Mateo 17 - Tachi Ak'õre Pedea

Jesú k'ĩra awara unupida

¹ Ewari k'ak'o sei pak'ari Jesupa Pedro, Santiago mãɨnepa chi ũpẽa Juan ãchi tuaba awara eya ɨt'ɨ bɨmá ateewãsima.

² Mãma ãchi k'ĩrari Jesú k'ĩra awara unupisima. Ichi k'ĩra ɨmata jĩra achiterrea unupisima mãɨnepa ichi neet'á t'ot'oa achiterrea beesima.

³ Mãɨya bɨde ãchia unusidama Moisé mãɨnepa Elía Jesú ome pedeamaa p'anɨ.

⁴ Mãɨpuru Pedropa Jesua jarasima: —Tai Chipari, pia bɨma tai nãma p'anɨt'a. Pɨa k'ɨ̃ria bɨpɨra taipa te chak'e ũpea oodaipɨ, aba pɨ pae, aba Moisé pae mãɨnepa aba Elía pae.

⁵ Pedro mãɨya pedeamaa bɨde jɨ̃ara ɨnaa bɨpa ãchi ãarea t'ausima. Jɨ̃ara mãɨya cheside nãɨ pedea jĩk'ua ũrisidama: «Nãɨt'a mɨ Warrapɨ. Mɨa ichi minachia k'ɨ̃ria bɨma. Mɨ ichi k'orea arapá bɨma. Ichia jara bɨ ũrit'ɨ».

⁶ Mãɨ ũrisidaɨde ne wap'eapa jeeda barrobari p'aneesidama.

⁷ Mãɨya bɨde Jesú chek'ari ãchi t'õmarisima. Maapae jarasima: —P'irabarit'ɨ. Ne wap'earãt'ɨ.

⁸ Ãchia mãicha ak'ɨsidaɨde, waa waapẽarã ununaé pasima. Aba Jesut'u basima.

⁹ Eyadepa edá chesidaɨde Jesupa ãchiá nãɨya jara peesima: —Mãrapa ununana mi ãpia pida abaɨa jararãt'ɨ aba mɨ, chi Ẽpẽra Warra chok'ae p'irabarirudea.

¹⁰ Mãɨne ãchia Jesua idisidama: —Mãɨyara Moisepa bɨda jarateapataɨrãpa ¿k'ãre k'orea Elía naa chei bɨade apatama?

¹¹ Jesupa p'anoosima: —Piarã Elía chei bɨma nejõma pia bɨi k'orea.

¹² Maamina mɨa jararuma: Elía piarã chesima. Maamina abaɨ pida ichi k'awadaé pasima. Mãɨpari ẽpẽrarãpa ẽpẽerãpa oo k'ɨ̃ria p'anana ichi ome oosidama. Ara mãɨ jĩra mɨ, chi Ẽpẽra Warra ãchi juade minachia mĩaipɨ.

¹³ Mãɨne Jesú ome p'ɨrrɨapataɨrãpa k'awasidama ichia Juan chi Porochoaparí k'orea pedea basit'a.

Jesupa warra jaore mietá pará bɨ jɨpa beepida

¹⁴ Ãchi eyadepa edá chesidaɨde ẽpẽrarã chok'ará ãarea ará tuanasidama. Mãɨne ẽpẽra Jesumá chesima. Mãɨ ẽpẽra Jesú k'ĩrari sĩraporode k'obeek'ari jarasima:

¹⁵ —Mɨ Chipari, mɨ warra k'ĩra chupuriase. Minachia mĩa bɨma. Wawaparima, mãɨnepa edaɨde minachia t'ɨpɨde baeparima mãɨnepa edaɨde toeda baeparima.

¹⁶ Mɨa ichi pɨ ome p'ɨrrɨapataɨrãmá enemeesima, maamina p'ue jɨpa beepidaé pasima.

¹⁷ Jesupa jarasima: —¡Ẽpẽerã k'achia berã mãɨnepa ĩjãanak'apɨɨrã! ¿Waa sãma mãra ome baima? ¿Waa sãma mãra ome choaima? Chi warra nãmá enemeet'ɨ.

¹⁸ Jesupa jaore mietá ɨtɨak'ari, jeret'aaside warra k'ak'uadepema ãyá wãsima. Ara mãɨne chi warra jɨpa beesima.

¹⁹ Mãɨya bak'ari Jesú ome p'ɨrrɨapataɨrã ichimá wãnak'ari ãchi tuaba idisidama: —¿K'ãre k'orea taipa jãɨ jaore mietá p'ue ãyá jeret'aadaé pasima?

²⁰ Jesupa p'anoosima: —Mãrapa Tachi Ak'õrene ãpia ĩjãanawẽa p'anɨ pẽra p'uedaé pasima. Mɨa piarã jararuma: mostaza net'a tau ãpia k'ɨrɨ jĩra mãrapa ãpia ĩjãa p'anɨpara, nãɨ eyá nãmãɨpa ãyá wãpade adai pasima. Mãɨne eya ãyá wãipɨ. Mãɨya ĩjãa p'anɨpara, mãrapa ẽpẽerãpa ne p'ue oodak'apɨ́ p'ue oodawẽa p'ananaiwẽ pasima.

²¹ Maamina jaore mietá nãɨ jĩra be ãyá jeret'aadai k'orea Tachi Ak'õrea ɨt'aa chiididai p'anɨma mãɨnepa Tachi Ak'õrene k'ɨ̃risiadayá nek'odak'apɨ́ ewari oodai p'anɨma.

Jesupa mãicha ichi peadai k'orea jarada

²² Galilea tuade ará tuanasidaɨde Jesupa ichi ome p'ɨrrɨapataɨrã́ jarasima: —Tãaraawẽa bɨde ẽpẽrapa mɨ, chi Ẽpẽra Warra abaɨpa jitapik'ari, ẽpẽerã́ teaipɨ.

²³ Ãchia mɨ peadaipɨ, maamina ewari ũpeaɨde mɨ chok'ae p'irabariipɨ. Mãɨ k'orea ãchi k'ĩra piawẽa p'aneesidama.

Jesupa erreara Tachi Ak'õre te minachia bɨ pae teada

²⁴ Jesú mãɨnepa ichi ome p'ɨrrɨapataɨrã Capernaum p'uurudea chesidaɨde Tachi Ak'õre te minachia bɨ pae erreara jɨrɨp'epataɨrã Pedromá wãsidama. Ãchia idisidama: —¿Mãra Jarateaparipa Tachi Ak'õre te minachia bɨ pae erreara teaparik'ãra?

²⁵ Pedropa p'anoosima: —Ãjã, teaparima. Pedro ichi tede eda wãside Jesú naa pedeasima. Nãɨya idisima: —Pɨa ¿k'ãre k'ɨ̃risia bɨma, Simón? Nãɨ ĩjũanepema minachia k'awa p'anɨneerãpa ¿Kairã́ erreara idipatama? ¿Ãchidirã́ wa tua awaraɨdepemarã́?

²⁶ Pedropa p'anoosima: —Tua awaraɨdepemarã́. Jesupa ichiá jarasima: —Ãjã. Chi minachia k'awa p'anɨneerãpa teadak'ama.

²⁷ Tachi, Tachi Ak'õreneerãmina, mãɨ erreara teadaipɨ, ẽpẽrarãpa tachi k'orea piawẽa k'ɨ̃risiapidaemaapa. Mãɨpuru senianea to ɨade wãse. Chi naa beta pearu it'aede erreara tau aba unuipɨ. Mãɨ erreara jitak'ari, tease mɨ pari mãɨnepa pɨ pari.