Mateo 21 - Tachi Ak'õre Pedea

Jesú Jerusalenea cheda

¹ Jerusalén k'ait'a cheutade Betp'aké p'uurude chesidama, Olivo eya k'ait'a. Mãɨne Jesupa ichi ome p'ɨrrɨapataɨrã ume p'uurudea peesima.

² Ãchiá nãɨya jarasima: «Tachi k'ĩrari bɨ p'uurudea wãt'ɨ. Mãma pautade mũra wẽra warra pará bɨ jɨ̃ nɨbɨ ununaipɨ. Ẽranak'ari umea mɨmá enemeet'ɨ.

³ Abaɨpa mãrá k'ãre k'orea mãɨya oo p'anɨane a idiipɨra, nãɨya jarat'ɨ: “Tachi Chiparipa k'ɨ̃ria bɨma. Maamina naane nãɨ mũra tea peeipɨ”».

⁴ Mãɨya basima Tachi Ak'õre pari pedeaparipa jarada jĩra. Nãɨya jarasima:

⁵ «Sión p'uurudepemarã́ nãɨya jarat'ɨ: “Ak'ɨt'ɨ, mãra chipari mũra ɨ̃rɨ mãramá cheruma. Chi ẽpẽra minachia k'awa bɨ jĩra chewẽma. Mũra chak'e ɨ̃rɨ cheruma”».

⁶ Ara mãɨne Jesú ome p'ɨrrɨapataɨrã ume p'anɨ wãnak'ari Jesupa jarada jĩra oosidama.

⁷ Mũra wẽra mãɨnepa chi warra Jesumá ateewãnak'ari chi ãchia anamari jɨ̃ p'anana mũra ɨ̃rɨ bɨsidama. Maapae Jesú mãɨ ɨ̃rɨ suak'abari beesima Jerusalén p'uurudea wãi k'orea.

⁸ Ẽpẽrarã ode chi chok'ará nɨbasima. Waapẽarãpa chi ãchia anamari jɨ̃ p'anana ojãne t'õk'oasidama, Jesú mãɨ ɨ̃rɨ wãmẽrá. Waapẽarãpa k'irú t'ɨɨdak'ari, bɨpachidama mãɨ ojãne, ãchi poro jũra jɨ̃parí jɨ̃ bɨ pai bɨade a k'ɨ̃risia p'anana pẽra.

⁹ Jesú naa wãutapa mãɨnepa k'aade cheutapa sõ arapá biapachidama: ¡Minachia pia bɨma Davidepa cheda! ¡Minachia pia bɨma Tachi Chipari t'ɨ̃nepa cheru! ¡Minachia pia bɨma chi Pajãne bɨt'a!

¹⁰ Jesú Jerusalene wãside, p'uurudepemarã ãarea piuk'a nɨbeesima. Nãɨya idipachidama: —Ichi ¿jãɨt'a k'aima?

¹¹ Idiutacha Jesú ome chedaadarãpa p'anoopachidama: —Jãɨ Jesupɨ, Tachi Ak'õre pari pedeaparipɨ. Ichi Nazaré p'uurudepemama, mãɨnepa Galilea tuadepemama.

Jesupa ne netopataɨrã ãyá jerek'oada

¹² Mãɨya bak'ari Jesú Tachi Ak'õre te minachia bɨdea wãsima. Mãma tajata ne netopataɨrã mãɨnepa ne atapataɨrã ome unusima. Mãɨya unuk'ari, Jesupa ãchi ãarea ãyá jeret'aak'oasima. Mãma jira bat'ak'oasima ne nek'opataɨ chi erreara tau tua awaraɨdepema k'ãpiapataɨrãné mãɨnepa p'aloma netopataɨrã suak'abari p'aneepataɨ sida.

¹³ Ãchiá nãɨya jarasima: —Tachi Ak'õre pedeade nãɨya bɨ bɨma: “Mɨ te ɨt'aa chiidipataɨ teade adaipɨ”. Maamina mãrapa nechɨapataɨ te uria bɨ jĩra papisidama.

¹⁴ Jesú Tachi Ak'õre te eda baside tau p'ãrio berã mãɨnepa bɨɨrɨ sorek'ea berã ichimá cheepɨrɨsidama. Mãɨne ãchi jɨpa beepik'oasima.

¹⁵ Maamina Jesupa mãma ẽpẽrarãpa ne p'ue oodak'apɨ́ oo bɨt'a ooside, warrarã Tachi Ak'õre te minachia bɨ p'ananapa Jesua nãɨya jĩk'ua biasidama: «¡Minachia pia bɨma Davidepa cheda!» Mãɨ p'aarerã chi mãɨrã chaarearãpa mãɨnepa Moisepa bɨda jarateapataɨrãpa mãɨ unusidaɨde k'ĩruusidama.

¹⁶ Ãchia Jesua nãɨya jarasidama: —¿Mãɨyara nãɨ warrarãpa jara p'anɨt'a pɨa ũri bɨk'ãra? Jesupa p'anoosima: —Ãjã. ¿Mãrapa nãɨ pedea eda jaradawẽa p'anɨk'ãra? “Pɨa warrarã mãɨnepa juto k'ede bɨsima pɨá pia pedeadamẽrá”.

¹⁷ Maapae Jesupa ãchi ameek'ari Jerusalenepa Betania p'uurudea k'ãine wãsima.

Higojõ bɨɨrɨ p'urpada

¹⁸ Norema tap'ede Jesú mãicha Jerusalenea wãsima. Wãrune jarrapisia nɨbeesima.

¹⁹ Mãɨne higojõ bɨɨrɨ ok'á nɨbɨ unusima. Maamina ará wãside chi k'irúawa nɨbɨ unusima. Mãɨpuru higojõ bɨɨrɨa jarasima: —¡Pɨ waa chauwẽa baipɨ! Ara mãɨne higojõ bɨɨrɨ p'urpasima.

²⁰ Jesú ome p'ɨrrɨapataɨrãpa mãɨ unusidaɨde idisidama, k'awa k'ɨ̃risiadaé pasi pẽra: —¿K'ãre k'orea jãɨ higojõ bɨɨrɨ jãɨya p'urpasima?

²¹ Jesupa p'anoosima: —Mɨa piarã jararuma: piarã Tachi Ak'õrepa mãrapa idi p'anɨ p'ue ooyade a k'ɨ̃risia p'anɨpɨra, mãɨnepa ichia p'ue ooiwẽane a p'anɨwẽpɨra, mɨa jãɨ higojõ bɨɨrɨ ooda k'aepẽra mãrapa atepe oodaipɨ. Mãrapa cha bɨ eyá ãyá wãpade adaipɨra mãɨnepa p'usadea eda baewãpade adaipɨra, ara mãɨya baewãipɨ.

²² Mãrapa Tachi Ak'õrea ne ɨt'aa chiididak'ari, mãɨnepa ichia mãɨ piarã teait'a a k'ɨ̃risia p'anɨpɨra, mãɨ ne ãarea jitadaipɨ.

¿K'ai t'ɨ̃ne Jesupa jaratea bɨma?

²³ Jesú mãicha Tachi Ak'õre te minachia bɨ k'ait'a chek'ari jaratea beesima. Mãɨya bɨde p'aarerã chi mãɨrã chaarearã mãɨnepa judiorã chaarearã ichimá chesidama. Ãchia Jesua nãɨya idisidama: —Pɨa nãma oo bɨ ¿k'aipa oopi bɨma?

²⁴ Jesupa p'anoosima: —Mɨa pida mãrá ne idiipɨ. Mãrapa mãɨ p'anoosidara, mɨa pida jaraipɨ k'aipa mɨá mãɨya oopi bɨt'a.

²⁵ ¿Sãmãɨpa Juan chesima porochoamẽrá? ¿Pajãne Bɨpa ichi peesima, wa nãɨ ĩjũanepemarãpa? Mãɨne ara ãstu pedea para beesima: «Pajãne Bɨpa peesiade adaipɨra, ichia jaraipɨ: “Mãɨ ¿k'ãre k'orea ĩjãanaé pasima?”

²⁶ Maamina taipa p'ue ẽpẽrapa ichi peesiade adaiwẽma». Ãchia mãɨya jarasidama chi ẽpẽerã p'uurudepemarã wap'ea p'anɨ pẽra. Chi p'uurudepemarãmá, mãɨ Juan piarã Tachi Ak'õre pari pedeaparí pasima.

²⁷ Mãɨpuru Jesua p'anoosidama: —Taipa atuapɨ. Mãɨne Jesupa jarasima: —Mãɨya bɨpɨra mɨa pida mãrá jaraiwẽma k'aipa mɨá jãɨya oopi bɨt'a.

Warra ume p'anɨ k'orea nepɨrɨda

²⁸ Mãɨya p'anɨne Jesupa p'aarerã chi mãɨrã chaarearã́ mãɨnepa judiorã chaarearã́ jarasima: —Mãrapa nãɨ nepɨra k'orea ¿k'ãret'a k'ɨ̃risia p'anɨma? Ẽpẽra basima. Mãɨ ẽpẽrapa warra ume uru basima. Ewariaba chi napemá nãɨya jarasima: “Warra, mimiane wãse mɨ uva k'ãena”.

²⁹ Mãɨne chi warrapa p'anoosima: “¡Mɨ wãiwẽma!” Maamina mãɨya bak'ari pia k'ɨ̃risiak'ari mimiane wãsima.

³⁰ Maapae chi ak'õrepa chi warra abaɨa abarik'a jarasima. Mãɨne chi abaɨ warrapa p'anoosima: “Pia bɨma, ak'õre, mɨ wãipɨ”. Maamina wãé pasima.

³¹ Mãɨ mãramá ¿chi sãɨ warrapa chi ak'õrepa k'ɨ̃ria bada oosima? Ãchia p'anoosidama: —Chi naapemapa. Mãɨne Jesupa ãchiá jarasima: —Ãjã. Maamina piarã mɨa jararuma: Romanepema pae erreara jɨrɨp'epataɨrã mãɨnepa wẽra k'achia berã mãra k'aepẽra Tachi Ak'õre ichidirã ichi juade ua baparidea wãnaipɨ.

³² Juan chi Porochoaparipa jarateade che basima mãra jĩp'a nipadamẽrá, maamina ĩjãanaé pasima. Maamina Romanepema pae erreara jɨrɨp'epataɨrãpa mãɨnepa wẽra k'achia berã pida ĩjãasidama. Mãrapa mãɨ unusidamina, machia nemietá oopataɨ itu bɨdaé pasima ichia jarateada ĩjãanai k'orea.

Jesupa mimiapataɨrã k'achia berã k'orea nepɨrɨda

³³ »Ũrit'ɨ. Mãicha awara nepɨrɨipɨ. Ẽpẽra basima. Ewariaba mãɨ ẽpẽrapa uva uuk'ari ichi ne uu ĩjũa mawarapa adu jũk'asima. Mawara uria waibɨa uya k'orosima uvaba jui k'orea. Ichiaba te ɨt'ɨ oosima mãmãɨpa ãarea ak'ɨi k'orea. Maapae ichi ne uu ĩjũa waapẽarã ẽpẽrarã juade bɨsima. Ãchi ome pedea ausidama uva baautade ichiá jõmasã́ teadait'a. Mãɨya pedeak'ari chi chipari tua awaraɨdea wãsima.

³⁴ Maapae uva baapataɨ ewari ará pak'ari, chi chiparipa ichi pae mimiapataɨrã peesima chi uva k'ãenane mimiapataɨrãpa mãɨ chi ichipaepema tea peedamẽrá.

³⁵ Mãɨne chi uva k'ãenane mimiapataɨrãpa chi ichi pae mimiapataɨrã jitadak'ari; aba jok'aesidama, aba peasidama mãɨnepa aba mawarapa bat'asidama.

³⁶ Mãɨya bak'ari chi chiparipa mãicha waapẽarã mimiapataɨrã peesima. Mãɨrã chi naa wãnana k'aepẽra chi chok'ará wãsidama. Maamina chi uva k'ãenane mimiapataɨrãpa mãɨ naena oodada jĩra oosidama mãɨrã ome.

³⁷ »Mãɨ k'aadea chi chiparipa mãicha ichi warra ãchimá peesima. Mãɨ nãɨya k'ɨ̃risiasima: “Mɨ warra wap'eadai p'anɨék'ãra” asima.

³⁸ Maamina ãchia mãɨ warra unusidaɨde ara ãchi tuaba pedea para beesima: “Jãɨpa chi ak'õre piuk'ari, ichia ne uru bada ãarea jɨ̃aipɨ. ¡Mãɨpuru ichi peadaipɨ! Mãɨya nãɨ ĩjũa tachi pae beeipɨ”.

³⁹ Ara mãɨne chi warra jitadak'ari, chi uva k'ãenanepema ateewãnak'ari peasidama.

⁴⁰ Jãɨ chi chipari cherude ichi uva k'ãenane mimiapataɨrã ome ¿k'ãre ooima?

⁴¹ Mãɨne p'aarerã chi mãɨrã chaarearãpa mãɨnepa judiorã chaarearã pida nãɨya p'anoosidama: —Ichia mãɨ ẽpẽerã k'achia berã sõchupuriawẽa peak'ari, waapẽarã ẽpẽrarã ome pedea auipɨ ichi uva k'ãena ak'ɨdamẽrá. Mãɨ ẽpẽrarãpa ichiá uva teadai p'anɨt'a mãɨ chauk'ari teadaipɨ.

^42-43 Mãɨne Jesupa ãchiá jarasima: —Ara mãɨya Tachi Ak'õrepa mãra k'aepẽra ẽpẽrarã awaraɨrãt'u ichi juade ua baipɨ. Mãɨrãpuru ichia k'ɨ̃ria bɨ oodaipɨ. Mãrapa ¿Tachi Ak'õre pedea eda jaradawẽk'ãra? Nãɨya jara bɨma: “Chi te oopataɨrãpa mawara amaanana pada, mãɨ mawara chi atepe piipará beesima. Nãɨ Tachi Chiparipa mãɨya ooda pẽra tachimá minachia pia beesima”.

⁴⁴ Paritua mãɨ mawara ɨ̃rɨ ẽpẽra baesira abaeda ãarea ãriipɨ, mãɨnepa chi mawara abaɨ ɨ̃rɨ baesira mãɨ ẽpẽra perp'et'aipɨ.

⁴⁵ P'aarerã chi mãɨrã chaarearãpa mãɨnepa p'ariseorã pida mãɨ jarateada ũrisidaɨde k'awasidama Jesupa ara ãchi k'orea pedea basima.

⁴⁶ Mãɨpuru ãchia Jesú jita k'ɨ̃ria p'anasidama. Maamina p'uurudepema ẽpẽrarã wap'ea p'anɨ pẽra itu bɨsidama. P'uurudepemarãpa k'ɨ̃risia p'anasima Jesú Tachi Ak'õre pari pedeaparí.