Mateo 26 - Tachi Ak'õre Pedea

Jesú jitapidai pedea audada

¹ Jõma mãɨ jarateak'ari Jesupa ichi ome p'ɨrrɨapataɨrã́ jarasima:

² —Mãrapa k'awa p'anɨma ewari ume parude, Egitodepa wãnana k'ɨ̃risiapataɨ ewari oodaipɨ. Mãɨne abaɨpa mɨ, chi Ẽpẽra Warra jitapiipɨ k'urusude barijira bɨk'ari, peadamẽrá.

³ Mãɨmisa judiorã chaarearã, Moisepa bɨda jarateapataɨrã mãɨnepa p'aarerã chi mãɨrã chaarearã Caip'á te chomane ãarea ará jere nɨbeesima. Mãɨ Caip'á p'aare minachia k'awa bɨ basima.

⁴ Mãɨne pedea ausidama Jesú k'ĩup'ea jitadak'ari peapidai k'orea.

⁵ Maamina jarasidama: —Arapaapataɨ ewaride jitadaiwẽma ẽpẽerã k'ĩruupidaemaapa».

Wẽrapa nardo k'era Jesú poro ɨ̃rɨ weada

⁶ Mãɨ ewaride Jesú Betania p'uurude Simón aida jita bada temá basima.

⁷ Mãɨne wẽra ichimá chesima. Mãɨ wẽrapa pot'eya alabastro mawara ooda enemeesima. Pot'eya k'era minachia neepɨa bɨ ipiru basima. Jesú suak'abari beek'ari nek'omaa bɨde wẽrapa orrobarik'ari mãɨ k'era ichi poro ɨ̃rɨ weasima.

⁸ Jesú ome p'ɨrrɨapataɨrãpa mãɨ ununak'ari k'ĩruusidama. Nãɨya jarasidama: —¿K'ãre k'orea jãɨ k'era pari ãrisima?

⁹ Netodapara erreara minachia jitadai pasima. Mãɨnepa chichupuria k'ede k'aripadai pasima.

¹⁰ Maamina Jesupa mãɨ ũrina pẽra jarasima: —¿K'ãre k'orea ichi ɨtɨa p'anɨma? Ichia mɨ jãɨya ooda pia bɨma.

¹¹ Chichupuria k'ede ewaricha mãra t'ãena p'ananaipɨ, maamina mɨ mãra ome ewaricha baiwẽma.

¹² Tãaraawẽa bɨde, mɨ piuk'ari t'ɨbaridaipɨ. Nãɨ wẽrapa mɨ mãɨ k'orea k'erapa p'ɨrɨsima.

¹³ Mɨa piarã jararuma: jõma nãɨ ĩjũane chi pedea pia mɨ k'orea jarautamá nãɨ wẽrapa ooda nepɨrɨdaipɨ ichi k'ɨ̃risiadamẽrá.

Judapa Jesú jitapii k'orea k'ɨ̃risiada

¹⁴ Juda Iscariote apataɨ Jesupa doce peedaɨrãnepema pasima. Mãɨ Juda p'aarerã chi mãɨrã chaarearãmá wãsima.

¹⁵ Ichia nãɨya idisima: —Mɨa mãrá Jesú jita teaipɨra, ¿mãrapa mɨá jõmasã́ teadaima? Mãɨne ãchia erreara tau treinta teasidama.

¹⁶ Mãɨ ewaridepa Judapa k'ɨ̃risia basima sãmaasã́ Jesú jitapii.

Jesupa doce peedaɨrã ome nek'oda

¹⁷ Judiorã p'ana ooropiparí newẽa k'opataɨ arapaapataɨ ewari pasima. Tomioama mãɨya k'opachidama. Chi naapema ewaride chi Jesú ome p'ɨrrɨapataɨrãpa ichimá wãnak'ari idisidama: —¿Pɨa sãma k'ɨ̃ria bɨma taipa Egitodepa wãnana k'ɨ̃risiapataɨ ewari nek'opataɨ pɨ pae oodait'a?

¹⁸ Jesupa p'anoosima: —Jerusalenea tachia k'awa p'anɨ ẽpẽramá wãt'ɨ. Ichiá nãɨya jarat'ɨ: “Tachi Jarateaparipa jara bɨma ichi ewari k'ait'a bɨ. Ichia mãɨnepa chi ichi ome p'ɨrrɨapataɨrã pida arapá nek'opataɨ k'odaipɨ pɨ tiida, Egitodepa wãnana k'ɨ̃risiadai k'orea”.

¹⁹ Ara mãɨne Jesupa jarada jĩra ichi ome p'ɨrrɨapataɨrãpa Egitodepa wãnana k'ɨ̃risiapataɨ ewari nek'opataɨ oosidama.

²⁰ K'iuk'ari Jesú, chi ichi ome p'ɨrrɨapataɨrã doce p'anɨ ome nek'opataɨ ik'idá suak'abari beesima.

²¹ Nek'omaa p'anɨne ichia jarasima: —Mɨa piarã jararuma: aba mãranepemapa mɨ jitapiipɨ.

²² Mãɨpuru ãchi minachia k'ĩra piawẽa p'aneesidama. Ara mãɨne ãchia abaabá idisidama ichiá: —Mɨ Chipari, ¿mɨa mãɨyaik'ãra?

²³ Ichia p'anoosima: —Chi mɨ ome p'arat'u aba bɨde nek'omaa bɨpa mɨ jitapiipɨ.

²⁴ Piarã mɨ, chi Ẽpẽra Warra piui bɨma Tachi Ak'õre pedeade bɨ bɨ jĩra. ¡Maamina chi mɨ jitapii bɨ ẽpẽra mãɨ chichupuria baipɨ! Pia basima, mãɨ ẽpẽra t'õwẽa badapara.

²⁵ Mãɨne Juda, chi Jesú jitapii bɨpa idisima: —Jarateaparí, ¿mɨa mãɨyaik'ãra? Jesupa p'anoosima: —Ãjã, pɨa mãɨya jara bɨma.

²⁶ Nek'omaa p'anɨne Jesupa p'ana juade jitak'ari ɨt'aa chiidik'ari Tachi Ak'õrea sõpia bɨade a jarasima. Maapae t'oet'aak'ari ichi ome p'ɨrrɨapataɨrã́ tearude jarasima: —Jitat'ɨ. K'ot'ɨ. Nãɨ mɨ k'ak'uapɨ.

²⁷ Maapae pasu jitak'ari Tachi Ak'õrea sõpia bɨade asima. Maapae ãchiá tearude jarasima: —Jõmãɨrãpa tot'ɨ.

²⁸ Nãɨ mɨ oapɨ. Mɨ oa ãrirunepa Tachi Ak'õrepa pedea chiwidi bɨ bɨma chok'ará ẽpẽerãpa nemietá oodada k'ɨ̃risia atuai k'orea.

²⁹ Mɨa jararuma: mɨa uvaba waa toiwẽma aba mɨ Ak'õrepa jõma ichidirã ichi juade ua beerudea. Mãɨyapuru mɨa mãra ome uvaba mãicha toipɨ.

Pedropa Jesú ichi tuaba ameewẽane ada

³⁰ Maapae Tachi Ak'õre pedea bɨ bɨdadepema k'aridak'ari Olivo eyadea wãsidama.

³¹ Mãɨne Jesupa ãchiá jarasima: —Nãɨ teamasi mãrapa ãarea mɨ tuaba ameenaipɨ. Tachi Ak'õre pedeade nãɨya bɨ bɨma: “Mɨa chi oveja ak'ɨparí pearude chi oveja jĩichoadaipɨ”.

³² Maamina mɨ chok'ae p'irabarik'ari mãra naa wãipɨ Galilea tuadea.

³³ Mãɨne Pedropa Jesua jarasima: —Jõmãɨrãpa pɨ tuaba ameenaimina, mɨa pɨ ameeiwẽma.

³⁴ Jesupa Pedroa jarasima: —Mɨa piarã jararuma: piarã ara nãɨ teamasi et'erre pirui naena pɨa bari k'ak'o ũpea mɨ unuk'aade aipɨ.

³⁵ Maamina Pedropa jarasima: —Mɨ pɨ ome peautamina, pɨ tuaba ameeiwẽma. Chi waapẽarãpa ara abarik'a jarasidama.

Jesú Getsemanine Tachi Ak'õrea ɨt'aa chiidida

³⁶ Jesú mãɨnepa chi ichi ome p'ɨrrɨapataɨrã Getsemaní apataɨmá pade wãsidama. Mãma Jesupa ãchiá jarasima: —Mɨ jãmá Tachi Ak'õrea ɨt'aa chiidide wãrumisa nãma suak'abari p'aneet'ɨ.

³⁷ Maapae Zebedeo warrarã ume p'anɨ, Pedro ome awara ateewãsima. Ichi mãɨya bai bɨẽra, k'ĩra piawẽa beek'ari, sõp'ua beesima.

³⁸ Mãɨne ãchiá jarasima: —Mɨ piui jĩra bɨma sõp'uapa. Nãma p'aneet'ɨ. Mɨ ome k'ãinawẽa p'anat'ɨ.

³⁹ Jesú wawá wãk'ari sĩraporode bedabari k'obeek'ari, ichi tau bɨɨrɨ ĩjũanea t'õmaripik'ari Tachi Ak'õrea ɨt'aa chiidisima: «Ak'õre, pɨa k'ɨ̃ria bɨpɨra, mɨ itu mĩapirãse. Maamina mɨa k'ɨ̃ria bɨ jĩra oorãse. Oose pɨapuru k'ɨ̃ria bɨ jĩra».

⁴⁰ Maapae Jesú ichi ome p'ɨrrɨapataɨrã ũpea p'anɨmá jĩitea cherude ãchi k'ãi p'anɨ unusima. Pedroa jarasima: —¿Mãra mɨ ome mi ãpia pida hora aba pida p'ue chok'ae p'ananaiwẽk'ãra?

⁴¹ Mãra tau pará p'anat'ɨ. Tachi Ak'õrea ɨt'aa chiidit'ɨ mãra nemietaade baedaemaapa. Mɨa k'awa bɨma mãrapa nepia oo k'ɨ̃ria p'anɨt'a. Maamina machi k'ak'uapa choadawẽa p'anɨma.

⁴² Maapae Jesú mãicha wãk'ari Tachi Ak'õrea ɨt'aa chiidisima: «Mɨ Ak'õre, mɨ minachia mĩapiipɨra, pɨa k'ɨ̃ria bɨ jĩra mĩapise».

⁴³ Ichi ome p'ɨrrɨapataɨrãmá mãicha cherude k'ãi p'anɨ unusima. Ãchi tau tap'ok'ea wãna p'anasidama.

⁴⁴ Ãchi mãicha ameek'ari wãsima. Tachi Ak'õrea abarik'a ɨt'aa chiidisima.

⁴⁵ Maapae ichi ome p'ɨrrɨapataɨrãmá jĩitea chek'ari jarasima: —Mãra ¿wapida k'ãi p'anɨk'ãra? Mɨ ewari arí pasima. Abaɨpa mɨ, chi Ẽpẽra Warra ẽpẽerã k'achia p'anɨ juade teaipɨ.

⁴⁶ P'irabarit'ɨ. Wãtɨma. Ak'ɨt'ɨ, chi mɨ jitapii bɨ ẽpẽra ara k'ait'a cheruma.

Jesú jitadada

⁴⁷ Jesú wapida pedeamaa bɨde Juda chesima. Mãɨ Juda Jesupa doce peedaɨrãnepema pasima. Ẽpẽrarã chok'ará k'ĩruupataɨ nek'o paara, pak'uru paara ichi ome chesidama. Ãchi p'aarerã chi mãɨrã chaarearãpa mãɨnepa judiorã chaarearãpa peedaadarã pasima.

⁴⁸ Chi jitapii bɨpa ãchiá jara basima sãmaasã́ ooit'a Jesú k'awadamẽrá. Nãɨya jarasima: «Chi mɨa uitarra sõru, mãɨt'u Jesupɨ. Mãɨ jitat'ɨ».

⁴⁹ Mãɨne Juda Jesú k'ait'a wãk'ari jarasima: —¡Jarateaparí! Mãɨya jarak'ari Jesú uitarra sõsima.

⁵⁰ Jesupa ichiá jarasima: —K'õp'ãero, pɨchia oode cheru oose. Ara mãɨne waapẽarã orrobaridak'ari Jesú jitasidama.

⁵¹ Mãɨne Jesú ome p'ɨrrɨaparí abaɨpa ichi k'ĩruuparí nek'o ẽut'aak'ari p'aare minachia k'awa bɨ pae pari mimiaparí k'ɨɨrɨ oat'ut'aasima.

⁵² Maapae chi k'ɨɨrɨ oat'ut'aadá Jesupa jarasima: —Pɨchi k'ĩruuparí nek'o yaase. Chi nek'odepa k'ĩruuparí nek'odepa piuparima.

⁵³ Mɨ Ak'õrea idiipɨra ara mãɨne ichia ɨt'aripa peedarã minachia peeipɨ. ¿Pɨa mãɨ k'awawẽa bɨk'ãra?

⁵⁴ Maamina mãɨya oorupara ichi Pedeade mɨ k'orea bɨ bɨt'a ¿sãmaasã́ mãɨya baeima?

⁵⁵ Maapae Jesupa ãchiá jarasima: —Mãrapa ¿k'ãre k'orea k'ĩruuparí nek'o mãɨnepa pak'uru paara mɨ jãɨya jitade chesidama? ¿Mãramá, mɨ chi nechɨaparí mietá bɨk'ãra? Mɨa ewaricha Tachi Ak'õre te eda mãrá jaratea suak'abari bapachima. ¿K'ãre k'orea mɨ mãma jõmãɨrã taade jitadaé pasima?

⁵⁶ Maamina ãarea nãɨ oo p'anɨma Tachi Ak'õre pari pedeapataɨrãpa bɨdada jĩra mãɨya baemẽrá. Mãɨya bɨde Jesú ome p'ɨrrɨapataɨrãpa ichi ameenak'ari, ãarea mĩruwãsidama.

Jesú chi minachia k'awa p'anɨrã k'ĩrari bada

⁵⁷ Maapae Jesú jitadaadarãpa ichi p'aare minachia k'awa bɨ Caip'amá enemeesidama. Mãɨ Caip'á tede Moisepa bɨda jarateapataɨrã, judiorã chi mãɨrã chaarearã ome ará jere tuanasidama.

⁵⁸ Mãɨne Pedro Jesú k'aade t'ɨmɨ nine, chi p'aare minachia k'awa bɨ temá chesima. Chi te audu jũk'a bɨde eda wãk'ari, Pedro chi te ot'eapataɨrã ome suak'abari beesima, Jesú ome sãmaasã́ oodai k'awai k'orea.

⁵⁹ Mãɨne p'aarerã chi mãɨrã chaarearãpa mãɨnepa ãarea chi judiorã chi mãɨrã chaarearãpa ẽpẽerã jɨrɨsidama Jesú k'orea sea k'achia pedeadamẽrá. Ichi nepɨra pará bɨade adak'ari peapidai k'ɨ̃risiasidama.

⁶⁰ Ẽpẽrarã chok'araɨrãpa sea jarade chesidamina ichi k'orea k'achia pedeadai newẽ pasima. Mãɨya p'anɨne ẽpẽra ume chesidama.

⁶¹ Mãɨrãpa jarasidama: —Nãɨ ẽpẽrapa jarasima: “Mɨa Tachi Ak'õre te minachia bɨ p'ue ãarea ãrik'ari, ewari ũpeaɨde mãicha ooyade asima”.

⁶² Mãɨne chi p'aare minachia k'awa bɨ bai nɨbeek'ari Jesua idisima: —Chi pɨa nemietá oodaade a p'anɨt'a ¿mãɨ piarãk'ãra? ¿Pɨa mi ãpia pida p'anooiwẽk'ãra?

⁶³ Maamina Jesú k'ĩup'ea beesima. Mãɨya bɨde p'aare minachia k'awa bɨpa ichiá jarasima: —Tachi Ak'õre chok'ae bɨ k'ĩrari taiyá piarã jarase. ¿Pɨ Tachi Ak'õrepa Tachi K'aripaparí teai jara badak'ãra? ¿Pɨ Tachi Ak'õre Warrak'ãra?

⁶⁴ Jesupa p'anoosima: —Ãjã, pɨa mãɨya jara bɨma. Mãɨ awara mɨa jararuma: idiipa naa mãrapa mɨ, chi Ẽpẽra Warra ununaipɨ Tachi Ak'õre chi Ne Ãarea P'ue Bɨ juaraari suak'abari bɨt'a mãɨnepa jɨ̃arane cherut'a.

⁶⁵ Mãɨne chi p'aare minachia k'awa bɨpa k'ĩruurupa ichia neet'á jɨ̃ bada ãrik'ari jarasima: —¡Jãɨya ichia Tachi Ak'õre k'orea k'achia pedea bɨma! ¿K'ãre k'orea ẽpẽerã waa k'ɨ̃ria p'anɨma, ichi k'orea pedeadamẽrá? Mãrapa ũrisidama chi ichia Tachi Ak'õre k'orea k'achia pedea bɨt'a.

⁶⁶ Mãramá ¿ichi ome sãmaasã́ oodai p'anɨma? Ãchia p'anoosidama: —Ichi nepɨra pará bɨma. Mãɨ k'orea peadai p'anɨma.

⁶⁷ Maapae chi eda waapẽarãpa Jesú k'ĩtarramá taba idusidama mãɨnepa sĩsidama. Waapẽarãpa ichi jok'aedak'ari,

⁶⁸ jarasidama: —¡Pɨ Tachi Ak'õrepa Tachi K'aripaparí teai jarada paipɨra, Tachi Ak'õrenepa pedease! ¡Taiyá jarase k'aipa pɨ sĩsit'a!

Pedropa Jesú unuk'aade ada

⁶⁹ Pedro mãɨ te tuda suak'abari baside, mimiaparí wẽra aba ichimá chesima. Mãɨ wẽrapa jarasima: —Pɨ Jesú Galileadepema ome p'ɨrrɨa bapachima.

⁷⁰ Maamina Pedropa jõmãɨrã k'ĩrari mẽrasima. Nãɨya jarasima: —Mɨa atua bɨma pɨa k'ãre jara bɨt'a.

⁷¹ Maapae Pedro edaɨpa tajataria wãru pasima. Te eda wãpataɨde, awaraɨ mimiaparí wẽrapa ichi unuk'ari chi arí p'ananarã́ jarasima: —Cha nãɨ Jesú Nazaredepema ome p'ɨrrɨa bapachima.

⁷² Maamina Pedropa mãicha mẽrasima: —Mɨa piarãpẽa jararuma: jãɨ ẽpẽra atuama.

⁷³ Tãaraawẽa bɨde chi arí p'ananarãpa Pedromá wãnak'ari jarasidama: —Piarã pɨ jãɨ Jesú ome p'ɨrrɨa bapachima. Pɨa p'ue mẽraiwẽma, Galileadepema jĩra pedeapari pẽra.

⁷⁴ Pedropa jarasima: —¡Mɨa sea jaraipɨra Tachi Ak'õrepa mɨ ɨtɨaipɨ! Piarãpẽa jararuma: mɨa jãɨ ẽpẽra atuama. Ara mãɨne et'erre pirusima.

⁷⁵ Mãɨne Pedropa k'ɨ̃risiasima Jesupa nãɨya jara badat'a: «Et'erre pirui naena pɨa bari k'ak'o ũpea mɨ unuk'aade aipɨ». Maapae Pedro tajatá wãk'ari minachia sõp'uapa jẽasima.