Mateo 10 - Tachi Ak'õre Pedea

Jesupa doce peedarã

¹ Jesupa ichi ome p'ɨrrɨapataɨrã doce p'anɨ ará t'ɨ̃sima. Maapae ãchiá jua chaarea teasima jaore mietá ãyá jeret'aadamẽrá mãɨnepa k'ak'ua piawẽa be mãɨnepa k'ak'ua p'ua be jɨpa beepidamẽrá.

² Jesupa peedaɨrã doce p'anɨrã nãɨrã pasima: Simón, Pedro apataɨ; chi ũpẽa André; Zebedeo warrarã Santiago mãɨnepa Juan;

³ P'elipe; Bartolomé; Tomá; Romanepema pae erreara jɨrɨp'eparí pada Mateo; Alp'eo warra Santiago; Tadeo;

⁴ mãɨnepa Simón Cananeo. Ichiaba basima Juda Iscariote, chi Jesú jitapida.

⁵ Mãɨrã doce p'anɨrã Jesupa peesima. Maamina wãnai naena ichia jarasima: —Judiorãwẽmá, Samaria p'uuru bemá pida wãrãt'ɨ.

⁶ Mãɨpari judiorãmá, Israel ĩjũa oveja atua be jĩra p'anɨmá wãt'ɨ.

⁷ Mãra wãutamá jarat'ɨ: “Tãaraawẽa bɨde Pajãne Bɨpa ichidirã ichi juade ua baipɨ”.

⁸ Mãɨpuru k'ak'ua piawẽa be jɨpa beepit'ɨ, piudada chok'ae p'irabaripit'ɨ, aidapa k'ɨdade be jɨpa beepit'ɨ, jaore mietá ãyá jeret'aat'ɨ. Mɨa mãrá jua chaarea pari tearuma mãɨya oodamẽrá. Mãɨpuru ẽpẽrarã pari k'aripat'ɨ.

^9-10 Mãrapa oo p'anɨpari Tachi Ak'õrepa ne teaipɨ. Mãɨ k'orea erreara mi ãpia pida ateewãrãt'ɨ, chi mimiaparipa ichi erreara jitai pia bɨẽra. Mãra wãutade neet'á yaaparí ateewãrãt'ɨ. Ichiaba neet'á ume, jĩrune jɨ̃pataɨ mãɨnepa tuma ateewãrãt'ɨ.

¹¹ »Mãra p'uuru waibɨade mãɨyawẽpɨra p'uuru k'aepeade cheutade mãrapa ẽpẽra sõpia be jɨrɨt'ɨ. Mãɨ ẽpẽra tede p'aneet'ɨ aba mãɨ p'uurudepa wãutadea.

¹² Mãɨ tiida eda wãutade Tachi Ak'õre t'ɨ̃ne chi ẽpẽrarã́ jarat'ɨ ne k'ɨ̃risiadawẽa p'ananamẽrá.

¹³ Mãɨ tedepemarãpa mãrá pia chesidade adaipɨra, ãchi mãra ome ne k'ɨ̃risiadawẽa p'ananaipɨ. Maamina mãɨyanaepɨra, ãchi p'ue ne k'ɨ̃risiadawẽa p'ananaiwẽma.

¹⁴ Abaɨpa mãrá pia chesiade aepɨra, mãɨyawẽpɨra mãra pedea ũri k'ɨ̃riaepɨra, mãmãɨpa wãt'ɨ. Ãchi tiidaɨpa mãɨyawẽpɨra p'uurudepa wãutade yooro jora mãra jĩrunepema jãrap'et'at'ɨ.

¹⁵ Mɨa piarã jararuma: Tachi Ak'õrepa ɨtɨai ewaride Sodoma, Gomorra p'uuru k'aepẽra mãɨ p'uuru atepe ɨtɨaipɨ.

Jesupa jarada ichi k'orea ĩjãapataɨrã mĩanai

¹⁶ »Mɨa mãra ẽpẽra k'achia t'ãena peeruma. Ãchia mãra piawẽa oodaipɨ usa k'achiapa oveja orrabaripari jĩra. Mãɨpuru ãchi t'ãena p'anɨne taama jĩra k'ɨ̃risia k'awaa nipat'ɨ, maamina p'aloma jĩra ɨmɨmɨrã́ nipat'ɨ.

¹⁷ Ẽpẽrarã t'ãena jĩrak'aua p'anat'ɨ. Ãchia mãra chi ak'ɨpataɨrãmá ateewãnak'ari maapae judiorã ará pedeapataɨ tede soapa p'edaipɨ.

¹⁸ Mɨne ĩjãa p'anɨ k'orea mãra chi poro chaarearã k'ĩrari mãɨnepa chi poro jũra jɨ̃parí jɨ̃ p'anɨrã k'ĩrari ateewãnaipɨ. Mãɨne mãrapa ãchi k'ĩrari mãɨnepa judiorãwẽ k'ĩrari pida mɨ k'orea pedeadaipɨ.

¹⁹ Mãra jita enemeeutade k'ɨ̃risia paraarãt'ɨ k'ãret'a jaradai k'orea. Chi chaarearã k'ĩrari p'anɨne Tachi Ak'õrepa k'awapiipɨ k'ãre jaradai p'anɨ.

²⁰ Mãɨ pedeautade mãra k'ɨ̃risiadepa pedeadaiwẽma, mãɨpari Tachi Ak'õre Jaorepa mãra k'ak'uadepa pedeaipɨ.

²¹ »Abaɨpa ara ichi ũpẽa peapiipɨ mɨne ĩjãa bɨ k'orea. Chi ak'õrepa ichi warra peapiipɨ mãɨnepa chi warrarãpa ãchi ak'õrerã k'ĩruunak'ari peapidaipɨ.

²² Ãareaɨrãpa mãra unuemaanaipɨ mɨne ĩjãa p'anɨ k'orea. Maamina mãrapa mãɨ ewari chaareade mɨne ĩjãa p'anɨ itu bɨdaepɨra, Tachi Ak'õrepa k'aripaipɨ.

²³ P'uuru abaɨde ẽpẽrarãpa mãra piawẽa oodai k'orea ẽp'ẽnaipɨra, awara p'uurudea mĩruwãt'ɨ. Mɨa piarã jararuma: mãra Israeldepema p'uuru becha jõma p'ɨrrɨadai naena mɨ, chi Ẽpẽra Warra cheipɨ.

^24-25 »Chi jarateaparí ome baparí, chi jarateaparí k'aepẽra atepe k'awa bɨwẽma. Maamina chi jarateaparí jĩra baipɨra, pia bɨma. Chi chipari pae pari mimiaparí sida ichi chipari k'aepẽra atepe bɨwẽma. Maamina ichi chipari jĩra baipɨra, pia bɨma. Mɨ jaore mietaarã minachia k'awa bɨ Beelzebú a p'anɨpɨra, mãra ara mãɨ jĩra jaradaipɨ.

¿K'ai wap'eadai p'anɨma?

²⁶ »Ẽpẽrarã wap'earãt'ɨ. Ne ãarea jĩp'a bɨwẽ jĩra bɨt'a mẽra beeiwẽma. Tachia k'awadawẽa p'anɨt'a, Tachi Ak'õrepa mãɨ ãarea jĩp'a k'awapiipɨ.

²⁷ Mɨa mãrá p'ãrione jara bɨ, ɨnaane jarat'ɨ. Mɨa mãra k'ɨɨrɨk'á jarada te ɨ̃rɨpa jĩk'ua jarat'ɨ.

²⁸ Chi nãɨ k'ak'ua peapataɨrã wap'earãt'ɨ. Ãchia nãɨ k'ak'ua p'ue peadaima maamina tachi jaore p'ue peadaiwẽma. Mãɨpari nãɨ k'ak'ua mãɨnepa tachi jaore mietade paai bɨt'a wap'eat'ɨ.

²⁹ ¿Netopatawẽk'ãra ĩpana chae ume p'anɨ erreara tau aba bɨ pari? Maamina mãra Ak'õre pajãne bɨpa mãɨ itu bɨepɨra, aba pida ĩpana piuiwẽma.

³⁰ Mãɨ awara Tachi Ak'õrepa k'awa bɨma mãrapa puda jõmasã́ uru p'anɨt'a.

³¹ Tachi Ak'õrepa mãra ĩpana chok'ará p'anɨ k'aepẽra pia ak'ɨ bɨẽra ne wap'eadawẽa p'anat'ɨ.

Jesú k'orea k'ĩra p'erawẽa bai

³² »Abaɨpa ẽpẽrarã k'ĩrari mɨne ĩjãa bɨade aipɨra, mɨ Ak'õre pajãne bɨ k'ĩrari mɨa ichi mõréane aipɨ.

³³ Ara mãɨ jĩra abaɨ pida ẽpẽrarã k'ĩrari mɨ atua bɨade aipɨra, mɨa pida mɨ Ak'õre pajãne bɨ k'ĩrari ichi atua bɨade aipɨ.

¿K'ai pia k'ɨ̃rianai?

³⁴ »Mɨ nãɨ ĩjũanea chesiade a k'ɨ̃risiarãt'ɨ ẽpẽerã ne k'ɨ̃risiadawẽa p'anapii k'orea. Mɨ mãɨ k'orea chewẽa bɨma, mãɨpari che bɨma ẽpẽrarã tausia k'ĩruu p'ananamẽrá.

³⁵ Mɨ chesima chi warra chi ak'õre ome nepɨra pará bapii k'orea, chi k'au chi nae ome nepɨra pará bapii k'orea mãɨnepa chi ãyo chi p'ak'õre ome nepɨra pará bapii k'orea.

³⁶ Mãrapa mɨne ĩjãa p'anɨ k'orea piarã machi tiida chi nek'ĩramá beadaipɨ.

³⁷ Abaɨpa chi ak'õre wa chi nae mɨ k'aepẽra atepe k'ɨ̃ria bɨpɨra, mãɨ mɨ ome p'ue nipaiwẽma. Abaɨ pida chi warra wa chi k'au mɨ k'aepẽra atepe k'ɨ̃ria bɨpɨra, mãɨ mɨ ome p'ue nipaiwẽma.

³⁸ Minachia mĩa bai k'orea bɨwẽpɨra, mɨ ome p'ue p'ɨrrɨaiwẽma.

³⁹ Abaɨ pida nãɨ ĩjũane itu ichi k'orea k'ɨ̃risia bɨpɨra, mãɨ atuaipɨ. Maamina abaɨ pida mɨ k'orea piuipɨra, mãɨ Tachi Ak'õre ome ewaricha chok'ae baipɨ.

Jesupa jarada ĩjãapataɨrãpa nepia jitadai

⁴⁰ »Chi mãrá pia chesidade a bɨpa, mɨá pia chesiade a bɨma. Chi mɨá pia chesiade a bɨpa chi mɨ Peedá pia pedea bɨma.

⁴¹ Abaɨ pida Tachi Ak'õre pari pedeaparí pia chesiade aipɨra, Tachi Ak'õrepa peeda pẽra, nepia jitaipɨ Tachi Ak'õre pari pedeaparipa jitai pada jĩra. Ẽpẽra jĩp'a bɨa pia chesidade aipɨra piarã jĩp'a bɨẽra, Tachi Ak'õrepa ẽpẽra jĩp'a bɨa nepia teapari jĩra mãɨ ẽpẽrá ara mãɨya teaipɨ.

⁴² Mɨa jararuma: abaɨ pida chi mɨ ome p'ɨrrɨapataɨrã chi k'ɨ̃risia ãpia k'ɨrɨa pania k'õresã́ teaipɨra, Tachi Ak'õrepa piarã mãɨ ẽpẽrá nepia teaipɨ».