Mateo 16 - Tachi Ak'õre Pedea

P'ariseorãpa Jesua ne p'ue oodak'apɨ́ oopade a p'anana

¹ Mãɨya bak'ari waapẽarã p'ariseorã mãɨnepa saduceorã Jesumá orrobarisidama, ichi Tachi Ak'õrenepa che bɨ k'awadayá. Mãɨ k'orea ichiá idisidama ẽpẽrarãpa ne p'ue oodak'apɨ́ oomẽrá.

² Mãɨne Jesupa p'anoosima: «Pajã p'urea k'iumaa bɨpɨra, norema ewari pia bayade apatama.

³ Mãɨnepa tap'ededa ɨmata ochiaparieri pajã p'urea nɨbɨpɨra mãɨnepa t'aua nɨbɨpɨra, mãrapa ewari mietá bayade apatama. Mãrapa mãɨya ewari k'ĩra k'awa p'anɨmina Tachi Ak'õrepa nãɨ ewaride oo bɨt'a k'awadak'ama.

⁴ Mãra idiapaepemarã ẽpẽerã k'achia berãpa Tachi Ak'õrene ĩjãanai itu bɨmaa p'anɨma. Idi p'anɨma mɨa ne ẽpẽrarãpa ne p'ue oodak'apɨ́ oomẽrá. Maamina mɨa mãɨya ooiwẽma. Mãrapa abapuru Tachi Ak'õre pari pedeaparí Joná mãɨya bada jĩra ununaipɨ». Mãɨya jarak'ari, ãchi ameesima.

P'ariseorã p'ana ooropiparí

⁵ Senia k'ĩaria wãnak'ari Jesú ome p'ɨrrɨapataɨrãpa p'ana ateewãnai k'ɨ̃risia atua p'anasidama.

⁶ Mãɨne Jesupa jarasima: —Jĩrak'aua p'anat'ɨ chi p'ana ooropiparí p'ariseorãné ome mãɨnepa chi saduceorãné ome.

⁷ Jesú ome p'ɨrrɨapataɨrãpa ara ãstu pedea para beesima: —Ichia mãɨya jarasima tachia p'ana enemeenaé pada pẽra.

⁸ Jesupa mãɨ k'awaside jarasima: —¿K'ãre k'orea p'ana newẽane a p'anɨma? ¿Wapida Tachi Ak'õrene ĩjãanawẽa jĩra p'anɨk'ãra?

⁹ ¿Mãrapa mɨa ooda unusidamina k'awadawẽa p'anɨk'ãra? ¿K'ɨ̃risia atuasidak'ãra p'ana joesoma bɨdepa mɨa ẽpẽrarã joesoma mil p'anɨa nek'opida? ¿K'ɨ̃risia atuasidak'ãra mãrapa chi pichoada jɨrɨp'esidaɨde jabara k'ak'o jõmasã́ ipirupisidat'a?

¹⁰ ¿Ichiaba k'ɨ̃risia atuasidak'ãra p'ana siete p'anɨnepa mɨa ẽpẽerã cuatro mil p'anɨa nek'opida? ¿K'ɨ̃risia atuasidak'ãra mãrapa chi pichoada jɨrɨp'esidaɨde jabara nepalá jõmasã́ ipirupisidat'a?

¹¹ ¿Sãmaasã́ ũrinawẽa p'anɨma mɨa p'ana k'orea pedeawẽa bɨt'a? Mãɨt'u mɨa jarasima p'ariseorã p'ana ooropiparí, saduceorãné ome jĩrak'aua p'ananamẽrá.

¹² Maapaepuru k'awasidama Jesupa p'ana ooropiparí k'orea jarawẽa badat'a, mãɨpari jara k'ɨ̃ria basima p'ariseorãpa mãɨnepa saduceorãpa jarateapataɨ k'orea jĩrak'aua p'ananamẽrá.

Pedropa Jesú k'orea jarada

¹³ Mãɨya bak'ari Jesú ichi ome p'ɨrrɨapataɨrã ome P'ilipo tuade Cesarea p'uurudea chesidama. Mãɨne Jesupa ãchiá idisima: —Ẽpẽrarãpa ¿sak'á p'anɨma? Mɨ, chi Ẽpẽra Warra ¿k'aiyade a p'anɨma?

¹⁴ Ãchia p'anoosidama: —Chi eda waapẽarãpa jara p'anɨma pɨ Juan chi Porochoaparipɨ. Chi eda waapẽarãpa jara p'anɨma pɨ Eliapɨ. Waapẽarãpa jara p'anɨma pɨ Jeremiapɨ wa Tachi Ak'õre pari pedeaparipɨ.

¹⁵ Mãɨne Jesupa idisima: —Maamina mãrapa mɨ ¿k'ai k'ɨ̃risia p'anɨma?

¹⁶ Simón Pedropa p'anoosima: —Pɨ Tachi Ak'õrepa Tachi K'aripaparí teai jarada, Tachi Ak'õre chok'ae bɨ Warrapɨ.

¹⁷ Jesupa jarasima: —Pɨ sõpia bɨma, Simón, Joná warra. Ẽpẽra abaɨ pida pɨá mãɨ k'awapié pasima, mãɨpari mɨ Ak'õre pajãne bɨpa mãɨ k'awapisima.

¹⁸ Mɨa jararuma: pɨ Pedropɨ. Mɨa nãɨ mawara ɨ̃rɨ mɨ p'uuru ooipɨ. Mi ãpia pida mɨ p'uuru p'uedaiwẽma, tachi piuutade pida.

¹⁹ P'uurudepema te ewaparí tearu jĩra mɨa pɨ Tachi Ak'õrepa ichidirã ichi juade ua bɨ t'ãena minachia k'awa bɨ jĩra bɨipɨ. Chi pɨa nãɨ ĩjũane ne itu bɨpiepɨra Tachi Ak'õre pajãne bɨ pida mãɨya ne itu bɨpiiwẽma. Ichiaba chi pɨa nãɨ ĩjũane ne itu bɨpiipɨra Tachi Ak'õre pajãne bɨ pida mãɨya ne itu bɨpiipɨ.

²⁰ Maapae Jesupa chi ichi ome p'ɨrrɨapataɨrã́ mãɨ mi ãpia pida abaɨa jararãapadade asima ichi Tachi Ak'õrepa Tachi K'aripaparí teai jarada.

Jesupa ichi peadai jarada

²¹ Mãɨ ewaridepa Jesupa ichi ome p'ɨrrɨapataɨrã́ jarapachima ichi Jerusalene minachia mĩai bɨ. Nãɨya jarasima: —P'uurudepema chaarearã juade, p'aarerã chi mãɨrã chaarearã juade mãɨnepa Moisepa bɨda jarateapataɨrã juade mɨ minachia mĩaipɨ. Mɨ peapidaipɨ maamina ewari ũpeaɨde chok'ae p'irabariipɨ.

²² Mãɨya jarada k'orea Pedropa ichi awara ateewãk'ari ɨtɨasima: —Mɨ Chipari, mãɨya pedearãse. Tachi Ak'õrepa mãɨyapiiwẽma.

²³ Maamina Jesupa jĩitea ak'ɨk'ari Pedroa jarasima: —Tiore, mɨ omepema ãyá wãse. Mɨa ooi bɨt'a, pɨa oopiemaa bɨma. Pɨa Tachi Ak'õre jĩra k'ɨ̃risiawẽa bɨma. Mãɨpari ẽpẽra jĩra k'ɨ̃risia bɨma.

²⁴ Maapae Jesupa ichi ome p'ɨrrɨapataɨrã́ jarasima: —Abaɨpa mɨ ome wã k'ɨ̃ria bɨpɨra, ichia oo k'ɨ̃ria bɨt'a itu bɨk'ari minachia mĩai k'orea bai bɨma. Maapae mɨ ome wãi bɨma.

²⁵ Abaɨ pida nãɨ ĩjũane pia bai k'orea jɨrɨ baipɨra, k'aadea ewari parude ichi atuaipɨ. Maamina abaɨ pida mɨ k'orea piuipɨra, Tachi Ak'õre ome ewaricha chok'ae baipɨ.

²⁶ Ẽpẽra nãɨ ĩjũane ne ãarea uru bɨde piuipɨra, ¿ichia uru bɨpa k'aripaik'ãra? ¿Jõmasã́ teai bɨma, ichi piuemaapa?

²⁷ Piarã mɨ, chi Ẽpẽra Warra Tachi Ak'õrepa ɨt'aripa peedarã ome cheipɨ mɨ Ak'õre jua chaareadepa ẽpẽerã ɨtɨai k'orea. Mãɨne pia oopataɨrã́ mɨa pia bɨipɨ, ichiaba nemietá oopataɨrã́ nepɨra pará bɨipɨ.

²⁸ Mɨa piarã jararuma: chi eda waapẽarã nãma p'anɨ piudai naena ununaipɨ chi Ẽpẽra Warrapa ichidirã ichi juade ua bait'a.