Mateo 2 - Tachi Ak'õre Pedea

K'ãk'ãi k'awapataɨrãpa Jesú ak'ɨde chedada

¹ Jesú Belén p'uurude Judea tuade t'õside Herode chi Minachia K'awa bɨ apataɨ chi poro jũra jɨ̃parí jɨ̃ bɨ pasima. Mãɨ ewaride minachia k'awa berã ɨmata ochiaparidepa chesidama Jerusalén p'uurudea. Mãɨrãpa k'ãk'ãi ak'ɨ p'anɨnepa ne k'awapachidama.

² Mãɨne ãchia idisidama: —Nãɨ tuade warra t'õsima judiorã poro jũra jɨ̃parí jɨ̃ bɨ pai k'orea. Ichi ¿sãma bɨma? Taipa ɨmata ochiaparieri ichi k'ãk'ãi unusidama. Nãmá che p'anɨma ichiá pia pedeadai k'orea.

³ Mãɨ ũriside Herode k'ĩra piawẽa beesima, ichi k'aepẽra poro jũra jɨ̃parí jɨ̃ bɨ awara cheru pẽra. Ichiaba Herodepa k'ãre ooit'a k'awadawẽa p'anɨẽra Jerusalenepemarã sida ãarea k'ĩra piawẽa p'aneesidama.

⁴ Mãɨne Herodepa ãarea p'aarerã chi mãɨrã chaarearã mãɨnepa Moisepa bɨda jarateapataɨrã t'ɨ̃ peek'oak'ari idisima: —¿Sãma t'õi pasima Tachi Ak'õrepa Tachi K'aripaparí teai jara bada?

⁵ Ãchia p'anoosidama: —Belén p'uurude nãɨ Judea tuade t'õi pasima. Mãɨ pedea k'orea Tachi Ak'õre pari pedeaparipa mãɨya jarasima:

⁶ Belén p'uuru, pɨ ãpiipará bɨwẽma, chi waapẽarã Judadepema p'uuru k'aepẽra, pɨdepa minachia k'awa bɨ aba chei pẽra. Mãɨpa mɨ p'uuru Israel pia ak'ɨ baipɨ.

⁷ Maapae Herodepa k'ãk'ãinepa k'awapataɨrã mẽra t'ɨ̃ peek'oasima. Ãchiá idisima chi k'ãk'ãi sãapae unusidaɨt'a, chi warra t'õna ewari k'awai k'orea. Mãɨne chi ewari jarasidama.

⁸ Ãchi Belenea peerude Herodepa jarasima: —Jãma wãnak'ari pia ididapade asima, mãɨ warra k'orea. Unusidara mɨá jarade chet'ɨ mɨ sida ichiá pia pedeade wãi k'orea.

^9-10 Herodepa mãɨya jarak'ari ãchi wãsidama. Maapae k'ãk'ãi ɨmata ochiaparieri unu p'anana mãicha unusidama. Mãɨ unusidaɨde minachia sõ arapá nɨp'aneesidama. Chi k'ãk'ãi ãchi naa wãpodok'ari aba chi warra chak'e bɨmá k'ĩrap'it'a bari k'obeesima.

¹¹ Tede eda wãutade warra chak'e chi nae María ome bɨ unusidama. Maapae bedabari k'op'aneenak'ari warra chak'ea pia pedeasidama. Maapae ãchicha ne yaapariidepema ewadak'ari ãchiichia warra chak'ea nee, ãp'o k'era mãɨnepa mirra k'era teasidama.

¹² Mãɨya bak'ari k'ãmok'araade Tachi Ak'õrepa jarasima waa wãpidaemaapa Herodemá. Mãɨneepuru o awaraɨde wãsidama ãchi tuadea.

Egito tuadea mĩruwãnana

¹³ Ãchi wãnak'ari, Tachi Chiparipa ɨt'aripa peedapa k'ãmok'araade Josea chek'ari jarasima: —Herodepa pɨ warra chak'e jɨrɨ bɨma peai k'orea. Mãɨ p'irabarik'ari pɨ warra chak'e mãɨnepa chi nae ateewãse Egito tuadea. Mãma beese aba mɨa jararumá.

¹⁴ Ara mãɨne José p'irabarisima. María mãɨnepa chi warra jitak'ari, teamasi Egitodea wãsidama.

¹⁵ Ãchi mãma p'aneesidama aba Herode piurudea. Mãɨya basima Tachi Chiparipa jarada jĩra. Ichi pari pedeaparipa nãɨya jarasima: «Mɨa mɨ warra t'ɨ̃sima Egitodepa chemẽrá».

Herodepa Belenepema warrarã k'enapida

¹⁶ Herodepa k'awasima k'ãk'ãinepa k'awapataɨrãpa ichi seasidaɨt'a. Mãɨpuru minachia k'ĩruuk'ari Belenepema warrarã waidi ãyo ume padawẽa be ãarea k'enapisima. Ara k'ait'apemarã sida k'enapisima. Mãɨya oosima k'ãk'ãinepa k'awapataɨrãpa k'ãk'ãi ununana ewari ichiá jaradada pẽra.

¹⁷ Mãɨya jõmãɨrã sõp'ua p'aneesidama Tachi Ak'õre pari pedeaparí Jeremiapa jarada jĩra. Nãɨya jarasima:

¹⁸ «Ramá p'uurude ũrisidama minachia sõp'ua jẽa bɨt'a mãɨnepa jɨ̃p'idabari jẽa bɨt'a. Raquel ichi warrarã k'orea jẽa basima. Ichi sõchupuriarãapade asima, ichi warrarã nea beda pẽra».

José Egitodepa jĩruerã cheda

¹⁹ Herode piuside José wapida Egitode basima. Mãɨne Tachi Chiparipa ɨt'aripa peeda k'ãmok'araade unupisima ichiá.

²⁰ Mãɨpa mãɨya jarasima: —Pɨ warra pea k'ɨ̃ria p'anana piusidama. Mãɨpuru p'irabarik'ari pɨ warra chi nae ome mãicha ateewãse Israeldea.

²¹ Ara mãɨne José p'irabarik'ari ichi warra chi nae ome Israeldea ateewãsima.

²² Maamina Josepa k'awasima Arquelao ichi ak'õre Herode pari Judea tuadepema poro jũra jɨ̃parí jɨ̃ bɨ beesit'a. Mãɨ k'orea mãmá wãi wap'easima. Maamina Tachi Ak'õrepa ichiá k'ãmok'araade jarada pẽra Galilea tuadea wãsima.

²³ Mãma Nazaré p'uuru apataɨde beesima. Mãɨyasima Tachi Ak'õre pari pedeapataɨrãpa mãɨya jaradada jĩra: “Ichi Nazaredepemaane adaima”.