Mateo 3 - Tachi Ak'õre Pedea

Juan chi Porochoaparí k'orea bɨda

¹ Mãɨya bak'ari Juan chi Porochoaparipa Judeade ĩjũa pania newẽa bɨde jaratea beesima.

² Nãɨya jarapachima: «Pajãne Bɨ cheruma ichidirã ichi juade ua bai k'orea. Mãɨ k'orea mãrapa nemietá oopataɨ itu bɨdak'ari ichimá chet'ɨ».

³ Mãɨ Juan k'orea Tachi Ak'õre pari pedeaparí Isaíapa jarasima: «Ẽpẽra ĩjũa pania newẽa bɨde jĩk'ua pedea bɨma: “O jarit'ɨ Tachi Chipari pia chemẽrá. O ichi pae jĩp'a jarit'ɨ”».

⁴ Juan neet'á camello k'ara k'ada jɨ̃pachima. Ichi k'ɨrrɨde jɨ̃parí ãnimara e ooda jɨ̃pachima. Sisi k'opachima mãɨnepa mẽapema jɨrrɨjõ jõpachima.

⁵ Mãɨne ẽpẽrarã Jerusalenepemarã, ãarea Judea tuadepemarã mãɨnepa ãarea Jordán to k'ait'a berã Juanmá wãpachidama.

⁶ Ãchia nemietá oodada ichi k'ĩrari jaradak'ari ãchi Jordán tode porochoapachima.

⁷ Mãɨya bɨde chi eda waapẽarã Moisepa bɨda jarateapataɨrã chesidama Juanpa porochoamẽrá. Chi eda waapẽarã p'ariseorã pasima; chi waapẽarã saduceorã pasima. Maamina Juanpa ãchi unurune jarasima: «Mãra taama jĩra berã, ¿K'aipa jarasima mãra Tachi Ak'õrepa tachi ɨtɨai ewaridepema p'ue mĩrunait'a?

⁸ Mãrapa oo p'anɨnepa mãra nemietá oo p'anana piarã itu bɨdada unupit'ɨ.

⁹ K'ɨ̃risiarãt'ɨ Abrahanepa chedaadarã pẽra Tachi Ak'õrepa ɨtɨaiwẽane arãt'ɨ. Mɨa mãrá jararuma: “Tachi Ak'õrepa k'ɨ̃riaipɨra, cha be mawaradepa Abrahanepa chedaadarã papik'oaipɨ”.

¹⁰ Tachi Ak'õrepa chaara uru bɨma pak'uru t'ut'aak'oai k'orea. Ãarea pak'uru pia chaudak'a t'ut'aak'oak'ari t'ɨpɨde bat'ak'oaipɨ.

¹¹ »Mɨa mãra paniapa porochoaparima unupidamẽrá mãra nemietá oopataɨ itu bɨdaadat'a. Maamina chi mɨ k'aadea cherut'a mɨ k'aepẽra chi minachia atepe k'awa bɨma. Mãɨpuru ichia jĩrune jɨ̃ bɨ ẽrai k'orea mɨ mãɨ pae pida pia bɨwẽma. Ichiapuru Tachi Ak'õre Jaoredepa porochoaipɨ. Maamina ĩjãanaepɨra ɨtɨaipɨ.

¹² Ɨt'aa jira bat'aparí ichi juade uru bɨma chi trigo tau jora ãyá amaai k'orea. Maapae chi tau ẽechoada yaaipɨ maamina chi jora t'ɨpɨ uruade paaipɨ. Mãɨ k'iik'ama».

Juanpa Jesú porochoada

¹³ Mãɨ ewaride Jesú Galilea tuadepa Jordán todea chesima Juanpa ichi porochoamẽrá.

¹⁴ Maamina Juanpa porochoaemaapa jarasima: —Pɨapuru mɨ porochoai pia bɨma. ¿K'ãre k'orea pɨ mɨmá cheruma?

¹⁵ Mãɨne Jesupa p'anoosima: —Nãɨena pɨa oopari jĩra oose. Tachia ãarea jĩp'a oodai p'anɨma Tachi Ak'õrepa oopi bɨ jĩra. Ara mãɨne Juanpa ĩjãasima.

¹⁶ Jesú porochoak'ari toedaɨpa tuá wãrune mãɨya bɨde pajã ewa wãsima. Mãɨne Jesupa Tachi Ak'õre Jaore p'aloma jĩra ichi ɨ̃rɨ cheru unusima.

¹⁷ Mãɨ awara Tachi Ak'õre pajãnepa edá pedearu ũrisidama. Nãɨya jarasima: «Nãɨt'a mɨ Warra chi k'ɨ̃ria bɨpɨ. Mɨ ichi k'orea minachia sõ arapá bɨma».