Mateo 25 - Tachi Ak'õre Pedea

Jesupa ãwẽrarã diez p'anɨ k'orea nepɨrɨda

¹ »Pajãne Bɨpa ichidirã ichi juade ua bɨt'a nãɨ jĩra baipɨ: ãwẽrarã diez p'anasidama. Ãchicha ĩpira atadak'ari, k'ĩramá nɨne wãsidama chi ɨmɨk'ĩra miak'ãii bɨ ome ununai k'orea.

² Mãɨ ãwẽra joesoma p'anɨ k'ɨ̃risia minachia p'anasidama. Mãɨnepa waapẽarã joesoma p'anɨ k'ɨ̃risia nea p'anasidama.

³ Chi k'ɨ̃risia nea p'anɨpa ãchi ĩpira ateewãsidama maamina olivo ta waibɨa ateewãnaé pasima eda wea p'ananai k'orea.

⁴ Mãɨne chi k'ɨ̃risia k'awa p'anɨpa ãchi ĩpira enemeesidama mãɨnepa olivo ta minachia enemeesidama.

⁵ Chi miak'ãii pada ome ɨmɨk'ĩra tãaraa bada pẽra, jõmãɨrã tap'ok'eadak'ari k'ãisidama.

⁶ Mãɨne teamasi estarik'a pedea jĩk'ua ũrisidama: “¡Chi miak'ãi bɨ ome ɨmɨk'ĩra cheruma! ¡Ichi pia pedeade wãt'ɨ!”

⁷ Ara mãɨne jõma mãɨ ãwẽra p'irabarisidama ãchi ĩpira pia uruapidai k'orea.

⁸ Mãɨne chi k'ɨ̃risia nea p'anɨpa chi k'ɨ̃risia k'awa p'anɨa jarasidama: “Tai ĩpira k'iiwãmaa bɨ pẽra, mãra olivo tadepema ãpia pida teat'ɨ”.

⁹ Maamina chi k'ɨ̃risia k'awa p'anɨpa p'anoosidama: “Taipa mãrá teadaipɨra, ãarea araaiwẽa bɨma. Pia bɨma mãra pae atade wãnai p'anɨma”.

¹⁰ Ara mãɨne olivo ta atade wãsidama. Mãɨmisa chi ɨmɨk'ĩra miak'ãi bɨ chesima. Maapae chi k'ɨ̃risia k'awa p'anɨ ichi ome eda wãsidama sõ arapá miak'ãipataɨ tedea. Ara mãɨne chi te chipari pae pari mimiaparipa chi eda wãpataɨ jɨ̃at'ɨsima.

¹¹ Mãɨya bak'ari chi olivo ta atade wã p'anana jĩitea chedak'ari jarasidama: “Tai chipari, tai chipari, eda wãpataɨ ewase, tai eda wãnai k'orea”.

¹² Maamina chi miak'ãi bɨ ɨmɨk'ĩrapa jarasima: “Mɨa piarã jararuma: mɨa mãra atuama”.

¹³ »Mãɨ k'orea mãra tau pará p'anat'ɨ. Mɨ, chi Ẽpẽra Warra chei ewari mãɨnepa chi hora atua p'anɨma.

Jesupa erreara teada k'orea nepɨrɨda

¹⁴ »Pajãne Bɨpa ichidirã ichi juade ua bɨt'a nãɨ jĩra bɨma: ẽpẽra tua awaraɨdea wãi k'orea basima. Mãɨpuru chi ichi pae pari mimiapataɨrã t'ɨ̃k'oak'ari ichi erreara ãchicha teasima ne oo p'anɨnepa ɨt'aa eapapidamẽrá.

¹⁵ Ãchicha erreara teasima ara ãchi k'ɨ̃risiacha, mãɨ erreara eapapidamẽrá. Abaɨa erreara tau k'ak'o joesoma mil teasima. Abaɨa erreara tau k'ak'o ume mil teasima. Abaɨa erreara tau aba mil teasima. Maapaepuru ãyá wãsima.

¹⁶ Chi joesoma mil jitada mimiane wãsima mãɨ erreara eapapii k'orea. Mãɨnepa ichia erreara awara mãicha mil joesoma eapapisima.

¹⁷ Ara mãɨ jĩra chi ume mil jitadapa awara mãicha ume mil eapapisima.

¹⁸ Maamina chi aba mil jitadapa mãɨ erreara yoorobade yaasima.

¹⁹ »Tãaraa bɨde chi chipari chesima. Maapae ichia erreara ameena k'orea chi ichi pae pari mimiapataɨrã́ idisima.

²⁰ Chi joesoma mil jitada chek'ari awara joesoma mil enemeek'ari jarasima: “Mɨ chipari, chi pɨa joesoma mil teadadepa mɨa awara joesoma mil enemeesima”.

²¹ Chi chiparipa jarasima: “Mɨ pae pari mimiaparí, piapɨ. Pɨa jĩp'a ooparima. Mɨa ãpia teadadepa pɨa arí ooda pẽra, mɨa ne minachia pɨ juade bɨipɨ. Eda chese mɨ ome sõ arapaade”.

²² Maapae chi ume mil jitada chek'ari jarasima: “Mɨ chipari, pɨa mil k'ak'o ume teadadepa mɨa awara ume mil enemeesima”.

²³ Chi chiparipa jarasima: “Mɨ pae pari mimiaparí, piapɨ. Pɨa jĩp'a ooparima. Mɨa ãpia teadadepa pɨa pia ooda pẽra mɨa ne minachia pɨ juade bɨipɨ. Eda chese mɨ ome sõ arapaade”.

²⁴ »Maamina chi aba mil jitada chek'ari jarasima: “Mɨ chipari, mɨa k'awa bɨma pɨa chĩara k'ĩra chupuriak'ama erreara atai k'orea. Mãɨ awara waapẽarãpa uudadadepa pɨ baparima.

²⁵ Mãɨ k'orea mɨ wap'easima. Pɨ erreara yoorode yaasima atuapiemaapa. Maamina nãma uru bɨma”.

²⁶ Mãɨne chi chiparipa jarasima: “¡Mɨ pae pari mimiaparí pɨ piawẽa bɨma! Pɨ chi k'oa baparima! Pɨa piarã k'awa basima mɨa chĩarané ataparit'a mãɨnepa chĩarapa uudadadepa baparit'a.

²⁷ Mãɨpuru erreara yaapataɨ tede mɨ erreara yaai pasima. Mãɨya oodapara mɨ cherude mɨ erreara mãɨnepa chi mãɨ eapapida ome jitai pasima”.

²⁸ »Maapae chi chiparipa jarasima: “Ichia erreara aba mil uru bɨ ẽemarinak'ari chi diez mil uru bɨa teat'ɨ.

²⁹ Abaɨpa Tachi Ak'õre k'orea piarã k'awaipɨra, Tachi Ak'õrepa mãɨ atepe k'awapiipɨ. Maamina chi atua bɨpa ne k'awa bɨ k'ɨ̃risiaipɨra, ichia k'ɨ̃risia bɨ sida Tachi Ak'õrepa mãɨ ẽemariipɨ.

³⁰ Jãɨ chipari pae pari mimiaparí piawẽa bɨ tajatá p'ãrionea ãyá jeret'aat'ɨ. Mãma berã jẽa p'anaparima mãɨnepa p'uapa k'ida k'ɨterrea p'anaparima”.

Jõmãɨrã nemietá oodada k'orea ãarea ak'ɨi jarada

³¹ »Mɨ, chi Ẽpẽra Warra jõma Tachi Ak'õrepa ɨt'aripa peedarã ome k'ĩrawãrea cherude, mɨ poro jũra jɨ̃parí jɨ̃ bɨ suak'a beeparí k'ĩrawãrea bɨde suak'abari beeipɨ ẽpẽrarã ak'ɨi k'orea.

³² Mãɨne ẽpẽrarã tuadepemacha mɨ k'ĩrari cheepɨrɨdaipɨ. Mãɨrã mɨa awara awará bɨipɨ oveja ak'ɨparipa ichi oveja cabra ome tausia p'anana awara awará bɨpari jĩra.

³³ Chi oveja jĩra berã mɨ juaraari bɨipɨ. Chi cabra jĩra berã mɨ juawieri bɨipɨ.

³⁴ Maapae mɨ, chi Minachia k'awa bɨpa juaraari p'anɨrã́ nãɨya jaraipɨ: “Mãra, mɨ Ak'õrepa pia beepidaɨrã, chet'ɨ. Ichi p'uurude pia p'anat'ɨ. Nãɨ ĩjũa oosiedapema mãɨ p'uuru mãra pae oo basima.

^35-36 Mɨ jarra baside mãrapa mɨá nek'opisidama; mɨ opisia baside pania teasidama; mɨ chĩara ĩjũanepema jĩra nipaside mãra tedea ateewãsidama; mɨa neet'á newẽa baside mɨá teasidama; mɨ k'ɨdade baside ak'ɨde chesidama; mãɨnepa mɨ eda jɨ̃a nɨbɨpataɨ tede baside ak'ɨde chesidama”.

³⁷ »Mãɨne chi jĩp'a berãpa ididaipɨ: “Tai Chipari, ¿Sãapae pɨ jarrapisia basima? ¿Sãapae taipa pɨá nek'opisidama? ¿Sãapae pɨ opisia nɨbasima? ¿Sãapae taipa pɨá pania teasidama?

³⁸ ¿Sãapae pɨ chĩara ĩjũanepema jĩra nipasima? ¿Sãapae tai tedea pɨ ateewãsidama? ¿Sãapae taipa neet'á pɨá teasidama?

³⁹ ¿Sãapae pɨ k'ɨdade baside wa eda jɨ̃a nɨbɨpataɨ tede baside taipa ak'ɨde wãsidama?”

⁴⁰ Mãɨne mɨa p'anooipɨ: “Mɨa piarã jararuma: mãrapa mɨ ũpẽarã chi k'aepe k'ede k'aripasidaɨde ichiaba mɨ k'aripasidama”.

⁴¹ »Maapae mɨ juawieri p'anɨrã́ jaraipɨ: “Mãra, Tachi Ak'õrepa nepɨra pará bɨade apataɨrã, mɨk'aapema ãyá wãt'ɨ t'ɨpɨ tau urua k'iiwãk'á nɨbɨdea. Mãɨ Tachi Ak'õrepa bɨsima tiore, ichidirã ome ɨtɨai k'orea.

⁴² Mɨ jarra baside mãrapa nek'opidaé pasima; mɨ opisia baside pania teadaé pasima.

⁴³ Chĩara ĩjũanepema jĩra nipaside machi tedea ateewãnaé pasima; mɨ neet'á newẽa baside mãrapa teadaé pasima; mɨ k'ɨdade baside, eda jɨ̃a nɨbɨpataɨ tede baside pida mãrapa mɨ ak'ɨde chedaé pasima”.

⁴⁴ »Mãɨne ãchia ididaipɨ: “Tai Chipari, taipa pɨ jarra nɨbɨ, opisia nɨbɨ, chĩara ĩjũanepema jĩra nipaside, neet'á newẽa bɨ, k'ɨdade bɨ, wa eda jɨ̃a nɨbɨpataɨ tede bɨ ununak'a pasima. ¿Sãapae pɨ k'aripadaé pasima?”

⁴⁵ »Mãɨne mɨa p'anooipɨ: “Mɨa piarã jararuma: mãrapa chi k'aepe k'ede k'aripadaé paside mɨ sida k'aripadaé pasima”.

⁴⁶ Maapae Tachi Ak'õrepa ãchi t'ɨpɨ tau urua k'iiwãk'á nɨbɨdea peek'oaipɨ, maamina chi jĩp'a berã ichi ome ateewãipɨ ewaricha chok'ae beadamẽrá.