Mateo 28 - Tachi Ak'õre Pedea

Jesú chok'ae p'irabarida

¹ Mimianak'apɨ́ ewari jõk'ari tomio ãsã pa wãrune, María Magdalena, abaɨ María ome Jesú t'ɨbaridaadamá ak'ɨde wãsidama.

² Mãɨne iurumia minachia oresima. Tachi Chiparipa ɨt'aripa peeda chek'ari uria jõat'ɨ k'obɨ mawara ãyá bɨk'ari mãɨ ɨ̃rɨ suak'abari beesima.

³ Ichi k'ĩra pa achiterreapari jĩra urua basima. Ichi neet'á minachia t'ot'oa basima.

⁴ Ichi minachia wap'ea p'anɨẽra papaká berã wɨwɨrrɨa nɨp'aneenak'ari abaeda piuda jĩra p'aneesidama.

⁵ Maamina Tachi Ak'õrepa ɨt'aripa peedapa wẽrarã́ jarasima: —Wap'earãt'ɨ. Mɨa k'awa bɨma mãrapa Jesú k'urusude barijira bɨdada jɨrɨ p'anɨt'a.

⁶ Ichi nãma bɨwẽma. Piarã chok'ae p'irabarisima ichia jarada jĩra. Ichi t'ɨbaridaadamá ak'ɨde chet'ɨ.

⁷ Mãɨ isapea wãnak'ari ichi ome p'ɨrrɨapataɨrã́ nãɨya jarat'ɨ: “Ichi piu bada chok'ae p'irabarisima. Ichi mãra naa wãipɨ Galilea tuadea. Jãma ichi ununaipɨ”. Mãɨ mɨa mãrá jarade chesima.

^8-9 Ara mãɨne wẽrarã Jesú k'ak'ua t'ɨbaridaadamãɨpa p'ira wãsidama. Wap'ea p'ananak'ari maamina sõ arapá wãsidama. Jesú ome p'ɨrrɨa p'ananarã́ jarade wãutade Jesú chek'ari ãchiá pia pedeasima. Maapae wẽrarã ichimá chedak'ari ichi jĩru oredak'ari, ichi minachia k'ɨ̃riasidama.

¹⁰ Mãɨya p'anɨne Jesupa jarasima: —Ne wap'earãt'ɨ. Ũpẽarã́ jarade wãt'ɨ Galilea tuadea wãnamẽrá. Jãma ãchia mɨ ununaipɨ.

Papaká berãpa nepɨrɨdada

¹¹ Wẽrarã wãutamisa waapẽarã papaká berã Jesú t'ɨbaridaadamá ak'ɨ p'anana p'uurudea wãsidama. Ãchia ununana p'aarerã chi mãɨrã chaarearã́ jõma nepɨrɨsidama.

¹² Mãɨ k'orea p'aarerã chi mãɨrã chaarearã mãɨnepa judiorã chaarearã ome ará p'anasidama. Pedea aba audak'ari papaká berã́ erreara minachia teasidama.

¹³ Teautade nãɨya jarasidama: «Abaɨpa idisira, jarat'ɨ mãra k'ãi p'anɨmisa chi Jesú ome p'ɨrrɨadaadarã teamasi chedak'ari ichi k'ak'ua chɨa ateewãsidat'a.

¹⁴ Pilatopa mãra k'ãinana ũriipɨra, tai ichi ome mãra k'orea pedeadaipɨ nepɨrade baepidaemaapa».

¹⁵ Maapae papaká berãpa erreara jitadak'ari jarasidama chi Jesú ome p'ɨrrɨadaadarãpa ichi k'ak'ua chɨa ateewãsidat'a. Judiorãpa idiapae pida mãɨya jarapatama.

Jesupa peedaɨrã́ ichi unupida

¹⁶ Mãɨya bak'ari Jesú ome p'ɨrrɨapataɨrã once p'anɨ Galilea tuadea wãsidama Jesupa jaradamá eyadea.

¹⁷ Ichi unusidaɨde ichiá pia pedeasidama maamina waapẽarãpa ãpia ĩjãanaé pasima.

¹⁸ Mãɨne Jesú ãchi k'ait'a chek'ari jarasima: —Tachi Ak'õrepa mɨá jua chaarea teasima pajãne mãɨnepa nãɨ ĩjũane ne ãarea mɨ juade uru bamẽrá.

¹⁹ Mãɨ k'orea ãarea p'uuru becha wãnak'ari jarateat'ɨ mɨ ome p'ɨrrɨadamẽrá. Ãchi chi Ak'õre t'ɨ̃nepa, chi Warra t'ɨ̃nepa, Tachi Ak'õre Jaore t'ɨ̃nepa porochoat'ɨ.

²⁰ Ãchiá jarateat'ɨ mɨa mãrá jarada jõma ĩjãanak'ari oodamẽrá. Mãɨne mɨ mãra ome ewaricha baipɨ aba nãɨ ewari jõrunea.