Mateo 20 - Tachi Ak'õre Pedea

Uva k'ãena nepɨrɨda

¹ »Pajãne Bɨpa ichidirã ichi juade ua bɨt'a nãɨ jĩra bɨma. Ne uu ĩjũa chipari basima. Tap'ede ichi mimiapataɨrã jɨrɨde wãsima ichi uva k'ãena mimiane wãnamẽrá.

² Waapẽarã ẽpẽrarã ome pedea ausidama ewari aba mimianana pari erreara p'aait'a. Maapae ãchi ichi uva k'ãena mimiane peesima.

³ Ɨmata ɨt'ɨ parude chi chipari mãicha p'uurudea wãsima. Mãma waapẽarã ẽpẽrarã pari berã unusima.

⁴ Ãchiá jarasima: “Mãra sida mɨ ne uva k'ãena mimiane wãt'ɨ. Mãɨpari mɨa erreara ara machia mimiauta jĩra teaipɨ”. Ara mãɨne wãsidama.

⁵ Ɨmat'ip'a chi chiparipa mãicha abarik'a oosima.

⁶ Maapae jõma ɨmata baepodode mãicha p'uurudea wãsima. Waapẽarã ẽpẽrarã pari berã unuk'ari idisima: “¿K'ãre k'orea idi mimianawẽa p'anɨma?”

⁷ Ãchia p'anoosidama: “Abaɨ pida taiyá mimiat'a teadawẽma”. Mãɨne ichia jarasima: “Mãra sida mɨ uva k'ãena mimiane wãt'ɨ. Mãɨpari mɨa erreara ara machia mimiauta jĩra teaipɨ”.

⁸ »K'iumaa beek'ari chi chiparipa chi mimiapataɨrã chi chaarea bɨa jarasima: “Chi mimiapataɨrã t'ɨ̃k'oak'ari ãchi mimianana pari erreara tease. Chi k'aadea chedaadarã́ naa p'aase, waa mãɨ chi naa ẽpẽerã́ mimia teadaadarã́”.

⁹ Chi ɨmata baepodode mimiane wã p'anana chi chaarea bɨmá naa chesidama. Mãɨne ãchicha ewari aba abarik'a mimiana jĩra jitasidama.

¹⁰ Mãɨpuru chi naa mimiane wã p'anana chesidaɨde k'ɨ̃risiasidama erreara atepe p'aait'a, maamina abarik'a p'aasima.

¹¹ Mãɨpuru chi uva k'ãena chipari ome piawẽa pedea p'aneesidama.

¹² Nãɨya jarasidama: “Jãɨ k'aadea chedada hora abapuru mimiasidama, maamina pɨa taiyá teada jĩra ãchiá pida teasima. Tai pisiade ewari ãarea ɨbɨa mimiasidama”.

¹³ Maamina chi chiparipa p'anoosima: “K'õp'ãero, mɨa pɨ ome jĩp'a oo bɨma. ¿Pɨa mɨ ome pedea ausiwẽk'ãra ewari aba mimiana pari mãɨ erreara jitai k'orea?

¹⁴ Pɨ erreara jitak'ari wãse. Mɨa pɨá teada jĩra chi k'aadea mimia p'ananarã́ tea k'ɨ̃ria bɨma.

¹⁵ ¿Pɨmá, mɨ errearadepa mɨchia k'ɨ̃ria bɨ ooiwẽa bɨk'ãra? ¿Pɨ sõk'achia bɨk'ãra mãɨ mɨ sõpia baparideepuru?”

¹⁶ »Ara mãɨ jĩra chi k'aadea p'anɨ naa p'ananaipɨ mãɨnepa chi naa p'anɨ k'aadea p'ananaipɨ.

Jesupa ichi peadai k'orea mãicha jarada

¹⁷ Jesú Jerusalenea wãrune ichi ome p'ɨrrɨapataɨrã doce p'anɨ awara ateewãk'ari ãchiá jarasima:

¹⁸ “Ũrit'ɨ, tachi Jerusalenea wãutama. Jãma abaɨpa mɨ, chi Ẽpẽra Warra jitapik'ari, p'aarerã chi mãɨrã chaarearã juade mãɨnepa Moisepa bɨda jarateapataɨrã juade bɨipɨ. Ãchia mɨ piui bɨade a jaradaipɨ.

¹⁹ Maapae mɨ judiorãwẽa teadaipɨ. Mãɨrãpa mɨ oo uru p'ananak'ari, soapa p'edak'ari maapae k'urusude peadaipɨ. Maamina ewari ũpeaɨde chok'ae p'irabariipɨ”.

Zebedeo warrarãpa ididada

²⁰ Mãɨya bak'ari Zebedeo k'ima mãɨnepa ichi warrarã Jesumá chesidama. Mãɨ wẽra ichi k'ĩrari sĩraporode bedabari k'obeesima chichupuria idii k'orea.

²¹ Mãɨne Jesupa idisima: —Pɨa ¿k'ãre k'ɨ̃ria bɨma? Ichia p'anoosima: —Jarase, pɨ jõmãɨrã chipari beerude, mɨ warrarã suak'abari p'aneenamẽrá pɨk'á, aba juaraari, aba juawieri.

²² Mãɨne Jesupa jarasima: —Mãrapa atua p'anɨma k'ãre idi p'anɨt'a. Mɨ minachia mĩaipɨ. ¿Mãra sida piarã mãɨ jĩra mĩanai k'orea p'anɨk'ãra? Ãchia p'anoosidama: —Ãjã, p'uedaipɨ.

²³ Mãɨne Jesupa jarasima: —Mãra sida piarã mɨ jĩra minachia mĩanaipɨ. Maamina mɨ juaraari wa juawieri suak'abari p'aneenait'a mɨa mãɨya p'ue jaraiwẽma. Mɨ Ak'õrepuru mãɨya jara bɨma.

²⁴ Mãɨ chi waapẽarã diez p'anɨpa mãɨ ũrisidaɨde k'ĩruusidama Santiago mãɨnepa chi ũpẽa Juan ome.

²⁵ Mãɨne Jesupa ãchi t'ɨ̃k'oak'ari jarasima: —Mãrapa k'awa p'anɨma chi nãɨ ĩjũanepema minachia k'awa p'anɨrãpa jua chaareadepa ãchi ẽpẽerã ãchi juade ua p'anɨt'a minachia chok'apatama. Mãɨya oopatama chi waapẽarãpa ãchi chi atepe p'anɨane a k'ɨ̃risiadamẽrá.

²⁶ Maamina mãra mãɨya p'ananaiwẽa p'anɨma. Mãranepema chi atepe ba k'ɨ̃ria bɨpɨra chi waapẽarã pae pari mimiaparí jĩra bai bɨma.

²⁷ Chi atepe ba k'ɨ̃ria bɨt'a jõmãɨrã k'aepẽra chi chipari pae pari mimiaparí jĩra bai bɨma.

²⁸ Mãɨ jĩra mɨ, chi Ẽpẽra Warra chewẽa bɨma ẽpẽerã chi mɨ pae pari mimiapataɨrã padamẽrá. Mãɨpari mɨ che bɨma ẽpẽerã pae pari mimiaparí bai k'orea. Mãɨya mɨ piuipɨ ẽpẽerã minachia k'aripai k'orea.

Jesupa tau p'ãrio be ume jɨpa beepida

²⁹ Jericó p'uurudepa wãsidaɨde Jesú k'aade ẽpẽrarã chok'ará wãsidama.

³⁰ Mãɨya wãutade tau p'ãrio p'anɨ ume o bɨk'á suak'abari p'anasidama. Jesú ãchi k'ait'a wãru ũrisidaɨde nãɨya biasidama: —¡Tai Chipari, Davidepa cheda, tai k'ĩra chupuriase!

³¹ Mãɨne ẽpẽrarãpa ãchi ɨtɨasidama k'ĩup'eadamẽrá, maamina ãchia mãicha biasidama: —¡Tai Chipari, Davidepa cheda, tai k'ĩra chupuriase!

³² Maapae Jesú bai nɨbeesima. Ãchi t'ɨ̃k'ari idisima: —¿K'ãre k'ɨ̃ria p'anɨma mɨa mãra ooit'a?

³³ Ãchia jarasidama: —Tai Chipari, k'ɨ̃ria p'anɨma tai taupa unu p'aneenait'a.

³⁴ Jesupa ãchi chupuri ununa pẽra ãchi tau t'õmarisima. Ara mãɨne unu p'aneesidama, mãɨnepa Jesú ome wãsidama.