãɨya idisima: —Mɨ Chipari, pɨa k'ɨ̃ria bɨpɨra, mɨ p'ue jɨpai bɨma.

³ Mãɨne Jesupa jua ɨ̃rɨ bɨrude jarasima: —Mɨa mãɨya oo k'ɨ̃ria bɨma. ¡Jɨpa beese! Ara mãɨne mãɨ ẽpẽra aida pará bada wẽpasima.

⁴ Jesupa ichiá jarasima: —Pɨ jɨpa beeda abaɨa jararãse. Mãɨpari p'aaremá wãse pɨ jɨpa beesit'a unumẽrá. Maapae ne tease Moisepa jarada jĩra. Mãɨya ẽpẽrarãpa pɨ piarã jɨpa beeda k'awadaipɨ.

Jesupa chi papaká bɨ pae pari mimiaparí jɨpada

⁵ Maapae Jesú Capernaum p'uurudea wãsima. Mãma cheside Romanepema papaká berã chi mãɨrã chaarea ichimá chesima. Mãɨpa nãɨya chupuria idisima:

⁶ —Mɨ Chipari, chi mɨ pae pari mimiaparí tiida bɨma. K'ak'ua minachia p'ua bɨẽra k'ɨdade sorek'ea bɨma.

⁷ Mãɨne Jesupa jarasima: —Ichi jɨpade wãipɨ.

⁸ Maamina chi papaká berã chi mãɨrã chaarea bɨpa jarasima: —Mɨ Chipari, mɨ ẽpẽra piawẽa bɨma, pɨ mɨ tede eda wãit'a. Maamina pɨ nãmaripa pedeasira, chi mɨ pae pari mimiaparí jɨpa beeipɨ.

⁹ Ara mãɨ jĩra chi mɨ k'aepẽra atepe chaarea bɨpa jararut'a, mɨa ĩjãa baparima. Ichiaba mɨa jararut'a, chi mɨ juade papaká berãpa ĩjãa p'anaparima. Mɨa abaɨa wãpade arude, wãparima; mãɨnepa abaɨa chepade arude, cheparima. Ichiaba mɨ pae pari mimiaparia ne oopade arude, ooparima.

¹⁰ Mãɨ ũriside Jesupa pia k'ɨ̃risiasima. Mãɨne ichi k'aade wã p'anɨrã́ jarasima: —Piarã mãrá jararuma: nãɨ ẽpẽrapa minachia ĩjãa bɨ jĩra israel ĩjũanepemarã t'ãena aba pida unuk'ama.

¹¹ Mɨa mãrá jararuma: ɨmata ochiaparidepa mãɨnepa ɨmata baeparidepa mãɨ tuadepemarã chok'ará chedaipɨ. Mãɨrã tachi chõarãenapemarã Abrahán ome, Isá ome mãɨnepa Jacobo ome Pajãne Bɨpa ichidirã ichi juade ua bɨ nek'opataɨde suak'abari p'aneenaipɨ.

¹² Maamina Tachi Ak'õrepa ẽpẽrarã naa ua k'ɨ̃ria bada p'ãrionea ãyá jerek'oaipɨ. Mãma jẽa p'ananaipɨ mãɨnepa p'uapa k'ida k'ɨterrea p'ananaipɨ.

¹³ Maapae Jesupa papaká berã chi mãɨrã chaarea bɨa jarasima: —Tedea wãse. Pɨa ĩjãa bɨ jĩra mɨa ooipɨ. Ara mãɨne papaká berã chi mãɨrã chaarea pae pari mimiaparí jɨpa beesima.

Jesupa Simón Pedro p'ak'õre jɨpada

¹⁴ Maapae Jesú Pedro tedea wãsima. Eda wãside Pedro p'ak'õre k'ɨamiapa k'ɨdade bɨ unusima.

¹⁵ Jesupa ichi jua t'õmarik'ari, mãɨ k'ɨa nɨbada tuusima. P'irabarik'ari ãchiá nek'opisima.

¹⁶ K'iuk'ari ẽpẽrarãpa chok'ará jaore mietá pará be Jesumá enemeesidama. Mãɨne Jesupa ara jararupa chi jaore mietá ãarea ãyá jerek'oasima. Ichiaba k'ak'ua piawẽa berã ãarea jɨpa beepik'oasima.

¹⁷ Mãɨyasima Tachi Ak'õre pari pedeaparí Isaíapa jarada jĩra. Nãɨya jarasima: «Tachi k'ɨdade beada ichia jɨpasima mãɨnepa p'ua beada ichia jõpisima».

Jesú ome wãnayá p'anana

¹⁸ Jesupa ẽpẽrarã chi chok'ará ichi adu jũra nɨbɨ unusima. Mãɨ k'orea ichi ome p'ɨrrɨapataɨrã́ senia k'ĩaria wãnayane asima.

¹⁹ Maamina wãnai naena Moisepa bɨda jarateaparí Jesumá chesima. Mãɨ ẽpẽrapa jarasima: Jarateaparí, pɨ wãrumá mɨ pɨ ome wãipɨ.

²⁰ Jesupa ichiá jarasima: —Et'erre k'oparí te pará bɨma mãɨnepa ĩpana te pará bɨma, maamina mɨ, chi Ẽpẽra Warra chi mãma k'ãi newẽa bɨma.

²¹ Mãɨne aba ichi ome p'ɨrrɨa baparipa jarasima: —Mɨ Chipari, pɨ ome wãi naena mɨ ak'õre itu t'ɨbaripise.

²² Jesupa ichiá jarasima: —Mɨ ome chese. Itu bɨse, chi piudaadapa chi piudada t'ɨbaridamẽrá.

Jesupa nãu, senia choma ome k'ĩup'eapida

²³ Maapae Jesú p'ãp'orrode batook'ari ichi ome p'ɨrrɨapataɨrã sida wãsidama.

²⁴ Mãɨya p'anɨne nãu minachia p'õat'ɨ nɨbeek'ari, p'usa minachia k'ĩruu nɨbeek'ari, pania p'ãp'orrode eda wã nɨbeesima. Mãɨmisa Jesú k'ãi basima.

²⁵ Mãɨpuru ichi ome p'ɨrrɨapataɨrãpa ɨ̃rɨmanak'ari nãɨya jarasidama: —¡Tai Chipari, k'aripase! ¡Tachi k'uawãmaa p'anɨma!

²⁶ Mãɨne Jesupa jarasima: —Mãra ¿k'ãre k'orea ne wap'ea p'anɨma? ¡Mãrapa pia ĩjãanawẽa p'anɨma! P'irabarik'ari Jesupa nãua mãɨnepa senia chomá ɨbɨa pedeasima. Ara mãɨne jõma ap'i ũu beesima.

²⁷ Mãɨne ãchia k'awa k'ɨ̃risiadaé pasima. Nãɨya jarasidama: —Nãɨ ¿k'aima? Nãupa mãɨnepa to pida ichi pedea ũripatama.

Jesupa jaore mietá p'anana ãyá jeret'aada

²⁸ Maapae senia choma k'ĩaria wãnak'ari Gadara tuadea chesidama. Mãɨne ẽpẽra ume jaore mietá pará p'anɨ jãɨrã te p'ẽya uriadepa ochiadak'ari Jesumá chesidama. Mãɨ ẽpẽra minachia k'ĩruu p'anapachida pẽra aba pida mãmaria wãnak'a pasima.

²⁹ Mãɨne Jesua jĩk'ua biasidama: —¡Tachi Ak'õre Warra! ¿K'ãre k'orea mɨ ome bariyá bɨma? ¿Tai mĩapiyá ewari chei naena pɨ cheruk'ãra?

³⁰ Mãɨ ara k'ait'a sina chi chok'ará nek'o para basima.

³¹ Mãɨpuru chi jaore mietaarãpa Jesua nãɨya chichupuria idisidama: —Pɨa tai ãyá jeret'aaipɨra, sina k'ak'uade eda wãpise.

³² Mãɨne Jesupa jarasima: —Wãt'ɨ. Ara mãɨne jaore mietaarã mãɨ ẽpẽrarã k'ak'uadepema wãnak'ari sina k'ak'uade eda wãsidama. Mãɨpa sina p'ira errodak'ari p'ẽyanepa toedá t'ĩuk'oa wãsidama. Mãɨya ãarea todepa piusidama.

³³ Mãɨ sinarã ak'ɨ p'ananapa mãɨya ununak'ari, p'ira wãsidama p'uurudea. Mãma padak'ari ẽpẽrarã jaore mietá pará beadapa mãɨ ãarea nepɨrɨsidama.

³⁴ Mãɨ k'orea chi p'uurudepemarã ãarea Jesú bɨmá chesidama. Ununak'ari Jesua chichupuria idisidama ãchi tuadepema ãyá wãmẽrá.