Mateo 19 - Tachi Ak'õre Pedea

Jesupa tachi k'ima amaapiemaapa jarateada

¹ Mãɨya jarak'ari Jesú Galilea tuadepa Judea tuadea wãsima Jordán to k'ĩaria.

² Ẽpẽerã minachia nɨbɨ ichi k'aade wãsidama. Mãma chi k'ak'ua piawẽa k'ede ãarea jɨpa beepisima.

³ Mãɨya bɨde chi eda waapẽarã p'ariseorã chesidama. Ichiá piawẽa pedeapidai k'orea nãɨya idisidama: —¿Ɨmɨk'ĩrapa chi k'ima ne paritua oo bɨ k'orea amaai pia bɨk'ãra?

⁴ Jesupa p'anoosima: —¿Mãrapa Tachi Ak'õre pedea bɨdade, nãɨ eda jaradawẽa p'anɨk'ãra? Jua chiwidieda Tachi Ak'õrepa ɨmɨk'ĩra mãɨnepa wẽra oosima.

⁵ Ichiaba jarasima: “Mãɨ k'orea ɨmɨk'ĩrapa chi ak'õre mãɨnepa chi nae ameek'ari ichi k'ima ome ará beeipɨ. Mãɨya k'ak'ua aba bɨ jĩra p'ananaipɨ”.

⁶ Ãchi ume p'anɨwẽma, mãɨpari k'ak'ua aba bɨ jĩra p'anɨma. Mãɨpuru Tachi Ak'õrepa chi ará bɨdat'a abaɨ pida amaai pia bɨwẽma.

⁷ Mãɨpuru ãchia idisidama: —Mãɨyara Moisepa ¿k'ãre k'orea bɨsima wẽra amaaipɨra, chi amaai k'orea k'art'a bɨda teai pia bɨma amaai naena?

⁸ Jesupa p'anoosima: —Mãra k'ɨɨrɨwẽa p'anɨẽra Moisepa mãɨya itu bɨsima. Maamina Tachi Ak'õrepa nãɨ ĩjũa ooside mãɨya k'ɨ̃riawẽa basima.

⁹ Mɨa jararuma: ɨmɨk'ĩra abaɨpa ichi k'ima awaraɨ ome k'ãiwẽa bɨ amaak'ari, maapae k'ima awaraɨ ataipɨra, mãɨ ɨmɨk'ĩrapa nemietá oo bɨma mãɨ k'aadeapema wẽra ome. [Ichia amaana wẽra ɨmɨk'ĩra awaraɨpa ataipɨra mãɨ ɨmɨk'ĩra pida nemietá oo bɨma mãɨ wẽra ome.]

¹⁰ Mãɨne Jesú ome p'ɨrrɨapataɨrãpa ichiá jarasidama: —Mãɨya bɨpɨra, ɨmɨk'ĩra wẽra ome miak'ãii piawẽa bɨma.

¹¹ Mãɨpuru Jesupa jarasima: —Jõmãɨrã ãarea p'ue tuu p'aneenaiwẽma. Abapuru Tachi Ak'õrepa mãɨ k'ɨ̃risia teaipɨra, p'ue tuu baipɨ.

¹² Chi eda waapẽarã ɨmɨk'ĩrarãpa ãchi t'õnaenapema p'ue warra t'õpidak'ama. Waapẽarã ɨmɨk'ĩrarãpa p'ue warra t'õpidak'ama mãɨya oopisida pẽra. Ichiaba waapẽarãpa k'ima atai k'ɨ̃risiadak'ama ãchi Chipari Pajãne Bɨ pae nepia oodai k'orea. Mãra p'ue tuu p'aneenaipɨra, mãɨya p'anat'ɨ.

Jesupa warrarã́ pedea pia pedeada

¹³ Maapae ẽpẽrarãpa warrarã Jesumá enemeesidama ichi jua ãchi ɨ̃rɨ bɨk'ari Tachi Ak'õrea ɨt'aa chiidimẽrá. Maamina Jesú ome p'ɨrrɨapataɨrãpa mãɨ warrarã enemeedaadarã ɨtɨasidama.

¹⁴ Mãɨpuru Jesupa jarasima: —Warrarã mɨmá itu chepit'ɨ, Pajãne Bɨpa ichidirã ichi juade ua bɨ jĩra p'anɨ pẽra.

¹⁵ Maapae ichi jua warrarã ɨ̃rɨ bɨk'ari wãsima.

Erreara minachia uru bɨ Jesú ome pedeada

¹⁶ Ewariaba k'ũtã́ Jesumá chesima. Mãɨ k'ũtãpa idisima: —Jarateaparí, Tachi Ak'õre ome ewaricha chok'ae bai k'orea ¿mɨa k'ãret'a nepia ooi bɨma?

¹⁷ Jesupa p'anoosima: —¿K'ãre k'orea chi pia bɨ k'orea mɨá idi bɨma? Aba pida pia bɨwẽma, mãɨyawẽapuru Tachi Ak'õret'u pia bɨpɨ. Pɨ Tachi Ak'õre ome ewaricha chok'ae ba k'ɨ̃ria bɨpɨra, ichia oopi bɨ pedea oose.

^18-19 Ichia idisima: —¿Chi sãɨ? Jesupa jarasima: —Ẽpẽra pearãse, wẽra awaraɨ ome k'ãirãse, nechɨarãse, sea jararãse chĩara k'orea, pɨ ak'õre pɨ nae ome wap'ea base, mãɨnepa abaɨ k'ɨ̃riase ara pɨchi k'ɨ̃ria bɨ jĩra.

²⁰ K'ũtãpa jarasima: —Mãɨ ãarea oo bɨma. Mɨa ¿k'ãre ooiwẽa bɨma?

²¹ Mãɨne Jesupa ichiá jarasima: —Pɨ piarã jĩp'a ba k'ɨ̃ria bɨpɨra, pɨa uru bɨ ãarea netode wãk'ari erreara chi nenea k'edea tease. Mãɨya nepia pajãne uru baipɨ. Maapae mɨ ome p'ɨrrɨade chese.

²² K'ũtãpa mãɨ ũrik'ari k'ĩra piawẽa wãsima, neet'á minachia uru basidepa.

²³ Mãɨne Jesupa ichi ome p'ɨrrɨapataɨrã́ jarasima: —Piarã chi t'aju bɨma ẽpẽra ɨbɨa bɨ, Pajãne Bɨ juade bai k'orea ichidirã paara.

²⁴ Mãicha mɨa jararuma: T'ajuwẽa bɨma camello akuja ãtaude eda wãit'a, mãɨ chi ẽpẽra errearadepa ɨbɨa bɨ Tachi Ak'õre juade bai k'aepẽra.

²⁵ Mãɨne ichi ome p'ɨrrɨapataɨrãpa k'awa k'ɨ̃risiadaé pasima, ãchia Tachi Ak'õrepa ne pará p'anɨrã atepe k'ɨ̃riayane a k'ɨ̃risia p'anana pẽra. Ãchia idisidama: —Mãɨyara Tachi Ak'õrepa ¿k'ait'a k'aripaima?

²⁶ Jesupa ãchi ak'ɨk'ari jarasima: —Ẽpẽrapa mãɨ p'ue ook'ama maamina Tachi Ak'õremá ne chi t'aju bɨ newẽma.

²⁷ Mãɨne Pedropa Jesua jarasima: —Taipa ne ãarea ameesidama pɨ ome wãnai k'orea. ¿Mãɨya bɨpɨra k'ãre nepia ununaima?

²⁸ Jesupa p'anoosima: —Mɨa piarã jararuma: Tachi Ak'õrepa ne ãarea chiwidi ooi ewaride mɨ, chi Ẽpẽra Warra mɨ poro jũra jɨ̃parí jɨ̃ bɨ suak'a beeparí auk'ará bɨde suak'abari beeipɨ. Mãɨne mãra mɨ ome p'ɨrrɨapataɨrã doce poro jũra jɨ̃parí jɨ̃ bɨ suak'a beeparide suak'abari p'aneenaipɨ, Israeldepema p'uuru doce p'anɨ nepɨra ak'ɨdai k'orea.

²⁹ Mɨ k'orea abaɨpa ichi te, ũpẽarã, ũpẽawẽrarã, ak'õre, nae, k'ima, warrarã, ĩjũa ameeipɨra, ichia ameena k'aepẽra cien atepe unuipɨ, ichiaba Tachi Ak'õre ome ewaricha chok'ae baipɨ.

³⁰ Mãɨya minachia chi naa p'anɨ k'aadea p'ananaipɨ, mãɨnepa chi k'aadea p'anɨ naa p'ananaipɨ.