Mateo 5 - Tachi Ak'õre Pedea

Tachi pia p'ananai Jesupa jarateada

¹ Ẽpẽrarã chok'ará unuside Jesú eyadea ɨt'aa wãk'ari suak'abari beesima. Mãɨne ichi ome p'ɨrrɨapataɨrã ichimá chesidama.

² Maapae Jesupa nãɨya jarateasima:

³ «Pia p'anɨma mãra chi chichupuria berã k'awa p'anɨrã, mãɨ Tachi Ak'õrepa mãra ichi juade ua bɨẽra.

⁴ Pia p'anɨma mãra sõp'ua p'anɨrã, Tachi Ak'õrepa mãɨ sõp'ua bɨt'a jõpii pẽra.

⁵ Pia p'anɨma mãrapa atepe k'awa p'ananai k'orea jɨrɨdawẽa p'anɨrã, Tachi Ak'õrepa mãrá jõma nãɨ ĩjũa jɨ̃anamẽrá teai pẽra.

⁶ Pia p'anɨma chi ãchi sõne jĩp'a oo k'ɨ̃ria p'anɨrã, mãɨ ãchia k'ɨ̃ria be Tachi Ak'õrepa teai pẽra.

⁷ Pia p'anɨma mãra k'ĩra chupuria idi p'anɨrã, mãɨ Tachi Ak'õrepa k'ĩra chupuria idii pẽra.

⁸ Pia p'anɨma mãra sõnepa abapuru Tachi Ak'õre pae p'anɨrã, Tachi Ak'õre ununai pẽra.

⁹ Pia p'anɨma chi mãɨ ẽpẽrapa nepɨra tachi ũpẽa ome uru p'anɨ mãɨ k'aripa p'anɨrã, Tachi Ak'õre warrarãane adai pẽra.

¹⁰ Pia p'anɨma chi jĩp'a be k'orea waapẽarãpa mĩapi p'anɨrã, Pajãne Bɨpa ichi juade ua bɨẽra.

¹¹ Mɨ k'orea k'achia pedeadaipɨra, mĩapii p'anɨpɨra mãɨnepa wawaria seadepa k'achia pedeadaipɨra, mãra pia p'anɨma.

¹² Minachia arapá p'anat'ɨ, mãrapa nepia waibɨa pajãne uru p'ananai pẽra. Chõarãenapema ewaride pida Tachi Ak'õre pari pedeapataɨrã ara mãɨ jĩra ẽp'ẽsidama mĩapidai k'orea.

T'ã mãɨnepa ɨnaa bɨ

¹³ »Mãra nãɨ ĩjũane t'ã jĩra p'anɨma. Maamina t'ã k'ɨyaa jõsira ¿sãmaasã́ mãicha k'ɨyaa beeima? Jãapae k'ɨ̃rianaiwẽma. Tajatá amaai pia bɨma t'ɨadamẽrá.

¹⁴ Mãra ɨnaa jĩra p'anɨma, nãɨ ĩjũanepemarãpa mãra k'orea Tachi Ak'õre unu p'anɨ pẽra. P'uuru eyade bɨ ¿sãmaasã́ mẽranaima?

¹⁵ Ichiaba laap'ara uruapidak'ama ne yaapataɨ ek'ari mẽra bɨdai k'orea. Mãɨ k'aepẽra uruapidak'ari, ne ɨtɨa ɨ̃rɨ bɨpatama ẽpẽra te eda p'anɨrãpa ɨnaa ununamẽrá.

¹⁶ Ara mãɨ jĩra ẽpẽrarã k'ĩrari pia oo p'anat'ɨ ãchia Tachi Ak'õre pajãne bɨa pia pedeadamẽrá.

Jesupa Moisepa bɨda jarateada

¹⁷ »K'ɨ̃risiarãt'ɨ mɨ chesima Moisepa bɨda itu bɨpiemaapa, mãɨyawẽpɨra Tachi Ak'õre pari pedeapataɨrãpa bɨdada itu bɨpiemaapa. Mɨ mãɨ k'orea cheé pasima. Mãɨ k'aepẽra mɨ chesima ãchia jara p'anɨ jõma piarã ooi k'orea.

¹⁸ Mɨa piarã jararuma: pajã mãɨnepa nãɨ ĩjũa bɨmisa mãɨ Moisepa bɨdadepema letra aba mi ãpia pida jõiwẽma, aba mãɨne jara bɨ ãarea baerudea.

¹⁹ Mãɨneepuru ẽpẽrapa Moisepa bɨdade ne oopi bɨ pedea ooepɨra, mãɨ ãpia pida ooepɨra; mãɨyawẽpɨra waapẽarã́ jarateaipɨra ara mãɨya oopiemaapa, mãɨ waapẽarã k'aepẽra ãpia baipɨ Pajãne Bɨpa ichi juade ua bɨ t'ãena.

²⁰ Mɨa piarã jararuma: Moisepa bɨda jarateapataɨrãpa oo p'anɨ k'aepẽra mãɨnepa p'ariseorãpa oo p'anɨ k'aepẽra mãrapa jĩp'a oodaepɨra, Pajãne Bɨpa mãra ichi juade ua baiwẽma.

Jesupa k'ĩruupida k'orea jarateada

²¹ »Mãrapa k'awa p'anɨma tachi chõarãenapemarãpa nãɨya jarapachidama: “Mĩa pearãse”. Mãɨnepa “Peasira mãra chi chaarearãpa ɨtɨadaima”.

²² Maamina mɨa jararuma: abaɨpa chĩara ome k'ĩruusira Tachi Ak'õrepa ɨtɨaipɨ. Abaɨpa chĩará k'ĩra piawẽa bɨade arupara, mãɨ chi chaarearãpa ɨtɨadaima. Ichiaba abaɨpa chĩará k'achia pedeasira, Tachi Ak'õrepa t'ɨpɨ tau uruadea wãpiipɨ.

²³ »Mãɨpuru pɨ Tachi Ak'õre pae ne paapataɨdea ateerude, pɨ ũpẽa pɨ ome nepɨra uru bɨ k'ɨ̃risiasira, pɨa ãnimara Tachi Ak'õre pae paai pada paatearãse.

²⁴ Mãɨpari chi ãnimara paapataɨk'á ameek'ari pɨ ũpẽa ome pia pedeade wãse, ichi ome sõpia p'aneenai k'orea. Maapaepuru jĩitea chek'ari pɨ ãnimara Tachi Ak'õrea paatease.

²⁵ »Pɨa ooda k'orea pɨ chi nek'ĩramaapa pɨ chi nepɨra ak'ɨparimá ateewãipɨra, ode wãutade ichi ome ãarea pedease, ichi ome sõpia beei k'orea. Mãɨya oowẽpɨra, ichia pɨ chi ak'ɨparí juade bɨipɨ. Maapae chi ak'ɨparipa pɨ chi jɨ̃a nɨbɨpataɨ te ot'eaparia jitapiipɨ eda jɨ̃a nɨbɨmẽrá.

²⁶ Mɨa piarã jararuma: pɨ jãmapema wãiwẽma aba pɨa teai bɨ erreara ãarea p'aarudea.

K'ima awaraɨ ome k'ãipataɨ k'orea jarateada

²⁷ »Mãrapa k'awa p'anɨma nãɨya jarapataɨ: “K'ima awaraɨ ome k'ãirãse”.

²⁸ Maamina mɨa mãrá jararuma: abaɨpa wẽra ak'ɨk'ari k'ɨ̃riasira abaeda mãɨ wẽra ome ichi sõnepa nemietá oosima.

²⁹ »Mãɨpuru pɨ tau juaraaripemapa pɨá nemietá oopisira, mãɨ noet'aak'ari amaat'aase nemietá ooemaapa. Pɨ k'ak'uadepema abawẽa beerumina, ewaricha Tachi Ak'õre ome baipɨ. Mãɨya pia bɨma Tachi Ak'õrepa pɨ k'ak'ua jõma t'ɨpɨ tau uruadea bat'a peei k'aepẽra.

³⁰ Ichiaba pɨ juaraaripemapa pɨá nemietá oopisira, mãɨ bɨat'ut'aak'ari amaase nemietá ooemaapa. Pɨ k'ak'uadepema abawẽa beerumina, ewaricha Tachi Ak'õre ome baipɨ. Mãɨya pia bɨma Tachi Ak'õrepa pɨ k'ak'ua jõma t'ɨpɨ tau uruadea bat'a peei k'aepẽra.

Jesupa jarateada wẽra amaanai k'orea k'ɨ̃risiada

³¹ »Ichiaba nãɨya jarapachima: “Abaɨpa ichi wẽra amaai k'ɨ̃risiasira, chi wẽrá amaai k'orea k'art'a bɨda teai pia bɨma”.

³² Maamina mɨa jararuma ɨmɨk'ĩra abaɨpa chi k'ima awaraɨ ome k'ãiwẽa bɨt'a amaasira mãɨnepa mãɨ wẽra awaraɨ ome k'ãisira, Tachi Ak'õre taade mãɨ ɨmɨk'ĩrapa mãɨ wẽrá nemietá oopii bɨma, awaraɨ ome k'ãii pada pẽra. Mãɨ awara ẽpẽrapa wẽra amaana atasira chi k'ima pamẽrá, mãɨ ẽpẽrapa nemietá oo bɨma.

Tachi Ak'õre k'ĩrari piarã ne ooyade ada jarateada

³³ »Mãrapa k'awa p'anɨma tachi chõarãenapemarãpa nãɨya jarapachidama: “Pɨa Tachi Chipari k'ĩrari piarã ne ooyade aipɨra piarã ooi pia bɨma”.

³⁴ Maamina mɨa jararuma: ni abaɨ t'ɨ̃ne piarã ne oodayade arãt'ɨ. Pajã t'ɨ̃ne piarã ne oodayade arãt'ɨ, pajã Tachi Ak'õre poro jũra jɨ̃parí jɨ̃ bɨ suak'a beeparí jĩra bɨẽra.

³⁵ Nãɨ ĩjũa t'ɨ̃nepa piarã ne oodai arãt'ɨ, nãɨ ĩjũa Tachi Ak'õre jĩru bɨparí jĩra bɨẽra. Ichiaba Jerusalén t'ɨ̃nepa piarã ne oodayade arãt'ɨ, Jerusalén Tachi Ak'õre Poro jũra jɨ̃parí jɨ̃ bɨ p'uuru pẽra.

³⁶ Ichiaba ara pɨchi t'ɨ̃ne piarã ne ooyade arãse, pɨ puda aba pida p'ue t'orroapiiwẽa bɨẽra ichiaba p'ue p'aimaapiiwẽa bɨẽra.

³⁷ Mãrapa ne oodayade adaipɨra, oot'ɨ. Ichiaba oodawẽane adaipɨra, oorãt'ɨ. Mãɨ paritua t'ɨ̃ne piarã ne ooyade a jarasira mãɨ pedea nemietaadepa che bɨma.

Pɨchi nemietá ooda choayade ada

³⁸ »Mãrapa k'awa p'anɨma nãɨya jarapataɨ: “Abaɨ pida chĩara tau jĩap'et'asira chi mãɨya ooda abarik'a tau jĩap'et'ai pia bɨma. K'ida bɨap'et'asira chi mãɨya ooda abarik'a k'ida bɨap'et'ai pia bɨma”.

³⁹ Maamina mɨa jararuma: pɨ piawẽa oosidara k'ĩup'ea choase. Abaɨpa pɨ uitarra chi juaraaripema p'esira, ichiaba uitarra juawieripema unupise p'emẽrá.

⁴⁰ Mãɨ abaɨ pɨ ome k'ĩruusira chi nepɨra ak'ɨparí taade pɨ neet'á ɨ̃rɨ jɨ̃parí ẽemarii k'orea, pɨchi neet'á ek'aripema sida tease.

⁴¹ Ichiaba ẽpẽra chaarea bɨpa ne chɨk'ɨa uapisira kilómetro aba, sõpia ua ateewãse kilómetro ume.

⁴² Mãɨ awara abaɨ pida pɨá ne idiipɨra tease mãɨnepa ne teadoopade asira, wãak'arãse.

Tachi nek'ĩramá k'ɨ̃ria bapade ada

⁴³ »Mãrapa k'awa p'anɨma nãɨya jarapataɨt'a: “Ẽpẽra abaɨ k'ɨ̃riase, maamina pɨ nek'ĩramá unuemaa uru base”.

⁴⁴ Maamina mɨa jararuma: mãra chi nek'ĩramá k'ɨ̃riat'ɨ. Chi mãrá k'achia pedeautá pia pedeat'ɨ; mãra k'ĩramá p'anɨrã pia oot'ɨ. Tachi Ak'õrea ɨt'aa chiidit'ɨ ãchi k'aripamẽrá.

⁴⁵ Mãɨya baipɨ mãra Ak'õre pajãne bɨ warrarãpɨ. Tachi Ak'õrepa ɨmata ochiapiparima ẽpẽra sõpia berã ɨ̃rɨ, k'achia berã ɨ̃rɨ pida. Ẽpẽra jĩp'a be k'orea chi jĩp'a bewẽa k'orea pida k'oe chepiparima.

⁴⁶ Maamina mãrapa abapuru mãra k'õp'ãerorãt'a k'ɨ̃ria p'ananaipɨra, ¿k'ãret'a nepia Tachi Ak'õrepa teaima? Romanepema pae erreara jɨrɨp'epataɨrã pida mãɨ jĩra oopatama.

⁴⁷ Mãɨ awara mãrapa waapẽarã́ pia pedeasidara, ¿nepia oo p'anɨk'ãra? Chi Tachi Ak'õrene ĩjãanak'apɨɨrã pida mãɨya oopatama.

⁴⁸ Mãɨpuru jõmãɨrã k'ɨ̃ria beat'ɨ mãra Ak'õre pajãne bɨpa jõmãɨrã k'ɨ̃ria bɨ jĩra.